'നിജു 25 ലക്ഷം രൂപ നല്‍കാമെന്ന് പറഞ്ഞെങ്കിലും അഞ്ച് ലക്ഷം മാത്രമാണ് തന്നത്; പരിപാടിക്ക് ശേഷം 45 ലക്ഷം രൂപയുടെ ബില്ലുമായി വന്നു; ഭീഷണി തുടങ്ങിയപ്പോഴാണ് മെസ്സേജ് അയച്ചത്; ഭീഷണി കാരണം ഭാര്യയ്ക്ക് സമനിലതെറ്റിയ പോലെയായി'; വഞ്ചനാ കേസില്‍ മറുപടിയുമായി ഷാന്‍ റഹ്‌മാന്‍
'നിജു 25 ലക്ഷം രൂപ നല്‍കാമെന്ന് പറഞ്ഞെങ്കിലും അഞ്ച് ലക്ഷം മാത്രമാണ് തന്നത്;
കൊച്ചി: കൊച്ചിയില്‍ സംഗീതനിശ സംഘടിപ്പിച്ചതുമായി ബന്ധപ്പെട്ട വഞ്ചനാ കേസില്‍പ്രതിയായിരിക്കയാണ് സംഗീത സംവിധായകന്‍ ഷാന്‍ റഹ്‌മാന്‍. ഈ കേസില്‍ താന്‍ എങ്ങനെയാണ് പ്രതിയായത് എന്ന് വിശദീകരിച്ചു കൊണ്ട് ഷാന്‍ രംഗത്തുവന്നു. വിഷയത്തില്‍ താന്‍ കേസുമായി മുന്നോട്ടു പോകുമെന്നാണ് ഷാന്‍ വ്യക്തമാക്കിയത്. തന്റെ യുട്യൂബ് ചാനലിലൂടെയാണ് ഷാന്‍ കേസുമായി ബന്ധപ്പെട്ട വിഷയങ്ങള്‍ വിശദീകരിച്ചത്.
25 ലക്ഷം രൂപ നിക്ഷേപം നല്‍കാമെന്ന് പരാതിക്കാരനായ നിജുരാജ് പറഞ്ഞെങ്കിലും അഞ്ച് ലക്ഷം മാത്രമാണ് തന്നതെന്നാണ് ഷാന്‍ പറയുന്ന പ്രധാന കാര്യം. നിജുവിന്റെ അറോറ എന്ന കമ്പനിയുമായിട്ടായിരുന്നു കരാര്‍. മറ്റൊരു കമ്പനിയാണ് പ്രൊഡക്ഷന്‍ നടത്തുന്നതെന്ന് വൈകിയാണ് അറിഞ്ഞത്. പരിപാടിക്കുശേഷം 45 ലക്ഷം രൂപയുടെ ബില്ലുമായി ഇയാള്‍ വന്നു. ഈ സംഖ്യ പിന്നീട് 47 ലക്ഷവും 51 ലക്ഷവുമായി. ഇതോടെ ആദ്യം തന്ന അഞ്ചുലക്ഷം തിരിച്ചുകൊടുത്തു. ഭീഷണി തുടര്‍ന്നപ്പോഴാണ് മെസ്സേജയച്ചത്. ഭീഷണി കാരണം തന്റെ ഭാര്യയുടെ സമനില നഷ്ടപ്പെടുമെന്ന അവസ്ഥ വന്നു. ജോലി ചെയ്ത് ജീവിക്കാന്‍ അനുവദിക്കണമെന്നും ഷാന്‍ റഹ്‌മാന്‍ അഭ്യര്‍ത്ഥിച്ചു.
ഷാന്‍ റഹ്‌മാന്റെ വാക്കുകള്‍ ഇങ്ങനെ: വളരെ സങ്കടകരമായ രണ്ടാഴ്ചകളിലൂടെയാണ് ഞാനും കുടുംബവും കടന്നുപോയത്. ഇക്കാര്യത്തില്‍ ഒരു വിശദീകരണം തരാന്‍ വൈകിയത് എന്താണെന്നുവെച്ചാല്‍ ശനിയാഴ്ചയാണ് ഞങ്ങള്‍ രണ്ടുപേരും പോലീസ് സ്റ്റേഷനില്‍ പോയി മൊഴി കൊടുക്കുന്നത്. കേസ് കൊടുത്തിട്ടേയുള്ളൂ, കോടതിയിലേക്ക് പോയിട്ടില്ല. അപ്പോഴേക്കും മാധ്യമവിചാരണ കഴിഞ്ഞു. ഞാനും എന്റെ ഭാര്യയും വഞ്ചകരായി. എന്റെ സൈഡ് എന്താണെന്ന് ആരും ചോദിച്ചില്ല. നിജു എന്ന വ്യക്തി പോലീസില്‍നിന്നും മീഡിയയില്‍നിന്നും മറച്ചുവെച്ച കുറേ കാര്യങ്ങളുണ്ട്.
