ബൈക്കും ഹെല്മെറ്റും മൊബൈല് ഫോണും ചെരിപ്പും പാലത്തില്; പുഴയില്നിന്ന് എന്തോ ശബ്ദം കേട്ടതായി സമീപവാസികളും; രാത്രിയില് യുവാവ് പുഴയിലേക്ക് ചാടിയെന്ന് സംശയം, തിരച്ചില്
കൊച്ചി: എറണാകുളം കോതാട് പാലത്തില്നിന്ന് യുവാവ് പുഴയിലേക്ക് ചാടിയതായി സംശയം. ഇന്ഫോപാര്ക്ക് ജീവനക്കാരനായ ഇടയക്കുന്ന് സ്വദേശി ആഷിഖ്(25) ആണ് പുഴയില് ചാടിയെന്ന് സംശയിക്കുന്നത്. ശനിയാഴ്ച അര്ധരാത്രിക്ക് ശേഷമാണ് സംഭവം. യുവാവിനായി അഗ്നിരക്ഷാസേനയും മുങ്ങല് വിദഗ്ധരും പുഴയില് തിരച്ചില് തുടരുകയാണ്.
ശനിയാഴ്ച അര്ധരാത്രി 12 മണിവരെ ആഷിഖ് സുഹൃത്തുക്കള്ക്കൊപ്പം ഉണ്ടായിരുന്നു. ഇതിനുശേഷമാണ് കാണാതായത്. പുലര്ച്ചെ മൂന്നുമണിയായിട്ടും മകന് വീട്ടില് എത്താത്തതിനാല് മാതാവ് മറ്റുള്ളവരെ വിവരമറിയിച്ചു. തുടര്ന്ന് ബന്ധുക്കളും നാട്ടുകാരും നടത്തിയ അന്വേഷണത്തിലാണ് കോതാട് പാലത്തില് ആഷിഖിന്റെ ബൈക്കും ഹെല്മെറ്റും മൊബൈല് ഫോണും ചെരിപ്പും കണ്ടെത്തിയത്.
അര്ധരാത്രിയില് പുഴയില്നിന്ന് എന്തോ ശബ്ദം കേട്ടതായി സമീപവാസികളും പറഞ്ഞു. ഇതോടെയാണ് യുവാവ് പുഴയില് ചാടിയെന്ന നിഗമനത്തില് തിരച്ചില് ആരംഭിച്ചത്.