പ്രവാസ ജീവിതം തുടങ്ങിയിട്ട് പത്ത് വര്ഷത്തിലേറെയായി; എഴുത്തുകാരിയും സാംസ്കാരിക പ്രവര്ത്തകയുമെന്ന നിലയില് പ്രവാസി മലയാളികള്ക്കിടയിയില് സജീവം; അബുദാബിയിലെ വനിതാ ഡോക്ടര് ധനലക്ഷ്മിയുടെ അപ്രതീക്ഷിത വേര്പാടിന്റെ ഞെട്ടലില് സുഹൃത്തുക്കുകളും സഹപ്രവര്ത്തകരും; അനുശോചിച്ച് അബുദാബി പ്രവാസികള്
പ്രവാസ ജീവിതം തുടങ്ങിയിട്ട് പത്ത് വര്ഷത്തിലേറെയായി
കണ്ണൂര്: അബുദാബിയില് മലയാളി ഡോക്ടര് അരയക്കണ്ടി ധനലക്ഷ്മി(54)യെ മരിച്ച നിലയില് കണ്ടെത്തിയ സംഭവത്തിന്റെ ഞെട്ടലിലാണ് പ്രവാസ ലോകം. തീര്ത്തും അപ്രതീക്ഷിതമായിരുന്നു അവരകുടെ വിയോഗം. അബുബാദിയിലെ മലയാളികളുടെ സാംസ്ക്കാരിക പരിപാടികളില് നിറസാന്നിധ്യമായിരുന്നു അവര്. എഴുത്തുകാരിയെന്ന നിലയില് കൂടി അബുദാബിയിലെ സാംസ്ക്കാരിക മേഖലയില് അവര് സജീവമായിരുന്നു.
മുസഫയിലെ താമസസ്ഥലത്ത് തിങ്കളാഴ്ച രാത്രിയായിരുന്നു മൃതദേഹം കണ്ടെത്തിയത്. കഴിഞ്ഞ രണ്ടു ദിവസമായി ഫോണില് വിളിച്ചുകിട്ടാത്തതിനെ തുടര്ന്ന് സുഹൃത്തുക്കള് താമസ സ്ഥലത്ത് എത്തി അന്വേഷിച്ചപ്പോഴാണ് മരിച്ച വിവരം വിവരമറിയുന്നത്. മരണ കാരണം എന്താണെന്ന് വ്യക്തമായിട്ടില്ല. അബുദാബി ലൈഫ് കെയര് ആശുപത്രിയിലെ ദന്ത ഡോക്ടറായിരുന്നു.
10 വര്ഷത്തിലേറെയായി പ്രവാസിയാണ്. അബുദാബി മലയാളി സമാജം അംഗവും സാംസ്കാരിക പ്രവര്ത്തകയും എഴുത്തുകാരിയുമാണ്. സാമൂഹിക മാധ്യമങ്ങളിലും സജീവമായിരുന്ന ഡോക്ടര് കണ്ണൂര് ധനലക്ഷ്മി ആശുപത്രിയിലും സേവനമനുഷ്ഠിച്ചിരുന്നു. ഡോ. ധനലക്ഷ്മിയുടെ വിയോഗത്തിന്റെ ഞെട്ടലിലാണ് സഹപ്രവര്ത്തകരും സുഹൃത്തുക്കളും. ഡോക്ടറുടെ വിയോഗത്തില് ആശുപത്രി അധികൃതരും അനുശോചനം രേഖപ്പെടുത്തി.
വിയോഗം ഡോക്ടറെ അറിയുകയും സ്നേഹിക്കുകയും ചെയ്യുന്നവരുടെ ജീവിതത്തില് വലിയൊരു ശൂന്യതയാണ് സൃഷ്ടിച്ചിരിക്കുന്നത്. ഒരു സഹപ്രവര്ത്തക എന്നതിലുപരി, ഞങ്ങളുടെ മെഡിക്കല് സംഘത്തിലെ വിലമതിക്കപ്പെട്ട അംഗം കൂടിയായിരുന്നു ഡോ. ധനലക്ഷ്മി, എന്ന് ലൈഫ്കെയര് ഹോസ്പിറ്റല് മുസഫ അനുശോചനക്കുറിപ്പില് അറിയിച്ചു.
ഊഷ്മളതയും അനുകമ്പയും നിറഞ്ഞ ഇടപെടലുകള് കൊണ്ട് രോഗികളുടെ മനസ്സില് അവിസ്മരണീയ സ്ഥാനം നേടിയെടുത്ത ഡോ. ധനലക്ഷ്മിയുടെ സംഭാവനകള് ക്ലിനിക്കിന്റെ അതിരുകള്ക്കപ്പുറം നിരവധി ജീവിതങ്ങളെയാണ് സ്വാധീനിച്ചത്. ബോധവല്കരണ പരിപാടികളിലൂടെ ദന്താരോഗ്യം മെച്ചപ്പെടുത്തുന്നതിനായി പ്രയത്നിച്ച ഡോ. ധനലക്ഷ്മി, സമൂഹത്തില് ആരോഗ്യവും ക്ഷേമവും പ്രോത്സാഹിപ്പിക്കേണ്ടതിന്റെ ആവശ്യകതയെക്കുറിച്ച് നിരന്തരം സംസാരിക്കുകയും ചെയ്തു. അബുദാബിയിലെ സാമൂഹിക, സാംസ്കാരിക രംഗത്തെ സജീവ സാന്നിധ്യമായിരുന്നു ഡോക്ടര്.
മികവുറ്റ എഴുത്തുകാരിയും, വാഗ്മിയും കൂടിയായിരുന്ന ഡോ. ധനലക്ഷ്മിയുടെ വിയോഗം നികത്താനാകാത്ത വിടവാണ് അവശേഷിപ്പിക്കുന്നത്. എങ്കിലും, ഡോക്ടര് സ്പര്ശിച്ച നിരവധി ജീവിതങ്ങളിലൂടെ അവരുടെ ഓര്മകള് ഇനിയും ജീവിക്കും. ദുഃഖകരമായ ഈ വേളയില്, ഡോക്ടറുടെ കുടുംബത്തോടും പ്രിയപ്പെട്ടവരോടും അനുശോചനവും പ്രാര്ഥനയും അറിയിക്കുന്നതായി ലൈഫ്കെയര് ഹോസ്പിറ്റല് മുസഫ അനുശോചനക്കുറിപ്പില് അറിയിച്ചു.
കണ്ണൂരിലെ ആനന്ദകൃഷ്ണ ബസ് സര്വീസ് ഉടമ പരേതനായ നാരായണന്റെയും ചന്ദ്രമതിയുടെയും മകളാണ്. ഭര്ത്താവ് സുജിത്ത് നാട്ടിലാണ്. സഹോദരങ്ങള്: ആനന്ദകൃഷ്ണന്, ശിവറാം, ഡോ.സീതാലക്ഷ്മി. ഭൗതിക ശരീരം നിയമനടപടികള്ക്കു ശേഷം നാട്ടിലേക്ക് കൊണ്ടുവരും. സംസ്കാരം പിന്നീട് നടക്കും.