കാഞ്ഞിരപ്പള്ളിയിലെ പേരു കേട്ട കുടുംബം; 600 ഏക്കര്‍ സ്ഥലവും കോടാനുകോടിയുടെ സ്വത്തുക്കളും; അനുജനെയും അമ്മാവനെയും കൊന്നത് 15 സെന്റ് ഭൂമിയെ ചൊല്ലിയുള്ള തര്‍ക്കത്തില്‍; തോക്കുമായി എത്തി പോയിന്റ് ബ്ലാങ്കില്‍ വെടിയുതിര്‍ത്ത് കൊലപാതകം; കാഞ്ഞിരപ്പള്ളിയിലേത് ആര്‍ത്തി മൂത്ത് നടത്തിയ അരുംകൊല; ജോര്‍ജ്ജ് കുര്യന് ശിഷ്ടകാലം അഴിയെണ്ണാം
കോട്ടയം: കാഞ്ഞിരപ്പള്ളിയിലെ കരിമ്പനാല്‍ കുടുംബത്തില്‍ നടന്ന ഇരട്ടക്കൊലപാതകം വലിയ രാഷ്ട്രീയവും സാമൂഹിക ചര്‍ച്ചയും ഉണര്‍ത്തി. സ്വത്തുതര്‍ക്കവും ഭീഷണിയും തോക്കും കൊലപാതകവും നിറഞ്ഞ ഈ സംഭവവികാസങ്ങള്‍ക്ക് ഒടുവില്‍ പ്രതി പൂജപ്പുര ജയിലില്‍ എത്തി. സാമ്പത്തികവും പാരമ്പര്യമുള്ള കരിമ്പനാല്‍ കുടുംബത്തിനുള്ളില്‍ വന്‍ ഭൂസ്വത്തിനെ ചൊല്ലിയ തര്‍ക്കം സംഭവവികാസങ്ങള്‍ക്ക് ആക്കം കൂട്ടി. സ്വത്തുവകുപ്പ് സംബന്ധിച്ച് നടന്ന വഴക്കുകളും ഭീഷണിപ്പെടുത്തലുകളും ഒടുവില്‍ രഇരട്ടക്കൊലപാതകത്തിലേക്ക് വഴിമാറി.
കാഞ്ഞിരപ്പള്ളിയിലെ കരിമ്പനാല്‍ കുടുംബം, കോടികള്‍ വിലവരുന്ന സ്വത്തുക്കളുടമകളായ ഈ കുടുംബത്തിലെ സ്വത്തുതര്‍ക്കമാണ് ദുരന്തത്തിലേക്ക് നയിച്ചത്. പ്രതി ജോര്‍ജ് കുര്യന്, തന്റെ അനുജന്‍ രഞ്ജുവിനെയും അമ്മയുടെ സഹോദരനെയും വെടിവച്ചുകൊന്നത്, 15 സെന്റിന്റെ ഭൂമിയെ ചൊല്ലിയ തര്‍ക്കം രൂക്ഷമായതോടെയായിരുന്നു.
പ്രതിയുടെ പേരില്‍ മാത്രം 22 ഏക്കര്‍ ഭൂമി ഗവിക്ക് സമീപം ഉണ്ട്. കൂടാതെ, കുടുംബത്തിലുടനീളം 18 കോടിയിലേറെ സ്വത്തുക്കളും 8 കോടിയോളം ബാധ്യതകളും ഉണ്ടെന്ന് കേസ് വിസ്താരത്തില്‍ പ്രോസിക്യൂഷന്‍ കോടതിയെ അറിയിച്ചു. ഏരുമേലിയില്‍ 16 ഏക്കര്‍ റബ്ബര്‍ എസ്റ്റേറ്റ്, മറ്റു കുടുംബഭൂമികള്‍, കൂടാതെ കുടുംബവീടിനോട് ചേര്‍ന്ന 2 ഏക്കര്‍ 33 സെന്റ് സ്ഥലം എന്നിവയും ഇതില്‍ ഉള്‍പ്പെടുന്നു.
ജോര്‍ജ് കുര്യന്, കുടുംബവീട് സ്ഥിതിചെയ്യുന്ന 2 ഏക്കര്‍ 33 സെന്റ് സ്ഥലത്തിന്റെ എല്ലാ അവകാശവും അച്ഛനോട് ആവശ്യപ്പെട്ടു. വഴിയുള്‍പ്പെടെ 2 ഏക്കര്‍ 8 സെന്റ് നല്‍കുന്നതിന് കൊലപ്പെടുത്തിയ രഞ്ജു ഉള്‍പ്പെടെയുള്ളവര്‍ക്കും എതിര്‍പ്പുണ്ടായിരുന്നില്ല. എന്നാല്‍, രഞ്ജുവിന്റെ അറിവില്ലാതെ, ജോര്‍ജ് റജിസ്ട്രാറെ വീട്ടിലേക്ക് എത്തിച്ച് 2 ഏക്കര്‍ 33 സെന്റ് സ്ഥലത്തിന്റെ ആധാരം സ്വന്തമാക്കി.
