മെഡിക്കല് വിദ്യാഭ്യാസ ഡയറക്ടറും ആശുപത്രി സൂപ്രണ്ടും രണ്ടാഴ്ചക്കകം റിപ്പോര്ട്ട് സമര്പ്പിക്കണം; മെഡിക്കല് കോളേജില് വയറില് കത്രിക കുടുങ്ങിയ സംഭവത്തില് മനുഷ്യാവകാശ കമ്മീഷന് കേസെടുത്തു
By : സ്വന്തം ലേഖകൻ
Update: 2026-02-20 08:58 GMT
ആലപ്പുഴ : അഞ്ചു വര്ഷം മുമ്പ് ആലപ്പുഴ മെഡിക്കല് കോളേജ് ആശുപത്രിയില് ശസ്ത്രക്രിയക്ക് വിധേയയായ 59 കാരിയുടെ വയറില് കത്രിക കുടുങ്ങിയെന്ന പരാതിയില് മനുഷ്യാവകാശ കമ്മീഷന് സ്വമേധയാ കേസെടുത്ത് അന്വേഷണത്തിന് ഉത്തരവിട്ടു.
മെഡിക്കല് വിദ്യാഭ്യാസ ഡയറക്ടറും മെഡിക്കല് കോളേജ് ആശുപത്രി സൂപ്രണ്ടും രണ്ടാഴ്ചക്കകം റിപ്പോര്ട്ട് സമര്പ്പിക്കണമെന്ന് കമ്മീഷന് അംഗം വി. ഗീത ആവശ്യപ്പെട്ടു. ഗര്ഭപാത്രത്തിലെ മുഴ നീക്കം ചെയ്യാന് 2021 മേയ് 10 നാണ് പുന്നപ്ര സ്വദേശിനി ഉഷാ ജോസഫ് ശസ്ത്രക്രിയക്ക് വിധേയയായത്. വീട്ടിലെത്തിയ ശേഷം കടുത്ത വേദനയും തുടര്ച്ചയായ രക്തസ്രാവവുമുണ്ടായി. വര്ഷങ്ങളോളം മരുന്ന് കഴിക്കുകയായിരുന്നു. ഒടുവില് ഒരു യൂറോളജി ഡോക്ടറാണ് വയറ്റില് കത്രിക കുടുങ്ങിയതായി കണ്ടെത്തിയത്.