വലിയ തിരക്കാണ് ഡോളിയില്‍ കയറിച്ചെന്നാല്‍ നേരിട്ട് ദര്‍ശനം ലഭിക്കും; ശബിമല തീര്‍ത്ഥാടകരില്‍ നിന്നും പണം തട്ടി; രണ്ട് ഡോളി തൊഴിലാളികള്‍ പിടിയില്‍
പത്തനംതിട്ട: ശബരിമല തീര്‍ത്ഥാടനത്തില്‍ ക്യൂ ഒഴിവാക്കി ദര്‍ശനം ലഭ്യമാക്കാമെന്ന് പറഞ്ഞ് തീര്‍ത്ഥാടകരില്‍ നിന്നും പണം തട്ടിയ രണ്ട് ഡോളി തൊഴിലാളികളെ പൊലീസ് അറസ്റ്റ് ചെയ്തു. പീരുമേട് സ്വദേശികളായ കണ്ണനും രഘുവുമാണ് പിടിയിലായത്.
തുലാമാസ പൂജകള്‍ക്കായി നടതുറന്ന സമയത്താണ് സംഭവം നടന്നത്. കാസര്‍കോട് സ്വദേശികളായ തീര്‍ത്ഥാടകര്‍ പമ്പയില്‍നിന്ന് സന്നിധാനത്തേക്ക് കയറുമ്പോള്‍ മരക്കൂട്ടത്ത് എത്തിയപ്പോഴായിരുന്നു ഇവരെ ഡോളി തൊഴിലാളികള്‍ സമീപിച്ചത്. ''വലിയ തിരക്കാണ്, ഡോളിയില്‍ കയറിച്ചെങ്കില്‍ നേരിട്ട് ദര്‍ശനം ലഭിക്കും'' എന്ന വാഗ്ദാനത്തില്‍ തീര്‍ത്ഥാടകര്‍ വിശ്വസിച്ചു.
പതിനായിരം രൂപ വാങ്ങിയ പ്രതികള്‍ തീര്‍ത്ഥാടകനെ ഡോളിയില്‍ കയറ്റി വാവരുനട വരെ എത്തിച്ചു. തുടര്‍ന്ന് അവിടെവെച്ച് ഇരുവരും ഒളിച്ചോടുകയായിരുന്നു. വഞ്ചന മനസിലായ തീര്‍ത്ഥാടകര്‍ ഉടന്‍ പൊലീസില്‍ പരാതി നല്‍കി.
അനധികൃത ഡോളി സേവനത്തിനും സാമ്പത്തിക തട്ടിപ്പിനുമാണ് പ്രതികള്‍ക്കെതിരെ കേസ് രജിസ്റ്റര്‍ ചെയ്തതെന്ന് പൊലീസ് അറിയിച്ചു.