അഞ്ച് പവന്റെ ആഭരണം കാണാനില്ലെന്ന് ബന്ധുക്കള്‍; പാറശ്ശാലയിലെ മുന്‍ നഴ്‌സിംഗ് അസിസ്റ്റന്റിന്റെ മരണത്തില്‍ ദുരൂഹത: മൃതദേഹം ഇന്ന് പുറത്തെടുത്ത് പോസ്റ്റമോര്‍ട്ടം നടത്തും
അഞ്ച് പവന്റെ ആഭരണം കാണാനില്ലെന്ന് ബന്ധുക്കള്‍; പാറശ്ശാലയിലെ മുന്‍ നഴ്‌സിംഗ് അസിസ്റ്റന്റിന്റെ മരണത്തില്‍ ദുരൂഹത: മൃതദേഹം ഇന്ന് പുറത്തെടുത്ത് പോസ്റ്റമോര്‍ട്ടം നടത്തും
തിരുവനന്തപുരം: പാറശ്ശാലയില്‍ കഴിഞ്ഞ ദിവസം മരിച്ച മുന്‍ നഴ്‌സിംഗ് അസിസ്റ്റന്റ് സെലീനാമ്മയുടെ മൃതദേഹം ഇന്ന് പുറത്തെടുത്ത് പോസ്റ്റുമോര്‍ട്ടം നടത്തും. സെലീനാമ്മയുടെ മരണത്തില്‍ ബന്ധുക്കള്‍ ദുരൂഹത ആരോപിച്ചതോടെയാണ് മൃതദേഹം പുറത്തെടുത്ത് പരിശോധിക്കാന്‍ തീരുമാനമായത്. ധനുവച്ചപുരം സ്വദേശി സെലിനാമ്മയെ കഴിഞ്ഞ മാസം 17ന്് വൈകീട്ടാണ് മുറിയിലെ കട്ടിലില്‍ മരിച്ച നിലയില്‍ കാണപ്പെട്ടത്.
ഒറ്റയ്ക്ക് താമസിച്ചിരുന്ന സെലീനാമ്മയുടെ വീട്ടില്‍ സഹായിക്കാന്‍ എത്തുന്ന സ്ത്രീയാണ് മൃതദേഹം ആദ്യം കാണുന്നത്. ഇവര്‍ ഉടന്‍ തന്നെ നാട്ടുകാരെയും ബന്ധുക്കളേയും വിവരം അറിയിച്ചു. സ്വാഭാവിക മരണം എന്ന ധാരണയില്‍ സമീപത്തെ പള്ളി സെമിത്തേരിയില്‍ 18ന് സംസ്‌കാരവും നടത്തിയിരുന്നു. എന്നാല്‍ സെലീനാമ്മയുടെ ബാഗില്‍ നിന്ന് അഞ്ച് പവന്റെ ആഭരണം നഷ്ടപ്പെട്ടെന്ന് കണ്ടെത്തിയതോടെ ബന്ധുക്കള്‍ മരണത്തില്‍ ദുരൂഹതയുണ്ടെന്ന് ആരോപിച്ച് പാറശ്ശാല പൊലീസില്‍ പരാതി നല്‍കി. ഇതോടെയാണ് കളക്ടറുടെ അനുമതിയില്‍ മൃതദേഹം പുറത്തെടുത്ത് പോസ്റ്റുമോര്‍ട്ടം നടത്തുന്നത്.