വീട്ടുമുറ്റത്തെ കിണറ്റില്‍ പുലി; പുള്ളി പുലി പെട്ടത് പുനലൂര്‍ ചാലിയക്കര ചാങ്ങപ്പാറ സ്വദേശി സിബിയുടെ വീട്ടിലെ കിണറ്റില്‍
By : സ്വന്തം ലേഖകൻ
Update: 2025-10-10 07:08 GMT
കൊല്ലം: പുനലൂരിലെ ജനവാസ മേഖലയില്‍ വീട്ടുമുറ്റത്തെ കിണറ്റില്‍ പുലി അകപ്പെട്ടു. പുനലൂര്‍ ചാലിയക്കര ചാങ്ങപ്പാറ സ്വദേശി സിബിയുടെ വീട്ടിലെ കിണറ്റിലാണ് പുള്ളിപ്പുലി അകപ്പെട്ടത്. ഇന്നു രാവിലെ കിണറ്റില്‍നിന്നും മുരള്‍ച്ച കേട്ട് വീട്ടുകാര്‍ നോക്കിയപ്പോഴാണ് പുലിയെ കണ്ടെത്തിയത്.
25 അടിയോളം താഴ്ചയില്‍ സംരക്ഷണ ഭിത്തി ഇല്ലാത്ത കിണറാണ്. പത്തനാപുരം വനം റേഞ്ചിലെ അമ്പനാര്‍ വനം സ്റ്റേഷന്‍ അധികൃതര്‍ സ്ഥലത്തെത്തി. പുലിയെ രക്ഷപ്പെടുത്താന്‍ ആര്‍ആര്‍ടി സംഘത്തെ വിവരം അറിയിച്ചു. വനം വകുപ്പ് മൃഗഡോക്ടറെ എത്തിച്ച് മയക്കുവെടി വെച്ച് പുലിയെ കരകയറ്റാനുള്ള ശ്രമം തുടങ്ങി.
ഈ മേഖലയില്‍ ജനവാസ മേഖലയില്‍ പുലി എത്തി വളര്‍ത്തുമൃഗങ്ങളെ പിടിക്കുന്നത് പതിവാണ്. കൂടാതെ കാട്ടാനയുടെ ശല്യവും രൂക്ഷമാണ്. വന്യമൃഗങ്ങളുടെ ശല്യം കാരണം റബര്‍ എസ്റ്റേറ്റ് മേഖലയായ ഇവിടുത്തെ ജനങ്ങള്‍ ഭീതിയിലാണ്.