ഹോണ്ട അവകാശപ്പെട്ടത് 72 കിലോമീറ്റർ മൈലേജ്: ലഭിച്ചത് 50ലും താഴെ; വാങ്ങിയത് മുതൽ ബൈക്കിൽ നിന്ന് അസാധാരണ ശബ്ദം; വണ്ടി മാറ്റി നൽകാൻ കമ്പനിയും തയ്യാറായില്ല; 12 വർഷത്തെ നിയമ പോരാട്ടം; ചന്തക്കുന്നുക്കാരന് അനുകൂല വിധി

മലപ്പുറം: ഹോണ്ട ഷോറൂമിൽ നിന്ന് വാങ്ങിയ ബൈക്കിൽ വാഗ്ദാനം ചെയ്ത മൈലേജ് ലഭിക്കാത്തതും മറ്റ് തകരാറുകൾ പരിഹരിക്കാത്തതും ചോദ്യം ചെയ്ത് ഉപഭോക്താവ് നടത്തിയ 12 വർഷത്തെ നിയമപോരാട്ടത്തിനൊടുവിൽ അനുകൂല വിധി. മലപ്പുറം ഉപഭോക്തൃ കോടതിയാണ് നഷ്ടപരിഹാരം നൽകാൻ വിധി പുറപ്പെടുവിച്ചത്. പറവെട്ടി സ്വദേശി അബ്ദുൽ ഹക്കീമിന് 1,43,714 രൂപ നഷ്ടപരിഹാരം നൽകാനാണ് വിധി.

2013-ൽ 79,400 രൂപ നൽകി മഞ്ചേരിയിലെ ഹോണ്ട ഷോറൂമിൽ നിന്നാണ് അബ്ദുൽ ഹക്കീം ബൈക്ക് വാങ്ങിയത്. 72 കിലോമീറ്റർ മൈലേജ് വാഗ്ദാനം ചെയ്തെങ്കിലും ലഭിച്ചത് 50 കിലോമീറ്ററിൽ താഴെയായിരുന്നു. കൂടാതെ, ബൈക്കിൽ നിന്ന് അസാധാരണ ശബ്ദവും കേട്ടിരുന്നു. കമ്പനി ഇത് പരിഹരിക്കാമെന്ന് വാഗ്ദാനം ചെയ്ത് പലതവണ സൗജന്യ സർവീസും മറ്റും നൽകിയെങ്കിലും പ്രശ്നങ്ങൾ പരിഹരിക്കപ്പെട്ടില്ല. ഇതോടെ ബൈക്ക് മാറ്റി നൽകണമെന്ന് ആവശ്യപ്പെട്ടെങ്കിലും കമ്പനി വിസമ്മതിച്ചു.

തുടർന്ന് അബ്ദുൽ ഹക്കീം മലപ്പുറം ഉപഭോക്തൃ കോടതിയെ സമീപിക്കുകയായിരുന്നു. ആദ്യ വിധിയിൽ ഒരു ലക്ഷത്തോളം രൂപ നഷ്ടപരിഹാരം നൽകാൻ കോടതി ഉത്തരവിട്ടെങ്കിലും കമ്പനി തിരുവനന്തപുരത്ത് അപ്പീൽ നൽകി. എന്നാൽ, മലപ്പുറം ഉപഭോക്തൃ കോടതിയുടെ വിധി ശരിവയ്ക്കുകയും നഷ്ടപരിഹാര തുക വർദ്ധിപ്പിക്കുകയുമായിരുന്നു. ഒടുവിൽ, തുക കൈപ്പറ്റി അബ്ദുൽ ഹക്കീം ബൈക്ക് തിരികെ നൽകി.