ഷര്‍ട്ടിന്റെ ബട്ടണ്‍ ഇട്ടില്ല, ഐഡി കാര്‍ഡ് ധരിച്ചില്ല; മലപ്പുറത്ത് പ്ലസ് വണ്‍ വിദ്യാര്‍ഥികള്‍ക്ക് സീനിയര്‍ വിദ്യാര്‍ഥികളുടെ മര്‍ദനം; ദൃശ്യങ്ങള്‍ റീല്‍ ആക്കി പ്രചരിപ്പിച്ചു
മലപ്പുറത്ത് പ്ലസ് വണ്‍ വിദ്യാര്‍ഥികള്‍ക്ക് സീനിയര്‍ വിദ്യാര്‍ഥികളുടെ മര്‍ദനം
മലപ്പുറം: റാഗിങിന്റെ പേരില്‍ പ്ലസ് വണ്‍ വിദ്യാര്‍ഥികള്‍ക്ക് സീനിയര്‍ വിദ്യാര്‍ത്ഥികളുടെ മര്‍ദനം. കൊണ്ടോട്ടി ജിവിഎച്ച്എസ് സ്‌കൂളിലെ പ്ലസ് വണ്‍ വിദ്യാര്‍ഥികള്‍ക്കാണ് മര്‍ദ്ദനമേറ്റത്. മര്‍ദന ദൃശ്യങ്ങള്‍ റീല്‍ ആക്കി സോഷ്യല്‍ മീഡിയയില്‍ പ്രചരിപ്പിച്ചെന്നും പരാതിയുണ്ട്. മലപ്പുറം കൊണ്ടോട്ടി ജിവിഎച്ച്എസ് സ്‌കൂളിലെ പ്ലസ് വണ്‍ വിദ്യാര്‍ഥികള്‍ക്ക് ആണ് മര്‍ദനമേറ്റത്.
ആദ്യ മര്‍ദനത്തിന് പിന്നാലെ പൊലീസില്‍ പരാതി നല്‍കിയത് ചോദ്യം ചെയ്തത് വീണ്ടും മര്‍ദിച്ചെന്ന് വിദ്യാര്‍ഥികള്‍. സംഭവത്തില്‍ കൊണ്ടോട്ടി പൊലീസ് ഏഴ് പ്ലസ് ടു വിദ്യാര്‍ഥികള്‍ക്ക് എതിരെ കേസ് എടുത്തു. കഴിഞ്ഞദിവസമാണ് രണ്ട് വിദ്യാര്‍ഥികളെ സീനിയര്‍ വിദ്യാര്‍ഥികള്‍ കൂട്ടമായി മര്‍ദിച്ചത്. സ്‌കൂള്‍ ഗ്രൗണ്ടില്‍വെച്ചും സമീപത്തെ റോഡില്‍ വെച്ചുമായിരുന്നു മര്‍ദനം.
ഷര്‍ട്ടിന്റെ ബട്ടണ്‍ ഇട്ടില്ല, ഐഡി കാര്‍ഡ് ധരിച്ചില്ല എന്നാരോപിച്ചായിരുന്നു മര്‍ദനം. തുടര്‍ന്ന് വിദ്യാര്‍ഥികളുടെ മതാപിതാക്കള്‍ പൊലീസില്‍ പരാതി നല്‍കിയിരുന്നു. ഇത് ചോദ്യം ചെയ്തായിരുന്നു വീണ്ടും മര്‍ദിച്ചത്. പരുക്കേറ്റ വിദ്യാര്‍ഥികള്‍ കൊണ്ടോട്ടിയിലെ സ്വകാര്യ ആശുപത്രിയില്‍ ചികിത്സ തേടിയിരുന്നു. രണ്ടാം തവണ മര്‍ദിക്കുന്നതിനിടെ സ്‌കൂളിലെ ഒരു അധ്യാപികയ്ക്കും പരുക്കേറ്റു. അഞ്ചു മാസം ഗര്‍ഭിണിയായ അധ്യാപികയ്ക്ക് കല്ലേറില്‍ പരുക്കേല്‍ക്കുകയായിരുന്നു.