സോളാര്‍ പീഡന പരാതിയില്‍ മുന്‍ മുഖ്യമന്ത്രി ഉമ്മന്‍ ചാണ്ടിയുടെ പേര് ഗൂഢാലോചനയിലൂടെ എഴുതിച്ചേര്‍ത്തെന്നാണ് ഹരജിക്കാരന്റെ വാദം നൂറു ശതാനം ശരി; കസ്റ്റഡിയില്‍ പ്രതി എഴുതിയത് 21 പേജ് മാത്രമെന്ന് ജയില്‍ സൂപ്രണ്ട്; സോളാറില്‍ ഇനിയും 'നീതി' വരും; ഉമ്മന്‍ചാണ്ടിയെ ഇല്ലായ്മ ചെയ്യാന്‍ നടന്ന ഗൂഡാലോചന തിയറിയില്‍ വീണ്ടും വെളിപ്പെടുത്തല്‍
കൊട്ടാരക്കര: സോളാര്‍ തട്ടിപ്പ് കേസിലെ പ്രതി പോലീസ് കസ്റ്റഡിയിലിരിക്കെ എഴുതിയ കത്തില്‍ 21 പേജുകള്‍ മാത്രമാണ് ഉണ്ടായിരുന്നതെന്ന് ജയില്‍ സൂപ്രണ്ടിന്റെ മൊഴി. മുന്‍ മുഖ്യമന്ത്രി ഉമ്മന്‍ചാണ്ടിയെ അപകീര്‍ത്തിപ്പെടുത്താന്‍ നാലുപേജ് എഴുതിച്ചേര്‍ത്തെന്ന ആരോപണം ശരിവയ്ക്കുന്നതാണ് പത്തനംതിട്ട ജില്ലാ ജയില്‍ സൂപ്രണ്ട് വിശ്വനാഥക്കുറുപ്പ് കൊട്ടാരക്കര കോടതിയില്‍ നല്‍കിയ വെളിപ്പെടുത്തല്‍.
പ്രതി എഴുതിയത് 21 പേജാണെന്ന് വ്യക്തമാക്കുന്ന രേഖകളും സൂപ്രണ്ട് കോടതിയില്‍ ഹാജരാക്കി. 2013 ജൂലായ് 20ന് പെരുമ്പാവൂര്‍ ഡിവൈഎസ്പി പ്രതിയെ ജയിലില്‍ എത്തിച്ചപ്പോള്‍ ദേഹപരിശോധനയില്‍ 21 പേജുള്ള കത്ത് കണ്ടെത്തി. ഇത് അഭിഭാഷകന് നല്‍കാനായി പ്രതിയെത്തന്നെ ഏല്‍പ്പിച്ചു. ജൂലായ് 24ന് അഭിഭാഷകന് ഫെനി ബാലകൃഷ്ണന് സൂപ്രണ്ടിന്റെ സാന്നിധ്യത്തില്‍ കത്ത് കൈമാറിയെന്നും, ഇതിന്റെ കൈപ്പറ്റുരസീത് കോടതിയില്‍ നല്‍കിയെന്നും സൂപ്രണ്ട് മൊഴി നല്‍കി.
പിന്നീട് സോളാര്‍ കമ്മിഷനുമുന്‍പില്‍ പ്രതി നല്‍കിയത് 25 പേജുള്ള കത്തായിരുന്നു. അധികമായുള്ള നാലുപേജ് മന്ത്രി ഗണേഷ്‌കുമാറും പ്രതിയും ഗൂഢാലോചന നടത്തി എഴുതിച്ചേര്‍ത്തതാണെന്നാരോപിച്ച് അഭിഭാഷകന് സുധീര്‍ ജേക്കബ് കൊട്ടാരക്കര കോടതിയില്‍ ഹരജി നല്‍കിയിരുന്നു. ഹരജിയിലെ ആരോപണങ്ങള്‍ ബലപ്പെടുത്തുന്നതാണ് ജയില്‍ സൂപ്രണ്ടിന്റെ നിര്‍ണായക മൊഴി. കൂട്ടിച്ചേര്‍ത്ത 4 പേജുകളില്‍ മുന്‍ മുഖ്യമന്ത്രി, മന്ത്രിമാര്‍, എംഎല്‍എമാര്‍ തുടങ്ങിയ കോണ്‍ഗ്രസ് നേതാക്കള്‍ക്കെതിരായ ആരോപണങ്ങളാണുള്ളത്. കേസ് അടുത്തമാസം 29ന് പരിഗണിക്കും. സുധീര്‍ ജേക്കബ് അഭിഭാഷകനായ ജോളി അലക്‌സ് മുഖേനയാണു ഹര്‍ജി നല്‍കിയത്.
അധികമായുള്ള നാലുപേജ് പിന്നീട് ഗൂഢാലോചന നടത്തി എഴുതിച്ചേര്‍ത്തതാണെന്നാരോപിച്ചാണ് അഭിഭാഷകന് സുധീര്‍ ജേക്കബ് കൊട്ടാരക്കര കോടതിയില്‍ ഹര്‍ജി നല്‍കിയത്. മന്ത്രി ഗണേഷ്‌കുമാറും പ്രതിയും ഗൂഢാലോചന നടത്തിയാണ് മുന്‍ മുഖ്യമന്ത്രി ഉമ്മന്‍ചാണ്ടിയെ അപകീര്‍ത്തിപ്പെടുത്തുന്ന ഭാഗങ്ങള്‍ കത്തില്‍ എഴുതിച്ചേര്‍ത്തതെന്നാണ് ആരോപണം. ഹര്‍ജിയില്‍ പ്രഥമദൃഷ്ട്യാ വസ്തുതകളുണ്ടെന്നു ബോധ്യപ്പെട്ട കോടതി കേസ് രജിസ്റ്റര്‍ ചെയ്യുകയായിരുന്നു. മന്ത്രിയാക്കാത്തതിലുള്ള വിരോധത്തിലാണ് ഗണേഷ്‌കുമാര്‍ തനിക്കെതിരേ ഗൂഢാലോചന നടത്തിയതെന്ന് ഉമ്മന്‍ചാണ്ടി കോടതിയില്‍ മൊഴിനല്‍കിയിരുന്നു. ഈ സാഹചര്യത്തില്‍ കേസിലെ കോടതി തീരുമാനം നിര്‍ണ്ണായകമാണ്.
സോളാര്‍ ഗൂഡാലോചന കേസിലെ തുടര്‍നടപടികള്‍ റദ്ദാക്കണം, നേരിട്ട് ഹാജരാകുന്നത് ഒഴിവാക്കണം എന്ന ഗണേഷിന്റെ ഹര്‍ജികള്‍ ഹൈകോടതി നേരത്തെ തള്ളിയിരുന്നു.