നിയന്ത്രണംവിട്ട കാര്‍ അടുത്ത വീട്ടിലെ പോര്‍ച്ചും കടന്ന് കുഴിയില്‍ വീണു; കാറിലുണ്ടായിരുന്ന അമ്മയും മകനും അത്ഭുതകരമായി രക്ഷപ്പെട്ടു

മല്ലപ്പള്ളി: കോട്ടയം കോഴഞ്ചേരി സംസ്ഥാന പാതയില്‍ നിന്ന് നിയന്ത്രണം വിട്ട കാര്‍ 50 മീറ്റര്‍ അകലേക്ക് ഓടി ആറ് മീറ്റര്‍ താഴ്ചയില്‍ പതിച്ചു. വണ്ടിയിലുണ്ടായിരുന്ന അമ്മയും മകനും അത്ഭുതകരമായി രക്ഷപ്പെട്ടു. ചൊവ്വാഴ്ച വൈകീട്ട് മൂന്ന് മണിയോടെയാണ് അപകടം. പവ്വത്തിപ്പടി കോലമ്മാക്കല്‍ ദീപയാണ് കാര്‍ ഓടിച്ചിരുന്നത്. മകന്‍ കണ്ണന്‍ ഒപ്പമുണ്ടായിരുന്നു.

റോഡില്‍ നിന്ന് നിയന്ത്രണം വിട്ട് കുതിച്ച കാര്‍ റോഡിന് താഴെയുള്ള വീട്ടുവളപ്പിലേക്ക് വീണ് തിരിയുകയും പിന്നാക്കം ഓടുകയും ചെയ്തു. താഴെയുണ്ടായിരുന്ന പടിഞ്ഞാറേപ്പുരക്കല്‍ മാത്യുവിന്റെ വീടിന്റെ പോര്‍ച്ചിലെ തൂണുകള്‍ക്കിടയിലൂടെ കടന്നുപോയ വാഹനം വീട്ടുവളപ്പ് കഴിഞ്ഞുള്ള കുഴിയിലേക്ക് പിന്നാക്കം മറിയുകയായിരുന്നു. ഈ സമയം വീട്ടില്‍ ആരുമില്ലാതിരുന്നു.