ഡോ. മിനി കാപ്പനെ രജിസ്ട്രാറായി നിയമിച്ച് കേരള സര്‍വകലാശാല വൈസ് ചാന്‍സലര്‍; താല്‍ക്കാലിക രജിസ്ട്രാര്‍ പി. ഹരികുമാറിന് പകരം ചുമതല നല്‍കി; കെ.എസ്. അനില്‍ കുമാര്‍ ഓഫീസിലെത്തിയാല്‍ തടയാനും സെക്യൂരിറ്റി ഓഫീസര്‍ക്ക് നിര്‍ദേശം നല്‍കി മോഹന്‍ കുന്നുമ്മല്‍
ഡോ. മിനി കാപ്പനെ രജിസ്ട്രാറായി നിയമിച്ച് കേരള സര്‍വകലാശാല വൈസ് ചാന്‍സലര്‍;
തിരുവനന്തപുരം: കേരള സര്‍വകലാശാലയിലെ സസ്പെന്ഷന് വിവാദം മുറുകുന്നു. ഡോ. മോഹനന്‍ കുന്നുമ്മല്‍ തിരികെയെത്തി വിസിയുടെ സ്ഥാനം ഏറ്റെടുത്തതോടെ രജിസ്ട്രാര്‍ക്കെതിരെ തുടര്‍നടപടികളിലേക്ക് കടുന്നു. ഡോ. മിനി കാപ്പനെ രജിസ്ട്രാറായി നിയമിച്ച് വൈസ് ചാന്‍സലര്‍ ഡോ. മോഹനന്‍ കുന്നുമ്മല്‍ ഉത്തരവിറക്കി. താല്‍ക്കാലിക രജിസ്ട്രാര്‍ പി. ഹരികുമാറിന് പകരമായാണ് ചുമതല നല്‍കിയത്.
അതേസമയം, രജിസ്ട്രാര്‍ കെ.എസ്. അനില്‍ കുമാര്‍ ഓഫീസിലെത്തിയാല്‍ തടയാനും വൈസ് ചാന്‍സലര്‍ സര്‍വകലാശാല സെക്യൂരിറ്റി ഓഫീസര്‍ക്ക് നിര്‍ദേശം നല്‍കി. രജിസ്ട്രാറുടെ റൂമിന് പ്രത്യേക സംരക്ഷണം നല്‍കണമെന്നാണ് നിര്‍ദേശിച്ചിരിക്കുന്നത്. അനധികൃതമായി ആരെയും റൂമിനുള്ളില്‍ പ്രവേശിക്കാന്‍ അനുവദിക്കരുതെന്നും കര്‍ശനമായ ജാഗ്രത വിഷയത്തില്‍ ഉണ്ടായിരിക്കണമെന്നും ഉത്തരവില്‍ പറയുന്നു. നിലവില്‍ കനത്ത സുരക്ഷയിലാണ് സര്‍വകലാശാല ആസ്ഥാനം.
താനാണ് ഇപ്പോഴും രജിസ്ട്രാര്‍ എന്നതാണ് അനില്‍കുമാര്‍ അവകാശപ്പെടുന്നത്. അദ്ദേഹം അവധി അപേക്ഷ നല്‍കിയതും ഈ വാദത്തോടെയാണ്. എന്നാല്‍, വിസി ഈ നീക്കം തള്ളുകയാണ് ഉണ്ടാത്. അതേസമയം, കേരള സര്‍വകലാശാല സസ്പെന്ഷന് വിവാദത്തില്‍ പ്രതിഷേധം കടുപ്പിക്കുകയാണ് ഇടത് യുവജന സംഘടനകള്‍. എസ്എഫ്‌ഐ ഇന്ന് സംസ്ഥാന വ്യാപകമായി പഠിപ്പ് മുടക്കും. ഇന്ന് സര്‍വകലാശാല ആസ്ഥാനത്തേക്ക് ഡിവൈഎഫ്ഐയും എഐഎസ്എഫും മാര്‍ച്ച് നടത്തും.
ഇന്ന് തിരുവനന്തപുരത്ത് ഗവര്‍ണറും വിദ്യാഭ്യാസ മന്ത്രിയും വിസിയും ഒരുമിച്ച് പങ്കെടുക്കുന്ന പരിപാടിയുമുണ്ട്. അതേസമയം രജിസ്ട്രാര്‍ കെ.എസ്. അനില്‍ കുമാര്‍ ഇന്ന് സര്‍വകലാശാലയില്‍ എത്തുമെന്നാണ് വിവരം. ഇന്നലെ അവധി അപേക്ഷ നല്‍കിയത് ഒരു ദിവസത്തേക്ക് മാത്രമാണെന്ന് രജിസ്ട്രാര്‍ അറിയിച്ചു.
കഴിഞ്ഞ ദിവസം രജിസ്ട്രാര്‍ കെ.എസ്. അനില്‍ കുമാര്‍ സര്‍വകലാശാല ആസ്ഥാനത്ത് പ്രവേശിക്കുന്നത് വിലക്കി വൈസ് ചാന്‍സലര്‍ ആയിരുന്ന സിസ തോമസ് കെ.എസ്. അനില്‍ കുമാറിന് നോട്ടീസ് നല്‍കിയിരുന്നു. സസ്പെന്ഷന് നിലനില്‍ക്കെ അനില്‍ കുമാറിന്റെ നടപടികള്‍ ചട്ടവിരുദ്ധമെന്ന് നോട്ടീസില്‍ പറയുന്നു.
അനില്‍ കുമാറിനെ അച്ചടക്ക നടപടികള്‍ക്ക് വിധേയനാക്കുമെന്നും വിസിയുടെ നോട്ടീസില്‍ പറയുന്നുണ്ട്. സസ്പെന്ഷന് പിന്‍വലിച്ച സിന്‍ഡിക്കേറ്റ് നടപടിയില്‍ എതിര്‍പ്പുണ്ടെങ്കില്‍ നിയമന അതോറിറ്റിയെ സമീപിക്കാമെന്ന കോടതി ഉത്തരവിന്റെ അടിസ്ഥാനത്തിലാണ് നോട്ടീസ്.