കനഗോലുവിന്റെ സര്വ്വേഫലത്തില് എംപിമാരില്ല; സുധാകരനും അടൂര് പ്രകാശും മത്സരിക്കുമോ? തര്ക്കമില്ലാത്ത 30 സീറ്റുകളില് സ്ഥാനാര്ഥികളായി; സിറ്റിങ് സീറ്റുകളില് പരീക്ഷണത്തിനില്ല; മുരളീധരനും പ്രതാപനും ബല്റാമും ആദ്യപട്ടികയില്; തിരഞ്ഞെടുപ്പ് കാഹളം മുഴങ്ങും മുമ്പേ സ്ഥാനാര്ഥിപ്പട്ടിക ഇറക്കി ഞെട്ടിക്കാന് കോണ്ഗ്രസ്
തിരഞ്ഞെടുപ്പ് കാഹളം മുഴങ്ങും മുമ്പേ സ്ഥാനാര്ഥിപ്പട്ടിക ഇറക്കി ഞെട്ടിക്കാന് കോണ്ഗ്രസ്
തിരുവനന്തപുരം: 2026 നിയമസഭാ തിരഞ്ഞെടുപ്പിനുള്ള ആദ്യഘട്ട സ്ഥാനാര്ഥി നിര്ണ്ണയം പൂര്ത്തിയാക്കി കോണ്ഗ്രസ് തിരഞ്ഞെടുപ്പ് ഗോദയിലേക്ക്. വട്ടിയൂര്ക്കാവ്, തൃത്താല, മണലൂര് തുടങ്ങി നിര്ണ്ണായക മണ്ഡലങ്ങളിലുള്പ്പെടെ 30 സീറ്റുകളിലെ സ്ഥാനാര്ഥികളെ സംബന്ധിച്ച ഏകദേശ ധാരണയായിക്കഴിഞ്ഞു.
മുരളീധരനും ബല്റാമും പ്രതാപനും കളത്തില്
നിയമസഭാ തിരഞ്ഞെടുപ്പിന്റെ കാഹളം മുഴങ്ങുന്നതിന് മുന്പേ സ്ഥാനാര്ഥികളെ പ്രഖ്യാപിച്ച് മേല്ക്കൈ നേടാനാണ് കോണ്ഗ്രസ് ലക്ഷ്യമിടുന്നത്. തര്ക്കമില്ലാത്ത സീറ്റുകളിലെ സ്ഥാനാര്ഥികളെ ഉള്പ്പെടുത്തിക്കൊണ്ടുള്ള ആദ്യഘട്ട പട്ടിക ഫെബ്രുവരി 25-ന് മുന്പ് പുറത്തിറക്കാനാണ് നേതൃത്വം നീക്കം നടത്തുന്നത്. സിറ്റിങ് സീറ്റുകള് നിലനിര്ത്തുന്നതിനൊപ്പം കഴിഞ്ഞ തവണ നഷ്ടമായ പ്രധാന മണ്ഡലങ്ങള് തിരിച്ചുപിടിക്കുക എന്ന ലക്ഷ്യത്തോടെയാണ് നീക്കം.
വട്ടിയൂര്ക്കാവിലും തൃത്താലയിലും പോരാട്ടം മുറുകും
തിരുവനന്തപുരത്തെ നിര്ണ്ണായക സീറ്റായ വട്ടിയൂര്ക്കാവില് കെ. മുരളീധരന് തന്നെ മത്സരരംഗത്തിറങ്ങും. കഴിഞ്ഞ തവണ അപ്രതീക്ഷിതമായി നഷ്ടമായ മണ്ഡലം മുരളീധരനിലൂടെ തിരിച്ചുപിടിക്കാമെന്നാണ് കോണ്ഗ്രസ് കണക്കുകൂട്ടല്. പാലക്കാട് ജില്ലയിലെ ശ്രദ്ധാകേന്ദ്രമായ തൃത്താലയില് വി.ടി. ബല്റാം തന്നെ വീണ്ടും ജനവിധി തേടും. തൃശ്ശൂരിലെ മണലൂരില് ടി.എന്. പ്രതാപന്റെ പേരും ഉറപ്പിച്ചു കഴിഞ്ഞു. ഇവര്ക്ക് സ്ഥാനാര്ഥിത്വം സംബന്ധിച്ച അനൗദ്യോഗിക നിര്ദ്ദേശം ലഭിച്ചതായാണ് വിവരം.
രണ്ടാം ഘട്ടം മാര്ച്ചിന് ശേഷം; സുനില് കനഗോലു സര്വേ നിര്ണ്ണായകം
പുതുയുഗ യാത്ര പൂര്ത്തിയായ ശേഷം, മാര്ച്ച് ആറിനാകും രണ്ടാംഘട്ട പട്ടിക പുറത്തിറക്കുക. തിരഞ്ഞെടുപ്പ് തന്ത്രജ്ഞന് സുനില് കനഗോലുവിന്റെ ടീം നടത്തിയ വിശദമായ സര്വേ ഫലത്തിന്റെ അടിസ്ഥാനത്തിലാണ് സ്ഥാനാര്ഥി നിര്ണ്ണയം നടക്കുന്നത്. വിജയസാധ്യതയ്ക്ക് മാത്രം മുന്ഗണന നല്കുന്ന രീതിയാണ് ഇത്തവണ ഹൈക്കമാന്ഡ് സ്വീകരിച്ചിരിക്കുന്നത്. എം.പിമാരെ നിയമസഭയിലേക്ക് മത്സരിപ്പിക്കുന്ന കാര്യത്തില് കേന്ദ്ര നേതൃത്വമാകും അന്തിമ തീരുമാനമെടുക്കുക.
എം.പിമാരുടെ കാര്യത്തില് അനിശ്ചിതത്വം; പരീക്ഷണത്തിന് മുതിരാതെ നേതൃത്വം
കെ. സുധാകരനും അടൂര് പ്രകാശും നിയമസഭയിലേക്ക് മത്സരിക്കാന് താല്പ്പര്യം പ്രകടിപ്പിച്ചിട്ടുണ്ടെങ്കിലും എം.പിമാര് രാജിവെച്ച് തിരഞ്ഞെടുപ്പിനെ നേരിടുമ്പോള് അത് ലോക്സഭാ സീറ്റുകളെ ബാധിക്കുമോ എന്ന ആശങ്ക നേതൃത്വത്തിനുണ്ട്. പ്രത്യേകിച്ച് അടൂര് പ്രകാശ് കോന്നിയിലേക്ക് മാറിയാല് ആറ്റിങ്ങല് ലോക്സഭാ സീറ്റില് ഉപതിരഞ്ഞെടുപ്പ് വരുമെന്നത് വെല്ലുവിളിയാണ്. അതിനാല് ഇക്കാര്യത്തില് അതീവ ജാഗ്രതയോടെയാകും ഹൈക്കമാന്ഡ് തീരുമാനം പ്രഖ്യാപിക്കുക. സംവരണ, വനിതാ മണ്ഡലങ്ങളിലും ആദ്യഘട്ടത്തില് തന്നെ സ്ഥാനാര്ഥികളെ നിശ്ചയിക്കാനുള്ള ശ്രമം തുടരുകയാണ്.