യാത്രക്കിടെ കാട്ടുപന്നി കുറുകെ ചാടി; നിയന്ത്രണംവിട്ട ബൈക്കിൽ നിന്നും തെറിച്ചു വീണ് ഗുരുതര പരിക്കുകളോടെ ചികിത്സയിലായിരുന്ന യുവാവ് മരിച്ചു

തിരുവനന്തപുരം: കാട്ടുപന്നി കുറുകെ ചാടി ബൈക്കിൽ നിന്നും റോ‍ഡിലേക്ക് വീണ് പരിക്കേറ്റ യുവാവ് മരിച്ചു. വിതുര തൊളിക്കോട് സ്വദേശി ഷബിൻ ഷാജി (22) ആണ് വ്യാഴാഴ്ച മരിച്ചത്. വിതുര പ്ലാന്തോട്ടം എന്ന സ്ഥലത്ത് വെച്ച് ബുധനാഴ്ച രാത്രി എട്ട് മണിയോടെയായിരുന്നു അപകടം സംഭവിച്ചത്.

വിതുര പൊലീസ് സ്റ്റേഷൻ പരിധിയിയിൽ വെച്ച് സുഹൃത്തിനോടൊപ്പം യാത്ര ചെയ്യവെയാണ് അപകടത്തിൽപ്പെട്ടത്. വാഹനം സുഹൃത്ത് ഷഹിൻഷാ ആണ് ഓടിച്ചിരുന്നത്. വിതുര തൊളിക്കോട് സ്വദേശിയാണ് ഷഹിൻഷാ. അപകടത്തിൽ ഷെഹിൻ ഷായ്ക്ക് ചെറിയ പരിക്കുകളുണ്ട്.

മരിച്ച ഷബിൻ ഷാജി (22) മോട്ടോർ സൈക്കിളിന്റെ പുറകിലിരുന്ന് യാത്ര ചെയ്യുകയായിരുന്നു. പ്ലാന്തോട്ടം എന്ന സ്ഥലത്ത് എത്തിയപ്പോൾ കാട്ടുപന്നി റോഡിന് കുറുകെ ചാടുകയായിരുന്നു. നിയന്ത്രണംവിട്ട മോട്ടോർ സൈക്കിളിൽ നിന്ന് രണ്ട് പേരും റോഡിലേക്ക് വീണു.

വീഴ്ചയിൽ പിൻസീറ്റിലിരുന്ന ഷബിൻ ഷാജി തല ഇടിച്ചായിരുന്നു റോഡിലേക്ക് വീണത്. തുടർന്ന് തലയ്ക്ക് ഗുരുതരമായി പരിക്കേറ്റ ഷബിനെ നെടുമങ്ങാട് ജില്ലാ ആശുപത്രിയിൽ പ്രവേശിപ്പിച്ചു. അവിടെ ചികിത്സയിലിരിക്കെ വ്യാഴാഴ്ച പുലർച്ചെയായിരുന്നു അന്ത്യം. സംഭവത്തിൽ വിതുര പൊലീസ് കേസ് രജിസ്റ്റർ ചെയ്തിട്ടുണ്ട്.