രാജ്യത്തെ ഏറ്റവും സമ്പന്നനായ എംഎല്‍എ ബിജെപിയുടെ പരാഗ് ഷാ; ആസ്തി 3400 കോടി; രണ്ടാമന്‍ കര്‍ണാടക ഉപമുഖ്യമന്ത്രി ഡി.കെ ശിവകുമാര്‍; 1413 കോടി; പശ്ചിമബംഗാളിലെ ബിജെപി എംഎല്‍എ ദരിദ്രനായ നിയമസഭാംഗം
രാജ്യത്തെ ഏറ്റവും സമ്പന്നനായ എംഎല്‍എ ബിജെപിയുടെ പരാഗ് ഷാ
ന്യൂഡല്‍ഹി: ഇന്ത്യയിലെ ഏറ്റവും സമ്പന്നനായ എംഎല്‍എ ബിജെപിയുടെ പരാഗ് ഷായെന്ന് റിപ്പോര്‍ട്ടുകള്‍. മുംബൈ ഘട്‌കോപാര്‍ ഈസ്റ്റ് എംഎല്‍എയായ പരാഗ് ഷായുടെ ആസ്തി 3400 കോടിയാണെന്ന് അസോസിയേഷന്‍ ഓഫ് ഡെമോക്രാറ്റിക് റിഫോംസ് പുറത്തുവിട്ട കണക്കില്‍ പറയുന്നു. കര്‍ണാടക ഉപമുഖ്യമന്ത്രി ഡി.കെ ശിവകുമാറാണ് പട്ടികയില്‍ രണ്ടാമത്. 1413 കോടിയാണ് കനകപുര മണ്ഡലത്തെ പ്രതിനിധീകരിക്കുന്ന ഡി കെ ശിവകുമാറിന്റെ ആസ്തി. പശ്ചിമബംഗാളിലെ ഇന്ദുസ് മണ്ഡലത്തില്‍ നിന്നുള്ള ബിജെപി എംഎല്‍എയായ നിര്‍മല്‍ കുമാര്‍ ധാരയാണ് ഏറ്റവും ദരിദ്രനായ നിയമസഭാംഗം. തന്റെ കൈയില്‍ 1700 രൂപയാണ് ഉള്ളതെന്നാണ് ധാരയുടെ സത്യവാങ്മൂലത്തിലുള്ളത്. ഏറ്റവും സമ്പന്നരായ പത്ത് എംഎല്‍എമാരുടെ പട്ടികയില്‍ ആന്ധ്രാപ്രദേശില്‍ നിന്നുള്ള നാല് എംഎല്‍എമാരുണ്ട്.
നിയമസഭ തെരഞ്ഞെടുപ്പുകളില്‍ മത്സരിക്കാനായി എംഎല്‍എമാര്‍ സമര്‍പ്പിച്ച സത്യവാങ്മൂലങ്ങളെ അടിസ്ഥാനമാക്കിയാണ് എഡിആര്‍ റിപ്പോര്‍ട്ട് തയാറാക്കിയത്. 28 സംസ്ഥാനങ്ങളിലെയും മൂന്ന് കേന്ദ്രഭരണ പ്രദേശങ്ങളിലെയും 4092 സിറ്റിങ് എംഎല്‍എമാരെയാണ് എഡിആര്‍ പഠനവിധേയമാക്കിയത്. 24 എംഎല്‍എമാരുടെ സത്യവാങ്മൂലം വായിക്കാനാവില്ലെന്നും ഏഴ് സീറ്റുകള്‍ ഒഴിഞ്ഞുകിടക്കുകയാണെന്നും റിപ്പോര്‍ട്ടില്‍ പറയുന്നു.
കര്‍ണാടകയില്‍ നിന്നുള്ള സ്വതന്ത്ര എംഎല്‍എ കെ.എച്ച് പുട്ടസ്വാമി ഗൗഡ- 1267 കോടി, കര്‍ണാടകയിലെ കോണ്‍ഗ്രസ് എംഎല്‍എ പ്രിയാകൃഷ്ണ- 1156 കോടി, ആന്ധ്രാപ്രദേശ് മുഖ്യമന്ത്രി എന്‍ ചന്ദ്രബാബു നായിഡു (ടിഡിപി)- 931 കോടി, മുന്‍ ആന്ധ്രാ മുഖ്യമന്ത്രി വൈ.എസ് ജഗന്‍മോഹന്‍ റെഡ്ഡി (വൈഎസ്ആര്‍ കോണ്‍ഗ്രസ്)- 757 കോടി, ആന്ധ്രയിലെ ടിഡിപി എംഎല്‍എ പി നാരായണ- 824 കോടി, ആന്ധ്രയിലെ ടിഡിപി എംഎല്‍എ പി പ്രശാന്തി റെഡ്ഡി- 716 കോടി എന്നിങ്ങനെയാണ് സമ്പന്നരായ നിയമസഭാംങ്ങളുടെ പട്ടികയിലെ മുന്‍നിരക്കാര്‍.
