ഗൂഗിള്‍ മാപ്പ് നോക്കി പോയ കണ്ടെയ്‌നര്‍ വഴിയില്‍ കുടുങ്ങി; ഗതാഗതം സ്തംഭിച്ചത് ഒരു മണിക്കൂറോളം
കണ്ടെയ്‌നര്‍ വഴിയില്‍ കുടുങ്ങി; ഗതാഗതം സ്തംഭിച്ചത് ഒരു മണിക്കൂറോളം
By : സ്വന്തം ലേഖകൻ
Update: 2025-11-07 04:04 GMT
എറണാകുളം: ഗൂഗിള്‍ മാപ്പ് നോക്കി കോട്ടയം ഭാഗത്തുനിന്നും മൂവാറ്റുപുഴയ്ക്ക് പോവുകയായിരുന്ന വലിയ കണ്ടെയ്‌നര്‍ ലോറി വളവില്‍ കുരുങ്ങി. കൂത്താട്ടുകുളം ഹൈസ്‌കൂള്‍ റോഡില്‍ ശിവക്ഷേത്രത്തിന് സമീപത്തുള്ള വളവില്‍ ലോറി ഒരു മണിക്കൂറോളം കുരുങ്ങിയതോടെ ഗതാഗതം സ്തംഭിച്ചു. ശനിയാഴ്ച രാത്രി 12-നാണ് സംഭവം.
ഗൂഗിള്‍ മാപ്പില്‍ കൂത്താട്ടുകുളത്തു നിന്നും മൂവാറ്റുപുഴയ്ക്കുള്ള എളുപ്പവഴി വീതികുറഞ്ഞ് വളവുകളോടുകൂടിയ ഹൈസ്‌കൂള്‍-ശിവക്ഷേത്രം റോഡാണ്. ക്ഷേത്രമതിലിനോട് ചേര്‍ന്നുള്ള വലിയ വളവില്‍ വാഹനം തിരിക്കാനാകാതെ കുടുങ്ങി. കണ്ടെയ്‌നറിന്റെ മുന്‍ഭാഗം തിരിഞ്ഞതിനുശേഷമാണ് ഡ്രൈവര്‍ക്ക് വണ്ടി മുന്നോട്ടുപോകുകയില്ല എന്ന് മനസ്സിലായത്. ഒരു മണിക്കൂറോളം ഗതാഗതം പൂര്‍ണമായും സ്തംഭിച്ചു. ബൈക്ക്, കാര്‍ യാത്രക്കാരും നാട്ടുകാരും സഹായിച്ചാണ് വാഹനം നീക്കാന്‍ കഴിഞ്ഞത്.