പണം കൈമാറ്റം നടന്നുവെന്ന് പറയുന്ന സമയത്ത് ഡി മണി തിരുവനന്തപുരത്ത് എത്തിയോ എന്ന് പരിശോധന; കേരളത്തിലെ ക്ഷേത്ര ഭരണചുമതലയുണ്ടായിരുന്ന ആ ഉന്നതന് ആര്? പോറ്റിയ്ക്ക് മണിയെ അറിയാം; സംശയ നിഴലില് മഹാരാഷ്ട്രയിലെ പുരാവസ്തു മാഫിയ; 'ഡയമണ്ട് മണി' സത്യം പറയുമോ?
കൊച്ചി: ശബരിമല സ്വര്ണ്ണക്കൊള്ളയിലും അന്താരാഷ്ട്ര വിഗ്രഹക്കടത്തിലും നിര്ണ്ണായക പങ്കുണ്ടെന്ന് സംശയിക്കുന്ന 'ഡി മണി' എന്ന ഡയമണ്ട് മണിയെ പ്രത്യേക അന്വേഷണ സംഘം ചോദ്യം ചെയ്യും. തമിഴ്നാട് ദിണ്ടിഗല് സ്വദേശിയായ ബാലമുരുകനാണ് ഡി മണിയെന്ന് അന്വേഷണ സംഘം സ്ഥിരീകരിച്ചിട്ടുണ്ട്. ഡയമണ്ട് മണിയെന്നാണ് വിളിപ്പേര്. ശബരിമലയില് നിന്ന് പഞ്ചലോഹ വിഗ്രഹങ്ങള് കടത്തിയെന്ന പ്രവാസി വ്യവസായിയുടെ മൊഴിയുടെ അടിസ്ഥാനത്തിലാണ് ഈ നീക്കം. മഹാരാഷ്ട്ര സംഘവും ഇതിനു പിന്നിലുണ്ടെന്നാണ് സൂചന. രമേശ് ചെന്നിത്തലയാണ് ഈ വിവരം ആദ്യം പുറത്തു വിട്ടത്. പിന്നീട് വ്യവസായി മൊഴിയും നല്കി.
ശബരിമലയില് നിന്ന് നാല് പഞ്ചലോഹ വിഗ്രഹങ്ങള് അന്താരാഷ്ട്ര പുരാവസ്തു മാഫിയയ്ക്ക് വിറ്റതായാണ് വ്യവസായിയുടെ മൊഴി. 2019-20 കാലയളവില് നടന്ന ഈ കടത്തിന് പുറമേ തിരുവനന്തപുരം പത്മനാഭസ്വാമി ക്ഷേത്രത്തിലെ വിഗ്രഹങ്ങളും സ്വര്ണ്ണവും ഈ സംഘം ലക്ഷ്യമിട്ടിരുന്നതായും ആരോപണമുണ്ട്. അന്താരാഷ്ട്ര മാഫിയയെ പരിചയപ്പെടുത്തിയത് തമിഴ്നാട് മുന് മുഖ്യമന്ത്രി ജയലളിതയുമായി അടുത്ത ബന്ധമുള്ളവരാണെന്നും, കേരളത്തിലെ ക്ഷേത്ര ഭരണചുമതലയുള്ള ഒരു ഉന്നതന്റെ നേതൃത്വത്തിലാണ് വിഗ്രഹങ്ങള് കൈമാറിയതെന്നും മൊഴിയില് പറയുന്നു.
ഉണ്ണിക്കൃഷ്ണന് പോറ്റിയാണ് ഈ ഇടപാടുകളിലെ പ്രധാന ഇടനിലക്കാരനെന്നും 2020 ഒക്ടോബര് 26-ന് തിരുവനന്തപുരത്ത് വെച്ച് വന്തോതില് പണക്കൈമാറ്റം നടന്നതായും വ്യവസായി വെളിപ്പെടുത്തിയിട്ടുണ്ട്. ഏകദേശം 1000 കോടി രൂപയുടെ ഇടപാടാണ് കേരളത്തില് ഈ സംഘം ലക്ഷ്യമിട്ടതെന്നാണ് ലഭിക്കുന്ന വിവരം. എന്നാല്, ക്ഷേത്രങ്ങളില് നിന്ന് വിഗ്രഹങ്ങള് നഷ്ടപ്പെട്ടതായി ഇതുവരെ ഔദ്യോഗിക വിവരമൊന്നുമില്ലാത്തതിനാല് പ്രവാസി വ്യവസായിയുടെ മൊഴി എത്രത്തോളം സത്യമാണെന്ന് പോലീസ് വിശദമായി പരിശോധിച്ചു വരികയാണ്. ഉണ്ണികൃഷ്ണന് പോറ്റിയ്ക്ക് മണിയെ അറിയാമെന്ന നിഗമനത്തിലാണ് പ്രത്യേക അന്വേഷണ സംഘം.
