സുതാര്യമായ അന്വേഷണം നടക്കില്ലെന്ന ആശങ്ക മാത്രം പോരാ; ആശങ്കയ്ക്ക് കഴമ്പുണ്ടാകണം; സംസ്ഥാന പൊലീസ് അന്വേഷണം വഴിതെറ്റിയെന്ന് സ്ഥാപിക്കാന്‍ കഴിഞ്ഞില്ല; ഹര്‍ജിക്കാരിക്ക് അന്വേഷണ ഉദ്യോഗസ്ഥരെ കുറിച്ചും പരാതിയില്ല; നവീന്‍ ബാബുവിന്റെ മരണത്തില്‍ കേസ് സിബിഐക്ക് കൈമാറാത്തതിന്റെ കാരണങ്ങള്‍
നവീന്‍ ബാബുവിന്റെ മരണത്തില്‍ കേസ് എന്തുകൊണ്ട് സിബിഐയ്ക്ക് കൈമാറിയില്ല?
കൊച്ചി: എഡിഎം നവീന്‍ ബാബുവിന്റെ മരണത്തില്‍ കേസ് എന്തുകൊണ്ട് സിബിഐയ്ക്ക് കൈമാറിയില്ല? ഇക്കാര്യത്തില്‍ ഹൈക്കോടതി ഡിവിഷന്‍ ബഞ്ച് നിരത്തിയ കാരണങ്ങള്‍ ഇങ്ങനെ: സുതാര്യമായ അന്വേഷണം നടക്കില്ലെന്ന ആശങ്ക മാത്രം കണക്കിലെടുത്ത് കേസ് സിബിഐക്ക് കൈമാറാനാകില്ല. പരാതിക്കാരിയുടെ ആശങ്കയ്ക്ക് കഴമ്പുണ്ടാകണം. സാങ്കല്‍പികമാകാന്‍ പാടില്ല.
സംസ്ഥാന പൊലീസ് അന്വേഷണം വഴിതെറ്റിയെന്ന് വസ്തുതകളുടെ അടിസ്ഥാനത്തില്‍ സ്ഥാപിക്കാനായില്ല. ഈ സാഹചര്യത്തില്‍ കേസ് കൈമാറിയാല്‍ പൊതുസമൂഹത്തില്‍ തെറ്റായ ധാരണ ഉണ്ടാക്കാന്‍ ഇടയാക്കും. നിയമ സംവിധാനത്തെപ്പറ്റിയും അന്വേഷണ ഏജന്‍സികളെപ്പറ്റിയും തെറ്റായ ധാരണ പരത്താന്‍ ഇത് കാരണമാകും. ഹര്‍ജിക്കാരിക്ക് എതെങ്കിലും അന്വേഷണ ഉദ്യോഗസ്ഥരെപ്പറ്റി പരാതിയില്ലെന്നും സിബിഐ അന്വേഷണം ആവശ്യപ്പെട്ട് എഡിഎമ്മിന്റെ ഭാര്യ നല്‍കിയ ഹര്‍ജി തള്ളിക്കൊണ്ടുള്ള ഉത്തരവില്‍ ചൂണ്ടിക്കാട്ടുന്നു.
ജസ്റ്റീസ് പി ബി സുരേഷ് കുമാര്‍, ജസ്റ്റീസ് ജോബിന്‍ സെബാസ്റ്റ്യന്‍ എന്നിവരടങ്ങിയ ഡിവിഷന്‍ ബെഞ്ചാണ് ഭാര്യ മഞ്ജുഷയുടെ അപ്പീല്‍ തളളിയത്. സിബിഐ അന്വേഷണമെന്ന ആവശ്യം നേരത്തെ സിംഗിള്‍ ബെഞ്ചും നിരസിച്ചിരുന്നു. നവീന്‍ ബാബുവിന്റേത് കൊലപാതകമാണ്, പൊലീസ് ഇക്കാര്യം അന്വേഷിക്കുന്നില്ല, സിപിഎം നേതാക്കളായ പ്രതികളെ സംസ്ഥാന സര്‍ക്കാര്‍ സംരക്ഷിക്കുകയാണ്, അന്വേഷണം നിശ്ചലമാണ്, തെളിവുകള്‍ ശേഖരിക്കുന്നില്ല എന്നിവയായിരുന്നു ഹര്‍ജിയിലെ പ്രധാന ആക്ഷേപങ്ങള്‍.
നവീന്‍ ബാബുവിന്റേത് ആത്മഹത്യയാണെന്നും കൊലപാതകമെന്ന കുടുംബത്തിന്റെ ആശങ്ക പരിശോധിക്കുമെന്നും സംസ്ഥാന സര്‍ക്കാര്‍ അറിയിച്ചിരുന്നു. പൊലീസ് അന്വേഷണം സുതാര്യമാണെന്നും തെളിവുശേഖരണം നടത്തിയെന്നും പ്രോസിക്യൂഷന്‍ നിലപാടെടുത്തു. സംസ്ഥാന സര്‍ക്കാരിന്റെ ഈ വാദം അംഗീകരിച്ചാണ് സിബിഐ അന്വേഷണം വേണ്ടെന്ന തീരുമാനത്തിലേക്ക് ഡിവിഷന്‍ ബെഞ്ച് എത്തിയത്.