സൗരക്കാറ്റുകള്‍ ഉണ്ടാകുമ്പോള്‍ വിമാനത്തിന്റെ ഓണ്‍ബോര്‍ഡ് സോഫ്റ്റ്വെയറില്‍ തകരാറുകള്‍ സംഭവിക്കാം; പൈലറ്റുമാര്‍ക്ക് വിമാനം നിയന്ത്രിക്കാനോ സ്ഥിരപ്പെടുത്താനോ കഴിയാതെ വരും; ഗുരുതര അപകടങ്ങള്‍ക്ക് സാധ്യത; ലോകത്തെ ഞെട്ടിച്ച് എയര്‍ ബസിന്റെ മുന്നറിയിപ്പ്; എ320 ശ്രേണിയിലെ ആറായിരത്തോളം വിമാനങ്ങള്‍ സുരക്ഷിതമല്ല
ലണ്ടന്‍: ജനപ്രിയ യാത്രാവിമാനമായ എ320 ശ്രേണിയില്‍ ഉള്‍പ്പെടുന്ന ആറായിരത്തോളം വിമാനങ്ങള്‍ക്ക് ഗുരുതരമായ സുരക്ഷാ പ്രശ്‌നങ്ങളുണ്ടെന്ന് മുന്നറിയിപ്പ്. ലോകത്തിലെ ഏറ്റവും വലിയ വിമാന നിര്‍മ്മാതാക്കളായ എയര്‍ബസാണ് തങ്ങളുടെ വിമാനങ്ങളിലെ ഈ പ്രശ്‌ന ചര്‍ച്ചയാക്കുന്നത്. സൗരക്കാറ്റുകള്‍ ഉണ്ടാകുമ്പോള്‍ വിമാനത്തിന്റെ ഓണ്‍ബോര്‍ഡ് സോഫ്റ്റ്വെയറില്‍ തകരാറുകള്‍ സംഭവിക്കാമെന്നും, ഇത് പൈലറ്റുമാര്‍ക്ക് വിമാനം നിയന്ത്രിക്കാനോ സ്ഥിരപ്പെടുത്താനോ കഴിയാതെ വരുന്നതിനും ഗുരുതര അപകടങ്ങള്‍ക്കും വഴിയൊരുക്കുമെന്നുമാണ് ആശങ്ക. ഈ ന്യൂനത പരിഹരിക്കാത്തപക്ഷം നിരവധി വിമാനങ്ങള്‍ സര്‍വീസ് നിര്‍ത്തിവെക്കേണ്ടി വരുമെന്നാണ് റിപ്പോര്‍ട്ട്.
ഒക്ടോബര്‍ 30-ന് മെക്‌സിക്കോയിലെ കാന്‍കുണില്‍ നിന്ന് ന്യൂജേഴ്സിയിലെ നെവാര്‍ക്കിലേക്ക് പോയ ജെറ്റ്ബ്ലൂ വിമാനത്തിനുണ്ടായ 'നിയന്ത്രണമില്ലാത്ത താഴ്ച' ഈ പ്രശ്‌നം മൂലമാണെന്നാണ് വിലയിരുത്തുന്നത്. ആയിരക്കണക്കിന് അടി ഉയരത്തില്‍ നിന്ന് പെട്ടെന്ന് താഴുകയും 15 പേര്‍ക്ക് പരിക്കേല്‍ക്കുകയും ചെയ്ത ഈ സംഭവത്തെക്കുറിച്ച് ഫെഡറല്‍ ഏവിയേഷന്‍ അഡ്മിനിസ്ട്രേഷന്‍ (എഫ്.എ.എ.) നടത്തിയ അന്വേഷണത്തില്‍ നിര്‍ണ്ണായകമായ വിവരങ്ങള്‍ കണ്ടെത്തുകയായിരുന്നു. സൗരവികിരണങ്ങളില്‍ നിന്നുള്ള ഭീഷണി നേരിടാന്‍ ആഗോള വ്യോമയാന മേഖലയ്ക്ക് അടിയന്തര നടപടികള്‍ അനിവാര്യമാണെന്നാണ് മുന്നറിയിപ്പ്.
തീവ്രമായ സൗരവികിരണം വിമാനത്തിന്റെ ഫ്‌ലൈറ്റ് കണ്‍ട്രോള്‍ കമ്പ്യൂട്ടറുകളിലെ നിര്‍ണ്ണായക വിവരങ്ങളെ തകരാറിലാക്കുകയും, വിമാനത്തിന് താത്കാലികമായി സ്ഥാനനിര്‍ണ്ണയ വിവരങ്ങള്‍ നഷ്ടപ്പെടുകയും ചെയ്തതാണ് ഈ നിയന്ത്രണമില്ലാത്ത താഴ്ചയ്ക്ക് കാരണമെന്ന് അന്വേഷണത്തില്‍ വ്യക്തമായി. ഈ കണ്ടെത്തലുകളുടെ പശ്ചാത്തലത്തില്‍, എയര്‍ബസ് ഒരു 'അലേര്‍ട്ട് ഓപ്പറേറ്റേഴ്‌സ് ട്രാന്‍സ്മിഷന്‍' പുറത്തിറക്കി. എ320 ശ്രേണിയിലെ വിമാനങ്ങള്‍ ഉപയോഗിക്കുന്ന ലോകമെമ്പാടുമുള്ള എല്ലാ വിമാനക്കമ്പനികളോടും തങ്ങളുടെ സോഫ്റ്റ്വെയറുകളും ഹാര്‍ഡ്വെയറുകളും സൗരവികിരണങ്ങളെ പ്രതിരോധിക്കാന്‍ ഉതകുംവിധം അടിയന്തരമായി നവീകരിക്കാന്‍ ആവശ്യപ്പെട്ടു.
