വീണ ജോര്‍ജ് നല്ലൊരു ആരോഗ്യമന്ത്രി അല്ലെങ്കിലും നല്ലൊരു അഭിനേത്രി; കയ്യേറ്റം ചെയ്‌തെന്ന പ്രചാരണം സിപിഎമ്മിന്റെ രാഷ്ട്രീയ നാടകം;കൈരളി അടക്കം ചാനലുകളില്‍ കെഎസ് യുക്കാര്‍ മന്ത്രിയെ ആക്രമിക്കുന്ന ദൃശ്യം വന്നിട്ടില്ലെന്നും കെ സുധാകരന്‍

കണ്ണൂര്‍: വീണാ ജോര്‍ജ് നല്ലൊരു ആരോഗ്യമന്ത്രി അല്ലെങ്കിലും നല്ലൊരു അഭിനേത്രി ആണെന്ന് തെളിയിച്ചുവെന്ന് കെ.സുധാകരന്‍ എം.പി. കേരളത്തിലെ ആരോഗ്യ മന്ത്രിയെ ആക്രമിച്ചുവെന്ന തരത്തില്‍ സി.പി.എം പ്രചരിപ്പിക്കുന്ന ആരോപണങ്ങള്‍ പൂര്‍ണമായും അടിസ്ഥാനരഹിതവും സി.പി.എം ന്റെ രാഷ്ട്രീയ നാടകവുമാണ്.

സംഭവവുമായി ബന്ധപ്പെട്ട് കാണിക്കുന്ന ദൃശ്യങ്ങളില്‍ നിന്നെല്ലാം ആക്രമണവും, പരിക്കേറ്റുവെന്ന അവകാശവാദങ്ങളും യഥാര്‍ത്ഥ സംഭവവികാസങ്ങളുമായി ബന്ധവുമില്ലെന്ന് വ്യക്തമാവുകയാണ്. സംഭവസ്ഥലത്തുണ്ടായിരുന്ന കെഎസ്യു കുട്ടികള്‍ ജനാധിപത്യപരമായ രീതിയില്‍ പ്രതിഷേധിച്ചിട്ടുണ്ട്.

കുട്ടികള്‍ മന്ത്രിയെ ആക്രമിച്ചിട്ടില്ലെന്നും, അവരില്‍ നിന്നൊരു അക്രമ പ്രവൃത്തി ഉണ്ടായിട്ടില്ലെന്നും ദൃക്‌സാക്ഷി മൊഴികളും ലഭ്യമായ വിവരങ്ങളും വ്യക്തമായി സൂചിപ്പിക്കുന്നു. കേരളത്തിലെ മൊത്തം ദൃശ്യമാധ്യമങ്ങള്‍ സംഭവ സ്ഥലത്ത് ഉണ്ടായിരുന്നു. ഏതെങ്കിലും ദൃശ്യമാധ്യമങ്ങളില്‍ കെഎസ് യു കുട്ടികള്‍ മന്ത്രിയെ ആക്രമിക്കുന്ന ദൃശ്യം ഉണ്ടോ? സിപിഎമ്മിന്റെ കൈരളി ചാനല്‍ അടക്കമുള്ള ചാനലുകള്‍ സംഭവ സ്ഥലത്ത് ഉണ്ടായിരുന്നല്ലോ? ഈ ചാനലുകളില്‍ ഒന്നിലും തന്നെ കെഎസ്യു വിദ്യാര്‍ത്ഥികള്‍ മന്ത്രിയെ ആക്രമിക്കുന്ന ഒരു ദൃശ്യവും വന്നിട്ടില്ല. അതിനുപകരം പ്രതിഷേധക്കാരോട് അങ്ങോട്ട് ആക്രോശിക്കുന്ന മന്ത്രിയുടെ ദൃശ്യമാണുള്ളതെന്ന് കെ.സുധാകരന്‍ എം പി ചൂണ്ടിക്കാട്ടി.