കാര്യവട്ടത്ത് ആവേശം വിതറാന് ഇന്ത്യ-ന്യൂസിലന്ഡ് പോരാട്ടം; ടിക്കറ്റ് വില്പ്പന പൃഥ്വിരാജ് സുകുമാരന് ഉദ്ഘാടനം ചെയ്തു
കാര്യവട്ടത്ത് ആവേശം വിതറാന് ഇന്ത്യ-ന്യൂസിലന്ഡ് പോരാട്ടം
തിരുവനന്തപുരം: ക്രിക്കറ്റ് ആവേശത്തിലേക്ക് വീണ്ടും ഉണരുന്ന കാര്യവട്ടം ഗ്രീന്ഫീല്ഡ് സ്റ്റേഡിയത്തില് ജനുവരി 31-ന് നടക്കാനിരിക്കുന്ന ഇന്ത്യ-ന്യൂസിലന്ഡ് ട്വന്റി-20 മത്സരത്തിന്റെ ടിക്കറ്റ് വില്പ്പനയ്ക്ക് ഔദ്യോഗിക തുടക്കമായി. തിരുവനന്തപുരം ഹയാത്ത് റീജന്സിയില് നടന്ന പ്രൗഢഗംഭീരമായ ചടങ്ങില് വിശിഷ്ടാതിഥിയായി പ്രശസ്ത ചലച്ചിത്ര താരം പൃഥ്വിരാജ് സുകുമാരന് ആദ്യ ടിക്കറ്റ് സി.എ. സനില് കുമാര് എം.ബിക്ക് കൈമാറി ടിക്കറ്റ് വില്പ്പനയുടെ ഉദ്ഘാടനം നിര്വ്വഹിച്ചു.
ക്രിക്കറ്റ് പ്രേമികള്ക്കും വിദ്യാര്ത്ഥികള്ക്കും സ്റ്റേഡിയത്തിലിരുന്ന് കളി കാണാന് സുവര്ണ്ണാവസരമാണ് കേരള ക്രിക്കറ്റ് അസോസിയേഷന് (കെ.സി.എ) ഇത്തവണ ഒരുക്കിയിരിക്കുന്നത്. ഏറ്റവും കുറഞ്ഞ നിരക്കായ 250 രൂപയ്ക്ക് വിദ്യാര്ത്ഥികള്ക്ക് മത്സരം കാണാം. കൂടാതെ അപ്പര് ടയര് സീറ്റുകള്ക്ക് 500 രൂപയും ലോവര് ടയര് സീറ്റുകള്ക്ക് 1200 രൂപയുമാണ് നിശ്ചിയച്ചിരിക്കുന്ന നിരക്കുകള്. ആരാധകര്ക്ക് ഠശരസലഴേലിശല മൊബൈല് ആപ്ലിക്കേഷന് വഴി ടിക്കറ്റുകള് ഓണ്ലൈനായി ബുക്ക് ചെയ്യാവുന്നതാണ്.
കണ്സെഷന് നടപടിക്രമങ്ങള് പുറത്തിറക്കി
തിരുവനന്തപുരം: കാര്യവട്ടം ഗ്രീന്ഫീല്ഡ് സ്റ്റേഡിയത്തില് ജനുവരി 31-ന് നടക്കുന്ന ഇന്ത്യ-ന്യൂസിലന്ഡ് ടി-20 മത്സരം നേരില് കാണാന് വിദ്യാര്ത്ഥികള്ക്ക് ടിക്കറ്റ് നിരക്കില് ഇളവുകള് പ്രഖ്യാപിച്ച് കെസിഎ. 250 രൂപയാണ് വിദ്യാര്ത്ഥികളുടെ ടിക്കറ്റ് വില.ഇതിനായുള്ള പ്രത്യേക ടിക്കറ്റ് കണ്സെഷന് നടപടിക്രമങ്ങളും അസോസിയേഷന് പുറത്തിറക്കി.
വിദ്യാഭ്യാസ സ്ഥാപനങ്ങള് വഴിയുള്ള ഗ്രൂപ്പ് ബുക്കിംഗുകള്ക്ക് മാത്രമാണ് ഈ ആനുകൂല്യം ലഭിക്കുക. ടിക്കറ്റുകള് ആവശ്യമുള്ള സ്ഥാപനങ്ങള് മേധാവി സാക്ഷ്യപ്പെടുത്തിയ ഔദ്യോഗിക ലെറ്റര്ഹെഡിലുള്ള അപേക്ഷ generalconvener@keralacricket.in എന്ന ഇമെയില് വിലാസത്തില് അയക്കണം. അപേക്ഷയോടൊപ്പം വിദ്യാര്ത്ഥികളുടെ മുഴുവന് പേരും സ്കൂള്/കോളേജ് ഐഡി കാര്ഡ് നമ്പറും സമര്പ്പിക്കണം. ഒരു വിദ്യാഭ്യാസ സ്ഥാപനത്തില് നിന്ന് കുറഞ്ഞത് പത്ത് വിദ്യാര്ത്ഥികളെങ്കിലും ഉണ്ടായിരിക്കണമെന്നും നിബന്ധനയുണ്ട്.
പതിനാറ് വയസ്സില് താഴെയുള്ള വിദ്യാര്ത്ഥികള്ക്കൊപ്പം നിര്ബന്ധമായും ഒരു അധ്യാപകന് ഉണ്ടായിരിക്കണം. ഓരോ പത്ത് വിദ്യാര്ത്ഥികള്ക്കും ഒരു അധ്യാപകന് എന്ന ക്രമത്തില് 250 രൂപ ടിക്കറ്റില് അധ്യാപകര്ക്കും പ്രവേശനം അനുവദിക്കും. അപേക്ഷകള് പരിശോധിച്ച് ബുക്കിംഗ് ഉറപ്പുവരുത്തിയ ശേഷം കേരള ക്രിക്കറ്റ് അസോസിയേഷന്റെ ഔദ്യോഗിക ബാങ്ക് അക്കൗണ്ട് വിവരങ്ങള് സ്ഥാപനത്തെ അറിയിക്കും. തുടര്ന്ന് നിശ്ചിത തുക അടച്ച് വിവരങ്ങള് അസോസിയേഷനെ അറിയിക്കേണ്ടതാണ്. ബാങ്ക് അക്കൗണ്ടില് പണം എത്തിയെന്ന് ബോധ്യപ്പെട്ടാല് മാത്രമേ ടിക്കറ്റുകള് അനുവദിക്കുകയുള്ളൂ. അപൂര്ണ്ണമായതോ മാനദണ്ഡങ്ങള് പാലിക്കാത്തതോ ആയ അപേക്ഷകള് പരിഗണിക്കില്ലെന്നും കെ.സി.എ അറിയിച്ചു.