സിവില് സര്വീസ് കോച്ചിംഗിലും സര്ക്കാര് ചെലവില് മതപരമായ സംവരണം; പഠിക്കാന് പോലുമാകാതെ മറ്റ് കുട്ടികള് പുറത്ത്; പൊന്നാനിയില് 50%, കല്ല്യാശ്ശേരിയില് 51%; സംവരണ പരിധി കാറ്റില് പറത്തി പിണറായി സര്ക്കാര്; സിവില് സര്വീസ് അക്കാദമിക്കെതിരെ സംവരണം ചോദ്യം ചെയ്ത് ഡിഎസ്ജെപി ഹൈക്കോടതിയില്
സിവില് സര്വീസ് കോച്ചിംഗിലും സര്ക്കാര് ചെലവില് മതപരമായ സംവരണം
കൊച്ചി: സംസ്ഥാന സര്ക്കാര് സ്ഥാപനമായ സെന്റര് ഫോര് കണ്ടിന്യൂയിങ് എഡ്യൂക്കേഷന് കേരളയുടെ (CCEK) കീഴിലുള്ള സിവില് സര്വീസ് അക്കാദമികളിലെ പ്രവേശനത്തില് മതപരമായ സംവരണം ഏര്പ്പെടുത്തിയതിനെതിരെ ഹൈക്കോടതിയില് പൊതുതാല്പ്പര്യ ഹര്ജി. ഇന്സ്റ്റിറ്റ്യൂട്ട് ഫോര് കരിയര് സ്റ്റഡീസ് ആന്ഡ് റിസര്ച്ചിന്റെ (ICSR) പൊന്നാനി സെന്ററില് മുസ്ലിം വിഭാഗത്തിന് മാത്രം 50 ശതമാനം സീറ്റുകള് സംവരണം ചെയ്ത നടപടിയാണ് കോടതിയില് ചോദ്യം ചെയ്യപ്പെട്ടത്.
ഡെമോക്രാറ്റിക് സോഷ്യല് ജസ്റ്റിസ് പാര്ട്ടി (DSJP) നല്കിയ ഹര്ജിയില് ഹൈക്കോടതി ഭേദഗതികള് അനുവദിക്കുകയും കേസ് നടപടികളുമായി മുന്നോട്ട് പോകാന് തീരുമാനിക്കുകയും ചെയ്തു.
ഹര്ജിയിലെ പ്രധാന ആരോപണങ്ങള്:
മതപരമായ സംവരണം
പൊന്നാനിയിലെ ഐസിഎസ്ആര് സെന്ററില് മുസ്ലിം ന്യൂനപക്ഷ വിഭാഗത്തിന് 50% സീറ്റുകള് മാറ്റിവെച്ചിരിക്കുന്നത് ഭരണഘടനാ വിരുദ്ധമാണെന്ന് ഹര്ജിയില് പറയുന്നു. മതത്തിന്റെ മാത്രം അടിസ്ഥാനത്തില് ഇത്തരമൊരു സംവരണം നല്കുന്നത് ഭരണഘടനയുടെ 14, 15, 16 അനുച്ഛേദങ്ങളുടെ ലംഘനമാണെന്നാണ് ഹര്ജിക്കാരുടെ വാദം.
പരിധി ലംഘിച്ചുള്ള സംവരണം
പൊന്നാനി സെന്ററില് മുസ്ലിം വിഭാഗത്തിനുള്ള 50 ശതമാനത്തിന് പുറമെ എസ്സി/എസ്ടി വിഭാഗങ്ങള്ക്ക് അധികമായി 10 ശതമാനം സംവരണം കൂടി നല്കുന്നുണ്ട്. ഇത് സുപ്രീം കോടതി നിശ്ചയിച്ചിട്ടുള്ള സംവരണ പരിധികളെ ലംഘിക്കുന്നതാണെന്ന് ഡിഎസ്ജെപി ആരോപിക്കുന്നു.
മറ്റ് സെന്ററുകളിലെ വിവേചനം
കാസര്കോട് കല്ല്യാശ്ശേരി സെന്ററില് എസ്സി/എസ്ടി വിഭാഗങ്ങള്ക്ക് 51% സംവരണം നല്കുന്നതായും ഹര്ജിയില് ചൂണ്ടിക്കാട്ടുന്നു. 2022-23 അക്കാദമിക് വര്ഷം മുതല് നിലനില്ക്കുന്ന ഈ വിവേചനം 2026-27 വര്ഷത്തെ വിജ്ഞാപനത്തിലും തുടരുകയാണെന്ന് ഹര്ജിക്കാര് കോടതിയെ ബോധിപ്പിച്ചു.
ജസ്റ്റിസ് സൗമന് സെന്, ജസ്റ്റിസ് ശ്യാം കുമാര് വി.എം എന്നിവരടങ്ങിയ ഡിവിഷന് ബെഞ്ചാണ് കേസ് പരിഗണിച്ചത്. ഹര്ജിയിലെ ആവശ്യങ്ങള് കൂടുതല് വ്യക്തമാക്കിക്കൊണ്ട് പുതിയ വിജ്ഞാപനങ്ങള് കൂടി ഉള്പ്പെടുത്തി ഹര്ജി ഭേദഗതി ചെയ്യാന് കോടതി അനുമതി നല്കി. ഏപ്രില് 10-നകം ആവശ്യമായ ഭേദഗതികള് വരുത്താന് കോടതി രജിസ്ട്രിക്ക് നിര്ദ്ദേശം നല്കിയിട്ടുണ്ട്.
സര്ക്കാര് ഫണ്ട് ഉപയോഗിച്ച് പ്രവര്ത്തിക്കുന്ന സിവില് സര്വീസ് അക്കാദമിയില് ഒരു പ്രത്യേക മതവിഭാഗത്തിന് മാത്രം പകുതിയോളം സീറ്റുകള് സംവരണം ചെയ്യുന്നത് അന്യായമാണെന്നും, ഇത് അര്ഹരായ മറ്റ് വിദ്യാര്ത്ഥികളുടെ അവസരങ്ങള് നിഷേധിക്കലാണെന്നും ഡിഎസ്ജെപി പ്രസിഡന്റ് കെ.എസ്.ആര് മേനോന് സത്യവാങ്മൂലത്തില് വ്യക്തമാക്കി.
സിവില് സര്വീസ് പോലുള്ള ഉന്നത മത്സര പരീക്ഷകള്ക്കുള്ള പരിശീലന കേന്ദ്രങ്ങളില് ഇത്തരം മതപരമായ വേര്തിരിവുകള് പാടില്ലെന്ന ആവശ്യം വരും ദിവസങ്ങളില് വലിയ രാഷ്ട്രീയ-സാമൂഹിക ചര്ച്ചകള്ക്ക് വഴിവെച്ചേക്കാം. സംസ്ഥാന സര്ക്കാരും കേരള സ്റ്റേറ്റ് സിവില് സര്വീസ് അക്കാദമിയുമാണ് എതിര്കക്ഷികള്.