ഓരോ മലയാളിയുടെയും ഹൃദയത്തിൽ സ്ഥാനം നേടിയ കലാകാരൻ; വലിയ അഭിമാനം തോന്നുന്നു; നടനിലേക്കുള്ള അദ്ദേഹത്തിൻ്റെ വളർച്ച ഉത്തമ ഉദാഹരണം; പ്രശംസിച്ച് മന്ത്രി സജി ചെറിയാൻ
തിരുവനന്തപുരം: നടൻ മോഹൻലാലിന് ദാദാസാഹിബ് ഫാൽക്കെ പുരസ്കാരം ലഭിച്ചതിൽ അഭിനന്ദനമറിയിച്ച് സാംസ്കാരിക വകുപ്പ് മന്ത്രി സജി ചെറിയാൻ. ഇന്ത്യൻ സിനിമയുടെ പരമോന്നത ബഹുമതിയായ പുരസ്കാരം ലഭിച്ചതിൽ അതിയായ സന്തോഷവും അഭിമാനവുമുണ്ടെന്ന് മന്ത്രി പ്രസ്താവനയിൽ അറിയിച്ചു.
നാല്പത്തിയഞ്ച് വർഷത്തിലേറെയായി അഭിനയരംഗത്ത് സജീവമായ മോഹൻലാൽ സാധാരണക്കാരനിൽ നിന്ന് വിശ്വവിഖ്യാതനായ നടനിലേക്കുള്ള വളർച്ച കഠിനാധ്വാനത്തിന്റെയും അർപ്പണബോധത്തിന്റെയും ഉത്തമ ഉദാഹരണമാണെന്ന് മന്ത്രി ചൂണ്ടിക്കാട്ടി.
മികച്ച നടൻ, നിർമ്മാതാവ്, ഗായകൻ തുടങ്ങിയ നിലകളിൽ സിനിമയുടെ വിവിധ മേഖലകളിൽ മോഹൻലാൽ നൽകിയ സംഭാവനകൾ ഇന്ത്യൻ സിനിമയുടെ വളർച്ചക്ക് നിർണ്ണായകമായി. ഈ പുരസ്കാരം മലയാള സിനിമയ്ക്കും കേരളത്തിനും ലഭിച്ച വലിയ അംഗീകാരമാണെന്നും, അന്താരാഷ്ട്ര നിലവാരമുള്ള സിനിമകൾക്ക് കേരളം നൽകിയ പിന്തുണയുടെയും ഇവിടുത്തെ കലാകാരന്മാരുടെ പ്രതിഭയുടെയും തിളക്കമാർന്ന പ്രതീകമാണെന്നും അദ്ദേഹം കൂട്ടിച്ചേർത്തു.
കേരളത്തിൻ്റെ സാംസ്കാരിക വകുപ്പ് മന്ത്രി എന്ന നിലയിൽ, ഈ ചരിത്ര നേട്ടത്തിൽ മോഹൻലാലിനെ കേരള ജനതയുടെ പേരിൽ ഹൃദ്യമായി അഭിനന്ദിക്കുന്നുവെന്നും മന്ത്രി അറിയിച്ചു.