'ഭക്തരെ കൈവിടാതെ ഡോക്ടർമാർ..'; ശബരിമല സന്നിധാനത്ത് ഇതുവരെ ഹൃദയാഘാതം ഉണ്ടായത് 168 പേർക്ക്; സർക്കാർ വൈദ്യസഹായം നൽകിയത് 2.89 ലക്ഷം പേർക്ക്; റിപ്പോർട്ടുകൾ പുറത്ത്!

പത്തനംതിട്ട: മണ്ഡലകാല തീർഥാടന കാലത്ത് സർക്കാരിന്‍റെ ആരോഗ്യസൗകര്യങ്ങൾ വഴി ഇതുവരെ 2.89 ലക്ഷത്തിലേറെ പേർക്ക് വൈദ്യസഹായം ലഭിച്ചതായി റിപ്പോർട്ടുകൾ. ജനുവരി 10 വരെയുള്ള കണക്കുകൾ അനുസരിച്ച്‌ 2,16,969 രോഗികൾ ആശുപത്രികളിലും 72,654 രോഗികൾ അടിയന്തര വൈദ്യസഹായ കേന്ദ്രങ്ങളിലുമായി ചികിത്സ തേടിയിട്ടുണ്ട്.

649 എമർജൻസി കേസുകൾക്ക് അടിയന്തര വൈദ്യസഹായകേന്ദ്രങ്ങളിൽ സേവനം നൽകി. 168 പേർക്ക് ഹൃദയാഘാതം റിപ്പോർട്ട് ചെയ്തതിൽ 115 രോഗികളെ കൃത്യമായ ഇടപെടലിലൂടെ ജീവിതത്തിലേക്ക് തിരിച്ച് കൊണ്ടുവരാനായി. ജന്നി വന്ന 103 പേർക്ക് സേവനം നൽകിയതിൽ 101 പേരെയും രക്ഷപെടുത്താൻ സാധിക്കുകയും ചെയ്തിട്ടുണ്ട്.

അതേസമയം, മകരവിളക്കിനോടനുബന്ധിച്ചും വളരെ വിപുലമായ ക്രമീകരണങ്ങൾ ആരോഗ്യവകുപ്പ് ഒരുക്കിയിട്ടുണ്ട്. ജനുവരി ഒന്നു മുതൽ 14 വരെ കരിമല ഗവ: ഡിസ്പെൻസറി തുറന്നു പ്രവർത്തിക്കുന്നുണ്ട്. മകരവിളക്ക് കാലയളവിൽ അടിയന്തരഘട്ടങ്ങൾ നേരിടാനായി മെഡിക്കൽ ഓഫീസർമാരുടെയും പാരാമെഡിക്കൽ ജീവനക്കാരുടെയും റിസർവ് ലിസ്റ്റ് തയാറാക്കിയിട്ടുണ്ടെന്ന് ആരോഗ്യവകുപ്പ് നോഡൽ ഓഫീസർ ഡോ. ശ്യാംകുമാർ കെ കെ വ്യക്തമാക്കി.