ഏറ്റവും വലിയ എ320 വിമാനനിരയുള്ള അമേരിക്കന്‍ എയര്‍ലൈന്‍സ് തങ്ങളുടെ 480 ജെറ്റുകളില്‍ 340 എണ്ണത്തിന്റെ സോഫ്റ്റ്വെയര്‍ അപ്ഡേറ്റ് ചെയ്യാനുള്ള നടപടികള്‍ക്ക് തുടക്കമിട്ടു. ഡെല്‍റ്റ എയര്‍ലൈന്‍സ്, യുണൈറ്റഡ് എയര്‍ലൈന്‍സ്, ജെറ്റ്ബ്ലൂ തുടങ്ങിയ യു.എസ്. കമ്പനികളും, ലുഫ്താന്‍സ (ജര്‍മ്മനി), ഇന്‍ഡിഗോ (ഇന്ത്യ), ഈസിജെറ്റ് (യു.കെ.) തുടങ്ങിയ ആഗോള കാരിയറുകളും തകരാറുകള്‍ പരിഹരിക്കുന്നതിനായി നിരവധി വിമാനങ്ങള്‍ സര്‍വീസില്‍ നിന്ന് പിന്‍വലിക്കേണ്ടിവരുമെന്ന് പ്രഖ്യാപിച്ചിട്ടുണ്ട്.
ജെറ്റ്ബ്ലൂ എയര്‍ലൈന്‍സിന്റെ ഫ്‌ലൈറ്റ് 1256 വിമാനത്തില്‍ അനുഭവപ്പെട്ട കനത്ത പ്രകമ്പനത്തെ തുടര്‍ന്ന് എട്ട് പേര്‍ക്ക് പരുക്ക് ഏറ്റിരുന്നു. വിമാനം ഫ്‌ലോറിഡക്ക് അടുത്തെത്തിയപ്പോഴാണ് അപ്രതീക്ഷിതമായ ആകാശച്ചുഴിയില്‍ പെട്ടതെന്നാണ് ജെറ്റ്ബ്ലൂ അധികൃതര്‍ നല്‍കിയ വിശദീകരണം. വിമാനം സുരക്ഷിതമായി ഫോര്‍ട്ട് ലോഡര്‍ഡെയ്ല്‍-ഹോളിവുഡ് ഇന്റര്‍നാഷനല്‍ എയര്‍പോര്‍ട്ടില്‍ ലാന്‍ഡ് ചെയ്ത ശേഷം, ആരോഗ്യപ്രവര്‍ത്തകര്‍ ഏഴ് യാത്രക്കാരെയും ഒരു ജീവനക്കാരനെയും ചികിത്സയ്ക്കും പരിശോധനക്കുമായി ആശുപത്രിയിലേക്ക് മാറ്റി. സംഭവത്തെ തുടര്‍ന്ന് ഈ വിമാനം സര്‍വീസില്‍ നിന്ന് നീക്കം ചെയ്യുകയും പരിശോധനക്ക് വിധേയമാക്കുകയും ചെയ്തിരുന്നു.
അതിതീവ്രമായ സൗരവികിരണം ഫ്‌ലൈറ്റ് കണ്‍ട്രോള്‍ സംബന്ധിച്ച നിര്‍ണായക ഡേറ്റയെ ബാധിക്കാനിടയുണ്ടെന്ന വിലയിരുത്തലിനെത്തുടര്‍ന്ന്, എയര്‍ബസ് എ320 വിഭാഗത്തില്‍പ്പെട്ട ഒട്ടേറെ വിമാനങ്ങളില്‍ സോഫ്റ്റ്വെയര്‍ മാറ്റങ്ങള്‍ നിര്‍ബന്ധമാക്കിയെന്ന് റിപ്പോര്‍ട്ട്. ഇന്ത്യന്‍ എയര്‍ലൈന്‍സുകളായ ഇന്‍ഡിഗോ, എയര്‍ ഇന്ത്യ, എയര്‍ ഇന്ത്യ എക്‌സ്പ്രസ് എന്നിവ പ്രവര്‍ത്തിപ്പിക്കുന്ന ഏകദേശം 200250 വിമാനങ്ങളെ തീരുമാനം ബാധിക്കും. സോഫ്റ്റ്വെയര്‍ അപ്ഡേഷനുവേണ്ടി ഈ വിമാനങ്ങള്‍ നിശ്ചിതസമയത്തേക്ക് നിലത്തിറക്കേണ്ടതിനാല്‍ സര്‍വീസുകളില്‍ തടസ്സം നേരിട്ടേക്കുമെന്നാണ് സൂചന. ചില വിമാനങ്ങള്‍ വൈകാനോ റദ്ദാക്കാനോ ഇടയുണ്ടെന്ന് ഇന്ത്യന്‍ എയര്‍ലൈന്‍സ് അറിയിച്ചു. ആഗോളതലത്തില്‍ 6000 വിമാനങ്ങളെ ബാധിക്കപ്പെടുമെന്നാണ് വിലയിരുത്തല്‍.
മുന്‍കരുതല്‍ നടപടികള്‍ സ്വീകരിക്കാന്‍ എയര്‍ബസ് ഓപ്പറേറ്റര്‍മാര്‍ക്ക് നിര്‍ദേശം നല്‍കിയിട്ടുണ്ടെന്നാണ് വിവരം. ഇതിന്റെ അടിസ്ഥാനത്തില്‍ യൂറോപ്യന്‍ യൂണിയന്‍ വ്യോമയാന സുരക്ഷാ ഏജന്‍സി(ഇഎഎസ്എ) അടിയന്തര മാര്‍ഗനിര്‍ദേശം ഉടന്‍ പുറത്തിറക്കും.