അഞ്ച് കോടിയുടെ ഇന്‍ഷുറന്‍സ് തട്ടാന്‍ സ്വന്തം കാലുകള്‍ മുറിച്ചു മാറ്റി; 49കാരനായ വാസ്‌കുലര്‍ സര്‍ജനെ കയ്യോടെ പൊക്കി കോടതി: നൂറുകണക്കിന് ശസ്ത്രക്രിയകള്‍ നടത്തിയ യുകെയിലെ പ്രമുഖ ഡോക്ടര്‍ക്ക് ഇനി അഴിയെണ്ണാം
അഞ്ച് കോടിയുടെ ഇൻഷുറൻസ് തുക കെെക്കലാക്കാൻ സ്വന്തം കാലുകൾ മുറിച്ചുമാറ്റി ഡോക്ടർ
ലണ്ടന്‍: ഇന്‍ഷുറന്‍സ് തുക തട്ടാന്‍ മറ്റുള്ളവരെ കൊലപ്പെടുത്തി സ്വന്തം മരണം ചിത്രീകരിച്ചവരുടെ വാര്‍ത്തകള്‍ കൗതുകത്തോടെ നമ്മള്‍ വായിച്ചിട്ടുണ്ട്. എന്നാല്‍ ഇന്‍ഷുറന്‍സായി ലഭിക്കുന്ന പണത്തിനായി സ്വന്തം കാലുകള്‍ മുറിച്ചു മാറ്റിയിരിക്കുകയാണ് യുകെയിലെ ഒരു ഡോക്ടര്‍. കോടികള്‍ കയ്യില്‍ കിട്ടുന്നതിനായി സ്വന്തം കാലുകള്‍ മുറിച്ചു മാറ്റിയ ഡോക്ടറുടെ തട്ടിപ്പ് അറിഞ്ഞ് ഞെട്ടിയിരിക്കുകയാണ് പോലിസും കോടതിയും വരെ.
യുകെയിലാണ് സംഭവം. പ്രമുഖ വാസ്‌കുലര്‍ സര്‍ജനായ നീല്‍ ഹോപ്പറാ(49)ണ് ഇന്‍ഷുറന്‍സ് തുക തട്ടാന്‍ സ്വന്തം കാലുകള്‍ തന്നെ ബലി കൊടുത്തത്. 500,000 പൗണ്ട് (ഏകദേശം 5,85,45,800 രൂപ) ഇന്‍ഷുറന്‍സിനുവേണ്ടിയാണ് ഡോക്ടര്‍ സ്വന്തം കാലുകള്‍ മുറിച്ചുമാറ്റിയത്. കാലുകള്‍ പോയതോടെ ഡോക്ടര്‍ ഇന്‍ഷുറന്‍സ് ക്ലെയിമിനായി കമ്പിനിയെ സമീപിച്ചു. അണുബാധയെ തുടര്‍ന്നാണ് കാലുകള്‍ മുറിച്ചുമാറ്റേണ്ടിവന്നത് എന്നായിരുന്നു നീലിന്റെ അവകാശവാദം. എന്നാല്‍ കമ്പനിയുടെ അന്വേഷണത്തില്‍ ഡോക്ടര്‍ പറഞ്ഞത് കള്ളമാണെന്ന് കണ്ടെത്തി.
തുടര്‍ന്ന് സംഭവത്തില്‍ പോലിസ് അന്വേഷണം ആരംഭിച്ചു. ഒടുവില്‍ ഡോക്ടറുടെ അവകാശവാദം സത്യമല്ലെന്ന് കോടതിയും കണ്ടെത്തി. ഇന്‍ഷുറന്‍സ് തട്ടിപ്പ് കേസില്‍ അടുത്ത വാദം കേള്‍ക്കുന്ന അടുത്തമാസം 26-വരെ നീലിനെ റിമാന്‍ഡ് ചെയ്തിട്ടുണ്ട്. രണ്ട് വ്യത്യസ്ത കമ്പനികളില്‍നിന്ന് 235,622 പൗണ്ടിന്റെയും 231,031 പൗണ്ടിന്റെയും ഇന്‍ഷുറന്‍സായിരുന്നു നീലിനുണ്ടായിരുന്നത്. ഈ പണം ലഭിക്കാന്‍ വേണ്ടിയാണ് ഇന്‍ഷുറന്‍സ് കമ്പനികളെ തെറ്റായ കാരണം കാണിച്ച് ഡോക്ടര്‍ കബളിപ്പിച്ചത്. 2019 ജൂണ്‍ മൂന്നാം തീയതിയും 26-ാം തീയതിയുമായിരുന്നു സംഭവം.
ഡെവോണ്‍ ആന്‍ഡ് കോണ്‍വാള്‍ പോലീസ് നടത്തിയ അന്വേഷണത്തിലാണ് നീലിന്റെ തട്ടിപ്പ് പുറത്തായത്. ഏകദേശം രണ്ടരക്കൊല്ലം നീണ്ട അന്വേഷണത്തിലാണ് തട്ടിപ്പ് തെളിഞ്ഞത്. 2013 മുതല്‍ പത്തുകൊല്ലം റോയല്‍ കോണ്‍വാള്‍ ഹോസ്പിറ്റല്‍സ് എന്‍എച്ച്എസ് ട്രസ്റ്റിലായിരുന്നു നീല്‍ ജോലിചെയ്തിരുന്നത്. ഇക്കാലയളവില്‍ നൂറുകണക്കിന് ശസ്‌ക്രിയകള്‍ നീല്‍ ചെയ്തിട്ടുണ്ട്. 2023 മാര്‍ച്ചില്‍ ഇയാള്‍ അറസ്റ്റിലായതിനു പിന്നാലെ നീലിന്റെ മെഡിക്കല്‍ പ്രാക്ടീസിനുള്ള അനുമതി റദ്ദാക്കിയിരുന്നു. മറ്റുള്ള വ്യക്തികളുടെ ശരീരം മുറിച്ചുമാറ്റാന്‍ മാരിയസ് ഗുസ്റ്റാവ്സണ്‍ എന്നൊരാള്‍ക്ക് പ്രേരണയായി എന്ന കുറ്റവും നീലിനുമേല്‍ ചുമത്തിയിട്ടുണ്ട്.