കഴിഞ്ഞ കുറേ ദിവസങ്ങളായി നിങ്ങള്‍ കേട്ടുകൊണ്ടിരിക്കുന്ന ഒരു പേരാണ് ഇറ്റേണല്‍ റേ പ്രൊഡക്ഷന്‍സ്. ഞാനും ഭാര്യയും തുടക്കമിട്ട, ശൈശവദശയിലുള്ള ഒരു സംരംഭമാണിത്. ഇറ്റേണല്‍ റേ പ്രൊഡക്ഷന്‍സ് 2024-ല്‍ ദുബായില്‍വെച്ച് ഉയരേ എന്നൊരു ഷോ ചെയ്തു. അത് ഹിറ്റായപ്പോള്‍ അതുപോലൊന്ന് നമ്മുടെ നാട്ടില്‍ ചെയ്യണമെന്ന് ആഗ്രഹമുണ്ടായിരുന്നു. കൊച്ചിയില്‍ ചെയ്യാമെന്ന് തീരുമാനിച്ചു. ഷോ ചെയ്യാന്‍ പ്രൊഡക്ഷന്‍ കമ്പനികളില്‍നിന്ന് ക്വട്ടേഷനെടുക്കണം. അങ്ങനെ വന്ന കമ്പനിയാണ് നിജുരാജിന്റെ ഉദയാ പ്രോ. എന്റെ ഓഫീസില്‍ വെച്ചായിരുന്നു ഇദ്ദേഹവുമായുള്ള ആദ്യ കൂടിക്കാഴ്ച. ഉദയാ പ്രോയെ ഉറപ്പിച്ചെങ്കിലും പ്രതീക്ഷിച്ച രീതിയില്‍ സ്‌പോണ്‍സര്‍മാരെ കിട്ടിയില്ല.
അങ്ങനെയിരിക്കേ ഒരു യൂണിവേഴ്‌സിറ്റിയില്‍നിന്ന് നമുക്കൊരു അന്വേഷണം വന്നു. വലിയ രീതിയിലല്ലാതെ ഷോ നടത്താന്‍ പറ്റുമോയെന്നായിരുന്നു അവര്‍ ചോദിച്ചത്. അത് ചെയ്യാന്‍ തീരുമാനിക്കുകയും ചെറിയ പരിപാടിയാണ് ചെയ്യുന്നത് എന്നും നിങ്ങളുടെ സഹായം വേണ്ടെന്നും ഉദയാ പ്രോയുടെ ആളോട് വിളിച്ചുപറഞ്ഞു. അപ്പോളാണ് നിജുരാജ് പറയുന്നത് അദ്ദേഹത്തിന് അറോറ എന്റര്‍ടെയിന്‍മെന്റ്‌സ് എന്ന വേറൊരു കമ്പനിയുണ്ട്. അവര്‍ 25 ലക്ഷം നിക്ഷേപിക്കാന്‍ തയ്യാറാണെന്ന്. കൂടാതെ പ്രൊഡക്ഷനും അവര്‍തന്നെ നോക്കാമെന്ന് പറഞ്ഞു. ലാഭത്തിന്റെ 70 ശതമാനം വേണമെന്നും പരിപാടിയുടെ പേര് അറോറ ഫെസ്റ്റ് എന്നാക്കണമെന്നുമായിരുന്നു നിജുവിന്റെ ആവശ്യം. പരിപാടിയുടെ പേര് മാറ്റണമെന്നതൊഴിച്ച് ബാക്കി എല്ലാം ഓകെയായിരുന്നു. ഇക്കാര്യം പറഞ്ഞപ്പോള്‍ അദ്ദേഹവും അത് സമ്മതിച്ചു. തുടര്‍ന്ന് ഷോ അനൗണ്‍സ് ചെയ്തു.
