മലപ്പുറത്ത് എൻട്രൻസ് പരിശീലന കേന്ദ്രത്തിൽ കത്തിക്കുത്ത്; പിന്നാലെ 16കാരൻ സഹപാഠിയെ കുത്തി പരിക്കേൽപ്പിച്ചു; ഭയന്ന് വിറച്ച് വിദ്യാർത്ഥികൾ; ആക്രമണ ദൃശ്യങ്ങൾ പുറത്ത്

മലപ്പുറം: കുട്ടികൾ തമ്മിലുള്ള വാക്ക് തർക്കം ഒടുവിൽ കലാശിച്ചത് കത്തിക്കുത്തിൽ. മലപ്പുറത്താണ് സംഭവം നടന്നത്. ഒരു എൻട്രൻസ് പരിശീലന കേന്ദ്രത്തിലാണ് കത്തി ആക്രമണം നടന്നത്. ആക്രമണത്തിന്റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്. പ്ലസ് വൺ വിദ്യാർത്ഥി മറ്റൊരു പ്ലസ് വൺ വിദ്യാർത്ഥിയെ ക്ലാസ് മുറിയിൽ വെച്ച് കത്തി കൊണ്ട് അതിക്രൂരമായി കുത്തുകയായിരുന്നു. പഠിക്കുകയായിരുന്ന വിദ്യാർത്ഥിയെ പിറകിൽ നിന്ന് വന്ന പതിനാറുകാരൻ തുടർച്ചയായി കുത്തി പരിക്കേൽപ്പിച്ചു.

വിദ്യാർത്ഥിയുടെ പുറത്തും വയറിനുമാണ് കത്തികുത്തിൽ പരിക്കേറ്റത്. ആക്രമണത്തിന് ശേഷം കുത്തിയ വിദ്യാർത്ഥി പുറത്തേക്ക് ഓടിപോവുകയും ചെയ്തു. സ്ഥാപനത്തിലെ ജീവനക്കാരും മറ്റു വിദ്യാർത്ഥികളും ഓടി എത്തിയാണ് വിദ്യാർത്ഥിയെ ഒടുവിൽ രക്ഷപ്പെടുത്തിയത്. പരിക്കേറ്റ വിദ്യാർത്ഥി ആശുപത്രിയിൽ ചികിത്സയിൽ കഴിയുകയാണ്. സംഭവവുമായി ബന്ധപ്പെട്ട് പോലീസ് കേസെടുത്ത് അന്വേഷണം തുടങ്ങിയിട്ടുണ്ട്.

പതിനാറുകാരൻ പേനാക്കത്തി ഉപയോഗിച്ചാണ് കുട്ടിയെ ആക്രമിച്ചത്. കുത്തേറ്റ വിദ്യാർത്ഥി അപകട നില തരണം ചെയ്തതായി ഡോക്ടർമാർ അറിയിച്ചു. ആലപ്പുഴ സ്വദേശിയായ വിദ്യാർത്ഥിയാണ് ആക്രമണം നടത്തിയത്. ഈ കുട്ടികൾ തമ്മിൽ നേരെത്തെ ചില വാക്കുതർക്കം ഉണ്ടായിരുന്നതായി പോലീസ് പറയുന്നു. സംഭവത്തിലെ കാരണം എന്താണെന്ന് ഇതുവരെ വ്യക്തത വന്നിട്ടില്ല.