രണ്ടറ്റം കൂട്ടിമുട്ടിക്കാൻ ഓടിയ ആ ഓട്ടം കണ്ടത് മന്ത്രി; ബസോടിച്ച ഡ്രൈവർക്ക് മുട്ടൻ പണി; ലൈസൻസ് സസ്പെൻഡ് ചെയ്യാൻ ഉത്തരവ്; സംഭവം കാലടിയിൽ
കാലടി: കാലടിയിൽ മറ്റ് വാഹനങ്ങൾക്കും യാത്രക്കാർക്കും അപകടമുണ്ടാക്കുന്ന രീതിയിൽ അമിതവേഗതയിൽ ബസ് ഓടിച്ച സംഭവത്തിൽ ഡ്രൈവർക്ക് ലൈസൻസ് സസ്പെൻഷൻ. ഗതാഗത വകുപ്പ് മന്ത്രി കെ.ബി. ഗണേഷ് കുമാറിന്റെ നിർദ്ദേശത്തെത്തുടർന്നാണ് ഗതാഗത വകുപ്പ് കർശന നടപടി സ്വീകരിച്ചത്. KL-33-2174 എന്ന നമ്പറിലുള്ള 'സീസൺ' എന്ന സ്വകാര്യ ബസാണ് അപകടകരമായ രീതിയിൽ റോഡിൽ മത്സരയോട്ടം നടത്തിയത്.
സോഷ്യൽ മീഡിയയിൽ പ്രചരിച്ച ഒരു വീഡിയോയെ അടിസ്ഥാനമാക്കിയാണ് മന്ത്രിയുടെ നടപടി. വീഡിയോ പരിശോധിച്ച മന്ത്രി, ഗതാഗത കമ്മീഷണറോട് അടിയന്തര അന്വേഷണത്തിന് നിർദ്ദേശിച്ചു. തുടർന്ന്, അങ്കമാലി ജോയിന്റ് ആർ.ടി.ഒ ബസിന്റെ ഡ്രൈവറുടെ ലൈസൻസ് താൽക്കാലികമായി സസ്പെൻഡ് ചെയ്തു. ബസിന്റെ പെർമിറ്റ് റദ്ദാക്കുന്നതിനുള്ള നടപടികൾ ആരംഭിക്കുകയും മൂവാറ്റുപുഴ ആർ.ടി.ഒ.യ്ക്ക് ഇതിനായി ശുപാർശ അയയ്ക്കുകയും ചെയ്തു.
റോഡിൽ വേഗപരിധി ലംഘിച്ചും അപകടകരമായ രീതിയിൽ ബസുകൾ തമ്മിൽ മത്സരിച്ചും യാത്രക്കാരുടെ ജീവൻ അപകടത്തിലാക്കുന്ന ഇത്തരം പ്രവൃത്തികൾക്കെതിരെ വകുപ്പ് ശക്തമായ നടപടികൾ സ്വീകരിക്കുമെന്ന് എറണാകുളം ആർ.ടി.ഒ കെ.ആർ. സുരേഷ് അറിയിച്ചു. റോഡിലെ നിയമലംഘനങ്ങൾക്ക് ഒരിക്കലും ഇളവുണ്ടാവില്ലെന്നും പൊതുജനങ്ങളുടെ ജീവൻ അപകടത്തിലാക്കുന്ന ഇത്തരം ഓട്ടങ്ങൾ നിരീക്ഷണത്തിൽ നിന്ന് രക്ഷപ്പെടില്ലെന്നും അദ്ദേഹം മുന്നറിയിപ്പ് നൽകി.