റോഡില്‍ ഇറങ്ങിയ ആനയെ ഓടിക്കാന്‍ ഇറങ്ങി; പിന്നില്‍ കണ്ട ആനയെ കണ്ട് ഭയന്ന് ഓടി കാനയില്‍ വീണു; ആനയുടെ ചവിട്ടേറ്റ് കാല്‍ ഒടിഞ്ഞു; ശരീരത്തിലും പരിക്ക്; ഫോറസ്റ്റ് വാച്ചര്‍ക്ക് ഗുരുതര പരിക്ക്
തൃശൂര്‍: ചാലക്കുടി പിള്ളപ്പാറയില്‍ കാട്ടാനയുടെ ആക്രമണത്തില്‍ ഫോറസ്റ്റ് വാച്ചര്‍ക്ക് ഗുരുതര പരിക്ക്. പിള്ളപ്പാറ സ്വദേശി സുഭാഷ് (45) ആണ് പരിക്കേറ്റത്. ശനിയാഴ്ച രാത്രി 7.45ഓടെയാണ് സംഭവം. റോഡില്‍ ഇറങ്ങിയ കാട്ടാനയെ ഓടിക്കാനായി ഫോറസ്റ്റര്‍ ദിവാകരനും വാച്ചര്‍ സുഭാഷും സ്ഥലത്തെത്തി ടോര്‍ച്ച് തെളിച്ച് ശ്രമം നടത്തുകയായിരുന്നു. തിരിച്ചുപോകുന്നതിനിടെ പിന്നില്‍നിന്ന് ഓടി എത്തിയ ആനയെ കണ്ട് ഇരുവരും ഭയന്ന് ഓടുകയായിരുന്നു. ഓടുന്നതിനിടെ സുഭാഷ് കാല്‍ തെറ്റി കാനയിലേക്ക് വീണു.
ആനയുടെ ചവിട്ടേറ്റ് സുഭാഷിന്റെ കാല്‍ ഒടിഞ്ഞു. തുമ്പികൈ കൊണ്ട് അടിയേറ്റ് ശരീരത്തിലും ഗുരുതരമായി പരിക്കേറ്റു. സഹപ്രവര്‍ത്തകര്‍ സ്ഥലത്തെത്തിച്ച് സുഭാഷിനെ ചാലക്കുടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. തുടര്‍ന്ന് വിദഗ്ധ ചികിത്സയ്ക്കായി തൃശൂരിലേക്ക് മാറ്റി. ഫോറസ്റ്റ് വകുപ്പ് അധികൃതര്‍ സംഭവസ്ഥലം സന്ദര്‍ശിച്ച് പരിശോധന നടത്തി. പ്രദേശത്ത് കാട്ടാനയുടെ സാന്നിധ്യം തുടരുന്നതിനാല്‍ ജാഗ്രത പാലിക്കണമെന്ന് ഫോറസ്റ്റ് വകുപ്പ് മുന്നറിയിപ്പ് നല്‍കി.