ഇലക്ട്രിക് വാഹന കയറ്റുമതി രംഗത്തേക്ക് ചുവട് വെച്ച് മാരുതി സുസുക്കി; ഒറ്റ ചാർജ്ജിൽ സഞ്ചരിക്കുക 412 കിമി; ലക്ഷ്യമിടുന്നത് 100ലധികം രാജ്യങ്ങളിലേക്കുള്ള കയറ്റുമതി; ഇലക്ട്രിക് എസ്‌യുവിയായ 'ഇ വിറ്റാര' ഫ്ലാഗ് ഓഫ് ചെയ്യാൻ എത്തുന്നത് 'മോദിജീ'
ന്യൂഡൽഹി: ഇന്ത്യയുടെ ഇലക്ട്രിക് വാഹന കയറ്റുമതി രംഗത്ത് സുപ്രധാന ചുവടുവെപ്പായി മാരുതി സുസുക്കി. കമ്പനിയുടെ ആഗോള ഇലക്ട്രിക് വാഹനമായ (ബിഇവി) 'ഇ വിറ്റാര'യുടെ കയറ്റുമതിക്ക് ഓഗസ്റ്റ് 26-ന് തുടക്കമാകും. അഹമ്മദാബാദിലെ ഹൻസൽപൂരിലുള്ള സുസുക്കി മോട്ടോർ പ്ലാന്റിൽ നടക്കുന്ന ചടങ്ങിൽ പ്രധാനമന്ത്രി നരേന്ദ്ര മോദി പദ്ധതി ഫ്ലാഗ് ഓഫ് ചെയ്യും. വാഹനത്തിന്റെ അസംബ്ലി ലൈനിൽ നിന്ന് നേരിട്ടാണ് പ്രധാനമന്ത്രി മോഡൽ പുറത്തിറക്കുന്നത്.
പൂർണമായും ഇന്ത്യയിൽ നിർമിക്കുന്ന മാരുതി ഇ-വിറ്റാര ജപ്പാൻ ഉൾപ്പെടെ 100-ലധികം രാജ്യങ്ങളിലേക്ക് കയറ്റുമതി ചെയ്യും. ഹ്യുണ്ടായി ക്രെറ്റ ഇവി, എംജി ZS ഇവി, ടാറ്റ കർവ് ഇവി എന്നിവയുമായി മത്സരിക്കാൻ എത്തുന്ന മോഡലിന്റെ അവതരണ തീയതി മാത്രം കമ്പനി ഇതുവരെ വെളിപ്പെടുത്തിയിട്ടില്ല. യൂറോപ്പ്, ജപ്പാൻ തുടങ്ങിയ വികസിത വിപണികളിലേക്കുൾപ്പെടെ ഇ വിറ്റാര കയറ്റുമതി ചെയ്യും. ഇതോടൊപ്പം, ഗുജറാത്തിലെ ടിഡിഎസ് ലിഥിയം-അയൺ ബാറ്ററി പ്ലാന്റിൽ ഹൈബ്രിഡ് ബാറ്ററി ഇലക്ട്രോഡുകളുടെ പ്രാദേശിക ഉത്പാദനത്തിനും പ്രധാനമന്ത്രി തറക്കല്ലിടും.
തോഷിബ, ഡെൻസോ, സുസുക്കി എന്നിവയുടെ സംയുക്ത സംരംഭമായ ഈ പ്ലാന്റ് രാജ്യത്തെ ബാറ്ററി നിർമ്മാണ രംഗത്ത് വലിയ കുതിച്ചുചാട്ടത്തിന് വഴിയൊരുക്കും. ഇതോടെ ബാറ്ററിയുടെ 80 ശതമാനത്തിലധികം മൂല്യവും ഇന്ത്യയിൽ തന്നെ നിർമ്മിക്കാനാകും. ഇന്ത്യയുടെ വാഹന കയറ്റുമതിയിൽ വലിയ വർധനവുണ്ടായതായി പ്രധാനമന്ത്രി അടുത്തിടെ വ്യക്തമാക്കിയിരുന്നു. 100 രാജ്യങ്ങളിലേക്ക് ഇന്ത്യ ഇലക്ട്രിക് വാഹനങ്ങൾ കയറ്റുമതി ചെയ്യാൻ പോകുകയാണെന്നും അതിന്റെ പ്രധാന ചടങ്ങ് ഓഗസ്റ്റ് 26-ന് നടക്കുമെന്നും അദ്ദേഹം സൂചിപ്പിച്ചിരുന്നു. ഇന്ത്യയിലെ ഏറ്റവും വലിയ കാർ നിർമ്മാതാക്കളായ മാരുതി സുസുക്കി, രാജ്യത്തെ നാല് പ്ലാന്റുകളിലായി പ്രതിവർഷം 26 ലക്ഷം യൂണിറ്റുകൾ ഉത്പാദിപ്പിക്കുന്നുണ്ട്. 2025 സാമ്പത്തിക വർഷത്തിൽ 3.32 ലക്ഷത്തിലധികം യൂണിറ്റുകൾ കയറ്റുമതി ചെയ്യുകയും 19.01 ലക്ഷം യൂണിറ്റുകൾ ആഭ്യന്തര വിപണിയിൽ വിൽക്കുകയും ചെയ്തു.
