ആടിനെ കിണറ്റില്‍ വീഴാതിരിക്കാന്‍ രക്ഷിക്കാന്‍ നോക്കി; ആടും മുഹമ്മദും കിണറ്റിലേക്ക്; രണ്ടാള്‍പ്പൊക്കത്തില്‍ വെള്ളമുള്ള, 20 കോല്‍ താഴ്ചയുള്ള കിണര്‍; പിടികിട്ടിയത് മോട്ടര്‍ കെട്ടിയ ചെറിയ പ്ലാസ്റ്റിക് കയറില്‍; ഒരു രാത്രി മുഴുവന്‍ കിണറ്റില്‍; മുഹമ്മദ് തിരികെ ജീവിതത്തിലേക്ക്
ഇരിട്ടി (കണ്ണൂര്‍): ദുരന്തത്തിന് മുകളിലെ ധൈര്യത്തിന്റെ കഥ പറയുന്ന അനുഭവമാണ് മുഹമ്മദിന്റെ ജീവിതത്തില്‍ നിന്നുള്ളത്. രണ്ടാള്‍പ്പൊക്കത്തില്‍ വെള്ളമുള്ള, 20 കോല്‍ താഴ്ചയുള്ള കിണറ്റില്‍ വീണ വേലിക്കോത്ത് മുഹമ്മദിന്റെ (60) ഈ കഥ, മനുഷ്യധൈര്യത്തിന്റെയും അതിജീവനത്തിന്റെയും അതുല്യ ഉദാഹരണമായി മാറുന്നു. കിണറ്റില്‍ വീണ മുഹമ്മദ് ഒരു രാത്രി മുഴുവന്‍ താങ്ങി നിര്‍ത്തിയത് ആ കയറാണ്.
കണ്ണൂര്‍ ചാക്കാട്ടെ ആള്‍പാര്‍പ്പില്ലാത്ത 25 ഏക്കര്‍ വരുന്ന റബര്‍തോട്ടത്തില്‍ ആടുകളെ മേയ്ക്കാനെത്തിയതാണ് മുഹമ്മദ്. അഞ്ച് ആടുകളായാണ് മുഹമ്മദ് എത്തിയത്. ഇതില്‍ ഒരെണ്ണം വലിയ പൊക്കമില്ലാത്ത ആള്‍മറയില്‍ കയറി നിന്നു. ആ ആട് കിണറ്റില്‍ വീണാലോ എന്ന് കരുതി അതിനെ രക്ഷിക്കാനുള്ള ശ്രമത്തിനിടെ ആടും മുഹമ്മദും കിണറ്റില്‍ വീണു. വൈകിട്ടായിരുന്നു സംഭവം. സമയം കൃത്യമായി ഓര്‍ക്കുന്നില്ല എന്ന് മുഹമ്മദ് പറഞ്ഞു.
ചവിട്ടിനില്‍ക്കാന്‍ പടവുകള്‍ പോലുമില്ലാത്ത കിണറ്റില്‍ മോട്ടര്‍ കെട്ടിയിട്ട ചെറു പ്ലാസ്റ്റിക് കയറില്‍ പിടിത്തം കിട്ടിയത് രക്ഷയായി. ചവിട്ടിനില്‍ക്കാന്‍ ഭിത്തിയിലെ ഒരു കൊച്ചു കല്ലും. പിടിച്ചു കയറാന്‍ ശ്രമിച്ചാല്‍ പൊട്ടിവീഴുമെന്നുറപ്പ്. കഴുത്തൊപ്പം വെള്ളത്തില്‍ പുലര്‍ച്ചെ 4.30 വരെയാണ് മുഹമ്മദ് തണുപ്പിനോടും ഉറക്കത്തോടും പൊരുതി നിന്നത്. പുലര്‍ച്ചെ നാലോടെ റബര്‍ വെട്ടാനെത്തിയവരുടെ കയ്യിലെ ടോര്‍ച്ചിന്റെ പ്രകാശം കണ്ടതോടെ പ്രതീക്ഷയായി. അലറി വിളിച്ച് സഹായം അഭ്യര്‍ഥിച്ചു.
ടാപ്പിങ്ങിനെത്തിയ ഷാജുവും മുജീബും അഗ്‌നിരക്ഷാ സേനയെ വിവരം അറിയിച്ചു. ഇരിട്ടിയില്‍ നിന്നെത്തിയ അഗ്‌നിരക്ഷാ സേന നാലരയോടെ മുഹമ്മദിനെ കരയ്ക്കു കയറ്റി. മുഹമ്മദിനൊപ്പം കിണറ്റില്‍ വീണ ആട് ചത്തെങ്കിലും മറ്റുള്ള ആടുകള്‍ കിണറിനും ചുറ്റും നില്‍പ്പുണ്ടായിരുന്നു. ഒരു രാത്രി മുഴുവന്‍ മരണത്തോടു പടവെട്ടി തിരികെ എത്തിയ ആള്‍ക്കു പക്ഷേ, വിശ്രമിക്കാന്‍ സമയമില്ല. പശുവിനെ വാങ്ങാന്‍ ഒപ്പം പോകാമെന്നു സുഹൃത്തിനോടു നേരത്തേ പറഞ്ഞതാണ്. വീട്ടിലെത്തി വസ്ത്രം മാറി നേരെ മാലൂരിലേക്ക്.
മുന്‍പും ഇതുപോലെ അപകടത്തില്‍നിന്നു തലനാരിഴയ്ക്കു രക്ഷപ്പെട്ട അനുഭവം മുഹമ്മദിനുണ്ട്. രണ്ടുവര്‍ഷം മുന്‍പ്, തടിയുമായിപ്പോയ ലോറി മാഹി കുഞ്ഞിപ്പള്ളില്‍ തലകീഴായി മറിഞ്ഞു. ഡോര്‍ തുറന്നു തെറിച്ചുവീണ മുഹമ്മദ് ഓവുചാലിലേക്കും ലോറി ഓവുചാലിനു മുകളിലും പതിച്ചു. ഓവുചാലിന്റെ സുരക്ഷയില്‍ അന്നും മുഹമ്മദ് ജീവിതത്തിലേക്ക് തിരികെക്കയറി.