ഏറ്റവും സമ്പന്നരായ 10 എംഎല്‍എമാരുടെ പട്ടികയില്‍ ആന്ധ്രാപ്രദേശില്‍ നിന്നുള്ള നാല് എംഎല്‍എമാരുണ്ട്. ഐടി മന്ത്രി നര ലോകേഷ്, ഹിന്ദുപൂര്‍ എംഎല്‍എ എന്‍. ബാലകൃഷ്ണ എന്നിവരുള്‍പ്പെടെ ഏഴ് എംഎല്‍എമാരും സംസ്ഥാനത്തെ ഏറ്റവും സമ്പന്നരായ 20 എംഎല്‍എമാരില്‍ ഉള്‍പ്പെടുന്നു.
എംഎല്‍എമാരുടെ ആകെ ആസ്തി സംസ്ഥാനങ്ങള്‍ തോറും വ്യത്യാസപ്പെട്ടിരിക്കുന്നു. കര്‍ണാടക എംഎല്‍എമാരുടെ (223 അംഗങ്ങള്‍) ആകെ ആസ്തി 14,179 കോടി രൂപയാണ്. ഇത് രാജ്യത്തെ ഏറ്റവും ഉയര്‍ന്ന നിരക്കാണ്. മഹാരാഷ്ട്ര എംഎല്‍എമാരുടെ (286 അംഗങ്ങള്‍) ആസ്തി 12,424 കോടി രൂപയും ആന്ധ്രാപ്രദേശ് എംഎല്‍എമാരുടെ (174 അംഗങ്ങള്‍) മൊത്തം ആസ്തി 11,323 കോടി രൂപയുമാണ്.
ഏറ്റവും കുറഞ്ഞ നിയമസഭാംഗ ആസ്തിയുള്ള സംസ്ഥാനങ്ങളില്‍ ത്രിപുരയാണ് മുന്നില്‍. ഇവിടുത്തെ എംഎല്‍എമാര്‍ക്ക് (60 അംഗങ്ങള്‍) ആകെ 90 കോടി രൂപയും മണിപ്പൂരിലെ എംഎല്‍എമാര്‍ക്ക് (59 അംഗങ്ങള്‍) 222 കോടി രൂപയും പുതുച്ചേരിയിലെ എംഎല്‍എമാര്‍ക്ക് (30 അംഗങ്ങള്‍) 297 കോടി രൂപയുമാണ് ആസ്തി.
ഒരു എംഎല്‍എയുടെ ശരാശരി ആസ്തി ഏറ്റവും ഉയര്‍ന്ന സംസ്ഥാനങ്ങള്‍ ഇവയാണ്- ആന്ധ്രാപ്രദേശ്- 65.07 കോടി, കര്‍ണാടക- 63.58 കോടി, മഹാരാഷ്ട്ര - 43.44 കോടി, ഒരു എംഎല്‍എയുടെ ശരാശരി ആസ്തി ഏറ്റവും കുറഞ്ഞ സംസ്ഥാനങ്ങള്‍ ത്രിപുര- 1.51 കോടി, പശ്ചിമ ബംഗാള്‍- 2.80 കോടി, കേരളം- 3.13 കോടി എന്നിവയാണ്.
4092 സിറ്റിങ് എംഎല്‍എമാരുടെ ആകെ ആസ്തി 73,348 കോടിയാണ്. 2023-24ലെ നാഗാലാന്‍ഡ് (23,086 കോടി രൂപ), ത്രിപുര (26,892 കോടി രൂപ), മേഘാലയ (22,022 കോടി രൂപ) എന്നീ സംസ്ഥാനങ്ങളുടെ മൊത്തം വാര്‍ഷിക ബജറ്റുകളുടെ ആകെ തുകയേക്കാള്‍ വരുമിത്.
പ്രധാന രാഷ്ട്രീയ പാര്‍ട്ടികളില്‍, ബിജെപി എംഎല്‍എമാര്‍ (1,653 അംഗങ്ങള്‍) കൈവശം വയ്ക്കുന്ന ആസ്തി 26,270 കോടി രൂപയാണെന്ന് റിപ്പോര്‍ട്ട് പറയുന്നു. കോണ്‍ഗ്രസ് എംഎല്‍എമാരുടെ (646 അംഗങ്ങള്‍) കൈയിലുള്ളത് 17,357 കോടി രൂപയാണ്. ടിഡിപി എംഎല്‍എമാരുടെ (134 അംഗങ്ങള്‍) മൊത്തം ആസ്തി 9,108 കോടി രൂപയും ശിവസേന എംഎല്‍എമാരുടെ (59 അംഗങ്ങള്‍) കൈയിലുള്ളത് 1,758 കോടി രൂപയുമാണ്. അതേസമയം, ആം ആദ്മി എംഎല്‍എമാരുടെ (123 അംഗങ്ങള്‍) ഓരോരുത്തരുടേയും കൈയിലുള്ളത് ശരാശരി 7.33 കോടി രൂപയാണെന്നും റിപ്പോര്‍ട്ട് വ്യക്തമാക്കുന്നു.