ഹാർട്ടെക്റ്റ്-ഇ എന്ന പുതിയ ഇവി പ്ലാറ്റ്‌ഫോമിനെ അടിസ്ഥാനമാക്കിയാണ് മാരുതി സുസുക്കി ഇ-വിറ്റാര എത്തുന്നത്. മാരുതി ഇ-വിറ്റാര 18 ഇഞ്ച് അലോയ് വീലുകളിലാണ് സഞ്ചരിക്കുന്നത്, അതേസമയം ക്യാബിനിൽ എൽഇഡി പ്രൊജക്ടർ ഹെഡ്‌ലാമ്പുകൾ, 10-വേ പവർ അഡ്ജസ്റ്റ് ചെയ്യാവുന്ന ഡ്രൈവർ സീറ്റ്, സൺറൂഫ്, 10.1 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, സ്ലൈഡിംഗ് ആൻഡ് റീക്ലൈനിംഗ് പിൻ സീറ്റുകൾ, 7-എയർബാഗുകൾ, ലെവൽ 2 ADAS, 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, സുസുക്കി കണക്റ്റ് തുടങ്ങിയ ഏറ്റവും നൂതനവും പ്രീമിയം സവിശേഷതകളും സജ്ജീകരിച്ചിരിക്കുന്നു.
മാരുതി സുസുക്കി ഇ വിറ്റാര 49 kWh ഉം 61 kWh ഉം എന്നിങ്ങനെ രണ്ട് ബാറ്ററി ഓപ്ഷനുകളോടെയാണ് വരുന്നത്. ചെറിയ ബാറ്ററി 346 കിലോമീറ്റർ WLTP റേഞ്ച് നൽകുമെന്ന് പ്രതീക്ഷിക്കുന്നു, അതേസമയം വലിയ ബാറ്ററി പായ്ക്ക് അതിന്റെ സിംഗിൾ-മോട്ടോർ കോൺഫിഗറേഷനിൽ 428 കിലോമീറ്റർ റേഞ്ച് നൽകും. മറുവശത്ത്, 61 kWh ബാറ്ററി പായ്ക്ക് ഉപയോഗിക്കുന്ന ഡ്യുവൽ-മോട്ടോർ വേരിയന്റ് 412 കിലോമീറ്റർ റേഞ്ച് വാഗ്ദാനം ചെയ്യും.
2025 ജനുവരിയിൽ ന്യൂഡൽഹിയിൽ നടന്ന ഭാരത് മൊബിലിറ്റി ഗ്ലോബൽ എക്‌സ്‌പോയിലാണ് കമ്പനി ആദ്യമായി ഇ വിറ്റാര എസ്‌യുവി അവതരിപ്പിച്ചത്. ഈ സുപ്രധാന നീക്കത്തോടെ ഇലക്ട്രിക് വാഹന വിപണിയിലേക്കുള്ള മാരുതി സുസുക്കിയുടെ പ്രവേശനത്തിന് ഔദ്യോഗികമായി തുടക്കമാകും. പ്രധാനമന്ത്രി നേരിട്ട് ഒരു വാഹന നിർമ്മാണ യൂണിറ്റിൽ നിന്ന് പുതിയ മോഡൽ പുറത്തിറക്കുന്നത് കമ്പനിയുടെയും രാജ്യത്തെ വാഹന വ്യവസായത്തിന്റെയും മുന്നോട്ടുള്ള കുതിപ്പിന് ഊർജ്ജം പകരുമെന്ന് വിലയിരുത്തപ്പെടുന്നു. ഇവന്റുമായി ബന്ധപ്പെട്ട കൂടുതൽ വിവരങ്ങൾ കമ്പനി പുറത്തുവിട്ടിട്ടില്ല. വാഹനത്തിന്റെ സാങ്കേതിക വിവരങ്ങളോ വിലയോ സംബന്ധിച്ച ഔദ്യോഗിക പ്രഖ്യാപനങ്ങൾ ഫ്ലാഗ് ഓഫിന് ശേഷമുണ്ടാകുമെന്നാണ് പ്രതീക്ഷിക്കുന്നത്.