ക്ഷേത്ര ഉത്സവത്തിനിടെയുണ്ടായ തര്‍ക്കത്തില്‍ ഇടപ്പെട്ടതിന്റെ വൈരാഗ്യം; വീട്ടില്‍ അതിക്രമിച്ച് കയറി പോര്‍ച്ചില്‍ കിടന്ന വാഹനങ്ങള്‍ കത്തിച്ചു; പ്രതി പിടിയില്‍
വീട്ടില്‍ അതിക്രമിച്ച് കയറി പോര്‍ച്ചില്‍ കിടന്ന വാഹനങ്ങള്‍ കത്തിച്ചു
തൃശൂര്‍: മുന്‍വൈരാഗ്യത്തിന്റെ പേരില്‍ വീട്ടില്‍ അതിക്രമിച്ച് കയറി പോര്‍ച്ചില്‍ കിടന്ന വാഹനങ്ങള്‍ തീവച്ച് നശിപ്പിച്ച കേസിലെ പ്രതി പിടിയില്‍. ദുര്‍ഗ്ഗാനഗര്‍ സ്വദേശി ചൂരപ്പെട്ടി വീട്ടില്‍ ഷാംജിത്ത് (29) നെയാണ് മതിലകം പൊലീസ് അറസ്റ്റ് ചെയ്തത്. മതിലകം ആല ദുര്‍ഗ്ഗാനഗര്‍ സ്വദേശി നാലുമാക്കല്‍ വീട്ടില്‍ അക്ഷയിന്റെ വീട്ടിലെ പോര്‍ച്ചില്‍ വച്ചിരുന്ന ബുള്ളറ്റും, ഇലക്ട്രിക് സ്‌കൂട്ടറും കഴിഞ്ഞ ദിവസം പുലര്‍ച്ചെ തീ വെച്ച് നശിപ്പിച്ച കേസിലാണ് അറസ്റ്റ്.
ആല ക്ഷേത്രത്തിലെ ഉത്സവത്തിനിടെ ഷാംജിത്തും ശ്രീക്കുട്ടന്‍ എന്നയാളും തമ്മിലുണ്ടായ തര്‍ക്കത്തില്‍ ശ്രീക്കുട്ടന്റെ കൂട്ടുകാരനായ അക്ഷയ് ഇടപെട്ടത് മൂലമുള്ള വൈരാഗ്യത്താലാണ് അക്ഷയുടെ വീടിന്റെ പോര്‍ച്ചിലേക്ക് അതിക്രമിച്ച് കയറി 7 ലക്ഷം രൂപയോളം വില വരുന്ന ബുള്ളറ്റും ഇലക്ട്രിക് സ്‌കൂട്ടറും കത്തിച്ചത്. ഷാംജിത്തിനെതിരെ കൊടുങ്ങല്ലൂര്‍ പൊലീസ് സ്റ്റേഷനില്‍ വധശ്രമത്തിന് ഒരു കേസുണ്ട്. മതിലകം ഇന്‍സ്‌പെക്ടര്‍ എം കെ ഷാജിയുും സംഘവുമാണ് പ്രതിയെ അറസ്റ്റ് ചെയ്തത്. തെളിവെടുപ്പിനുശേഷം പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.