അതേസമയം, കേസില് സിബിഐ അന്വേഷണം ആവശ്യപ്പെട്ടുകൊണ്ടുള്ള ഹര്ജിയില് ഹൈക്കോടതി സര്ക്കാരിന്റെ നിലപാട് തേടിയിട്ടുണ്ട്. ഇതിനുള്ള മറുപടി പ്രത്യേക അന്വേഷണ സംഘം തയ്യാറാക്കി വരികയാണ്. അന്വേഷണം ഏറ്റെടുക്കാമെന്ന് സിബിഐ അറിയിച്ചിട്ടുണ്ട്. ഡി മണിയെ ചോദ്യം ചെയ്യുന്നതോടെ ഈ വമ്പന് ഗൂഢാലോചനയിലെ കൂടുതല് വിവരങ്ങള് പുറത്തുവരുമെന്നാണ് പ്രതീക്ഷിക്കുന്നത്. കേസിലെ മുഖ്യപ്രതികളായ ഉണ്ണികൃഷ്ണന് പോറ്റി, സുധീഷ് കുമാര് എന്നിവരെ പ്രത്യേക അന്വേഷണസംഘം ജയിലിലെത്തി ചോദ്യം ചെയ്തിരുന്നു. പ്രവാസി വ്യവസായി നടത്തിയ ഞെട്ടിക്കുന്ന വെളിപ്പെടുത്തലുകളുടെ പശ്ചാത്തലത്തില്, 'ഡി മണി' എന്നറിയപ്പെടുന്ന ബാലമുരുകന്റെ പങ്കിനെക്കുറിച്ച് വ്യക്തത വരുത്താനായിരുന്നു ഈ നീക്കം.
2020 ഒക്ടോബര് 20-ന് തിരുവനന്തപുരത്ത് വെച്ച് സ്വര്ണ്ണക്കടത്തുമായി ബന്ധപ്പെട്ട് വന്തോതില് പണം കൈമാറ്റം നടന്നതായി വ്യവസായി ആരോപിച്ചിരുന്നു. ഡി മണിയും ഉണ്ണികൃഷ്ണന് പോറ്റിയും ശബരിമലയിലെ ഒരു ഉന്നത ഉദ്യോഗസ്ഥനും മാത്രമാണ് ഈ രഹസ്യ ഇടപാടില് പങ്കെടുത്തതെന്നാണ് വിവരം. അന്താരാഷ്ട്ര ബന്ധം: കേരളത്തിലെ ക്ഷേത്രങ്ങളില് നിന്നുള്ള വിലപിടിപ്പുള്ള പുരാവസ്തുക്കളും വിഗ്രഹങ്ങളും അന്താരാഷ്ട്ര വിപണിയിലെത്തിക്കുന്ന മാഫിയയുടെ കണ്ണിയിയായാണ് ഡി മണിയെ പോലീസ് സംശയിക്കുന്നത്. ഈ സംഘം മഹാരാഷ്ട്ര കേന്ദ്രീകരിച്ചാണ് പ്രവര്ത്തിക്കുന്നത്.
ശബരിമല സ്വര്ണ്ണക്കൊള്ളയുമായി ബന്ധപ്പെട്ട് ഇതിനകം പുറത്തുവന്ന വിവരങ്ങള് ശരിവെക്കുന്നതാണോ ജയിലില് പ്രതികള് നല്കിയ മൊഴിയെന്ന് എസ്ഐടി പരിശോധിച്ചുവരികയാണ്. പണം കൈമാറ്റം നടന്നുവെന്ന് പറയുന്ന സമയത്ത് ഡി മണി തിരുവനന്തപുരത്ത് എത്തിയതിന്റെ തെളിവുകളും പോലീസ് ശേഖരിക്കുന്നുണ്ട്. ശബരിമലയിലെ ആ 'ഉന്നതന്' ആരാണെന്ന കാര്യത്തില് ഇതോടെ കൂടുതല് വ്യക്തത വരുമെന്നാണ് സൂചന.