ഈ ഭൂമിയില്‍ വില്ലകള്‍ പണിതു വില്‍ക്കാനായിരുന്നു പ്രതിയുടെ ഉദ്ദേശ്യം. എന്നാല്‍, സ്ഥലത്തിന്റെ അളവെടുപ്പിനിടെ, വീട് മുറ്റം വരെ വില്ലകള്‍ എത്തുമെന്ന് മനസ്സിലാക്കുകയായിരുന്നു രഞ്ജുവിന്റെ പ്രധാന എതിര്‍പ്പിന് കാരണം. വീടിനുമുമ്പ് കോളനിപോലെയാകുമെന്നും മറ്റൊരു സ്ഥലത്ത് 15 സെന്റ് നല്‍കാമെന്നും രഞ്ജു നിര്‍ദ്ദേശിച്ചെങ്കിലും, ഇത് ജോര്‍ജിന് സ്വീകരിക്കാനായില്ല. തര്‍ക്കം രൂക്ഷമായതോടെ, വിഷയം കൊലപാതകത്തിലേക്ക് വഴിമാറി. വെടിയുതിര്‍ത്ത്, തന്റെ സഹോദരനും അമ്മയുടെ സഹോദരനുമാണ് ജോര്‍ജ് കുര്യന് ജീവന്‍ കെടുത്തിയത്.
പ്രതി ജോര്‍ജ് കുര്യന്, ഏറ്റവുമൊടുവില്‍ തന്റെ അനുജന്‍ രഞ്ജുവിനെയും അമ്മാവന്‍ മാത്യു സ്‌കറിയയെയും വെടിവച്ചുകൊന്നത് അതീവ ക്രൂരതയോടെയായിരുന്നു. കൊലപാതകം നടത്താന്‍, പ്രതി കാഞ്ഞിരപ്പള്ളി പ്ലാന്റേഴ്‌സ് ക്ലബ്ബില്‍ നിന്നു നിറതോക്കും 50 വെടിക്കോപ്പുകളും കരുതിയിരുന്നു. രഞ്ജുവിനെ വീട്ടിലേക്ക് എത്തുന്നതുവരെ വഴിയില്‍ ഒളിച്ചിരുന്ന ജോര്‍ജ്, തന്റെ അനുജന്റെ വരവിനായി കാത്തിരുന്നു. രഞ്ജു എത്തിയെന്ന് ഉറപ്പായതോടെ, കാറുമായി മുറ്റത്തേക്ക് എത്തിയ പ്രതി, നിറതോക്ക് കൈയില്‍കൊണ്ട് നേരെ മുറിയിലേക്ക് കയറി.
ആദ്യം അമ്മാവന്‍ മാത്യു സ്‌കറിയയെ ആദ്യം നെഞ്ചില്‍ വെടിവച്ചു വീഴ്ത്തി. പിന്നീട് 'പോയിന്റ് ബ്ലാങ്ക്' ദൂരത്തില്‍ നെറ്റിയിലേക്ക് വെടിവച്ച് അമ്മാവന്റെ മരണം ഉറപ്പാക്കി. രഞ്ജു വെടിയേറ്റ് രക്ഷപ്പെടാന്‍ ശ്രമിക്കുമ്പോള്‍, പിന്നില്‍നിന്ന് വെടിവെച്ച് മരിച്ചെന്നുറപ്പാക്കി. വെടിവെപ്പിനു ശേഷം, ജോര്‍ജ് വീടിന് പുറത്തേക്ക് കടന്നു തൊഴിലാളികളെ തോക്കു ചൂണ്ടി ഭീഷണിപ്പെടുത്തി അവരെ ഓടിച്ചു വിടുകയായിരുന്നു.
സംഭവത്തിന് മുന്‍പ് 'നാളെ പത്രങ്ങളിലെ തലക്കെട്ടാകുന്ന സംഭവം ഉണ്ടാകും,' എന്ന് സഹോദരിയോട് പറഞ്ഞുകൊണ്ട് പ്രതി തന്റെ ക്രൂരകൃത്യത്തിന് സൂചന നല്‍കിയിരുന്നു. കാഞ്ഞിരപ്പള്ളി പോലീസ് ഇന്‍സ്‌പെക്ടര്‍ റിജോ പി. ജോസഫിന്റെ നേതൃത്വത്തിലുള്ള അന്വേഷണ സംഘമാണ്, കൊലപാതകത്തിന്റെ പൂര്‍വ്വാലോചനയും നടപ്പിലാക്കലും തെളിവുകള്‍ വഴി കോടതി മുമ്പില്‍ തെളിയിച്ചത്.