വീട്ടില്‍ വൈകി വരുന്നതിനെ ചൊല്ലി തർക്കം; അമ്മാവന്റെ കൈയ്യും കാലും തല്ലിയൊടിച്ചു; നിരവധി കേസുകളിൽ പ്രതിയായ യുവാവ് അറസ്റ്റിൽ
കോഴിക്കോട്: വീട്ടില്‍ വൈകി വരുന്നതിനെ ചൊല്ലിയുണ്ടായ തർക്കത്തിൽ ഗൃഹനാഥനെ ക്രൂരമായി ആക്രമിച്ച് പരിക്കേല്‍പ്പിച്ച കേസിൽ പ്രതി പിടിയിൽ. വീട്ടില്‍ അതിക്രമിച്ചു കയറി ഇരുമ്പുവടി കൊണ്ട് ഗൃഹനാഥനെ ഉപദ്രവിക്കുകയായിരുന്നു. അമ്മാവനായ സുബ്രഹ്‌മണ്യനെയാണ് പ്രതി ആക്രമിച്ചത്. സംഭവത്തിൽ നിരവധി കേസുകളിൽ പ്രതിയായ മാവൂര്‍ കോട്ടക്കുന്നുമ്മല്‍ ഷിബിന്‍ ലാലു എന്ന ജിംബ്രൂട്ടന്‍ ആണ് മാവൂര്‍ പോലീസിന്റെ പിടിയിലായത്.
കഴിഞ്ഞ 14ന് രാത്രിയിലായിരുന്നു സംഭവമുണ്ടായത്. മാവൂര്‍ കോട്ടക്കുന്നുമ്മല്‍ സുബ്രഹ്‌മണ്യനെയാണ് വീട്ടില്‍ കയറി പ്രതി മര്‍ദ്ദിച്ചത്. ഷിബിൻ ലാലുവിന്റെ അമ്മയുടെ സഹോദരനാണ് സുബ്രഹ്‌മണ്യന്‍. ഷിബിൻ ലാലു വീട്ടില്‍ സ്ഥിരമായി വൈകി വരുന്നതിനെ അമ്മാവൻ ചോദ്യം ചെയ്തിരുന്നു. തുടർന്ന് ഉണ്ടായ വാക്കുതര്‍ക്കത്തിൽ ഷിബിൻ ഇരുമ്പുവടി കൊണ്ട് സുബ്രഹ്‌മണ്യന്റെ കൈയ്യും കാലും അടിച്ചൊടിക്കുകയായിരുന്നു എന്നാണ് പോലീസ് വിശദമാക്കുന്നത്.
ഇയാള്‍ നിരവധി കേസുകളില്‍ പ്രതിയാണെന്നാണ് പോലീസ് വിശദമാക്കുന്നു. മയക്കു മരുന്ന് ഉപയോഗം, അടിപിടി, വധശ്രമം, പൊതുജനത്തിന് ശല്യമുണ്ടാക്കല്‍, പോലീസ് കസ്റ്റഡിയില്‍ നിന്ന് രക്ഷപ്പെടല്‍ എന്നിങ്ങനെ നിരവധി കേസുകളിലായി വിവിധ സ്റ്റേഷനുകളിൽ ഇയാൾക്കെതിരെ കേസുകളുണ്ട്. മാവൂര്‍ എസ്‌ഐ രമേശ് ബാബു, എസ്‌സിപിഒ മാരായ റഷീദ്, ഷിനോജ് എന്നിവര്‍ ചേര്‍ന്നാണ് ഷിബിനെ പിടികൂടിയത്. കോടതിയില്‍ ഹാജരാക്കിയ ഇയാളെ 14 ദിവസത്തേക്ക് റിമാന്റ് ചെയ്തു.