ഡിസംബര്‍ രണ്ടാംവാരമായിട്ടും നിജോയുടെ ഭാഗത്തുനിന്ന് അഗ്രിമെന്റോ അഡ്വാന്‍സോ കിട്ടിയില്ല. നമ്മുടെ ഭാഗത്തുനിന്ന് പ്രമോഷന്‍ തുടങ്ങുകയും ചെയ്തു. നമ്മുടെ സൈഡില്‍നിന്ന് ചിലവ് കൂടിവന്നപ്പോള്‍ ഇന്‍വെസ്റ്റ്‌മെന്റ് 35 ലക്ഷം ആക്കാമോ എന്ന് നിജുവിനോട് ചോദിച്ചു. അത് അദ്ദേഹം സമ്മതിച്ചില്ല. പകരം ലാഭം 60-40 ശതമാനത്തില്‍ പങ്കുവെയ്ക്കാമെന്നാക്കി. ജനുവരി 14 ആയിട്ടും നിജു പൈസയും തരുന്നില്ല, കരാറും വെയ്ക്കുന്നില്ല. അങ്ങനെ ഞങ്ങള്‍തന്നെ ഒരു എഗ്രിമെന്റ് തയ്യാറാക്കി നിജുവിന് അയച്ചുകൊടുത്തു. ജനുവരി 16-ന് പുള്ളി അഞ്ചുലക്ഷം രൂപ എന്റെ കമ്പനിയില്‍ നിക്ഷേപിച്ചു. ഈ പണത്തേക്കുറിച്ച് അദ്ദേഹം എഫ്‌ഐആറിലോ മൊഴിയിലോ പറഞ്ഞിട്ടില്ല.
ഷോയുടെ തലേദിവസമായ ജനുവരി 24-ന് പരിപാടി നടക്കേണ്ട വേദിയില്‍ പോയപ്പോഴാണ് ഞെട്ടിക്കുന്ന സത്യം മനസിലാക്കിയത്. അതിന്റെ പ്രൊഡക്ഷന്‍ കമ്പനി മൊത്തം മാറിയിരിക്കുന്നു. അവര്‍ നമ്മളില്‍നിന്ന് ഇക്കാര്യം മറച്ചുവെയ്ക്കുകയായിരുന്നു. അവസാനനിമിഷമായതുകൊണ്ട് ഞാനൊന്നും മിണ്ടിയില്ല. രസകരമായ മറ്റൊരു കാര്യം എന്താണെന്നുവെച്ചാല്‍ ഈ പുതിയ പ്രൊഡക്ഷന്‍ കമ്പനിയെ ഇദ്ദേഹം സമീപിക്കുന്നത് ഷാന്‍ റഹ്‌മാന്റെ പ്രൊഡക്ഷന്‍ മാനേജര്‍ എന്നുപറഞ്ഞിട്ടാണ്. ബാക്കിയുള്ള സ്ഥലത്തെല്ലാം ഉയരേ പരിപാടിയുടെ പാര്‍ട്ണര്‍ എന്നും പറഞ്ഞു. ഷോ കഴിഞ്ഞ് എന്തെങ്കിലും പ്രശ്‌നമുണ്ടെങ്കില്‍ അതിന്റെ ഉത്തരവാദിത്തങ്ങളില്‍നിന്ന് പുള്ളി മാറുകയായിരുന്നു. ഇത് മുന്‍കൂട്ടി ആസൂത്രണംചെയ്ത നീക്കമാണെന്ന് എനിക്ക് തോന്നി. അവിടെ ഡ്രോണ്‍ പറത്താനുള്ള അനുമതിയില്ലെന്ന കാര്യവും അദ്ദേഹം മറച്ചുവെച്ചു. അനുവാദമില്ലാതെ ഡ്രോണ്‍ പറത്തിയതിന് അയാളെ ജാമ്യംത്തിലിറക്കിയത് എന്റെ ടീമാണ്.
ഷോ കഴിഞ്ഞ് എല്ലാവര്‍ക്കും പ്രതിഫലം കൊടുക്കുമ്പോള്‍ നിജു 45 ലക്ഷത്തിന്റെ ബില്ലുമായി വന്നു. എന്തിന്റെ ബില്ലാണെന്ന് എഴുതിത്തരാന്‍ പറഞ്ഞു. പിന്നെ വന്ന മെസേജില്‍ ഈ 45 ലക്ഷം എന്നത് 47 ലക്ഷമായി. പിന്നെയത് 51 ലക്ഷവുമായി. നിജുവിന്റെ ചെലവുംകൂടി ഞങ്ങള്‍ കൊടുക്കണമെന്ന് പറഞ്ഞത് എവിടത്തെ ന്യായമാണ്? നിജു സൈറയെ നിരന്തരമായി വിളിച്ച് ആത്മഹത്യാ ഭീഷണി മുഴക്കുകയാണ്. ഉയരെ നല്ല ഷോ ആയിരുന്നെങ്കിലും നഷ്ടംവന്നു. നിജു ഇട്ടുതന്ന അഞ്ച് ലക്ഷം തിരിച്ചുകൊടുക്കുകയാണെന്ന് ഭാര്യ പറഞ്ഞു. ഞാനും സമ്മതിച്ചു. ഫെബ്രുവരി 20-ന് ആ പണം തിരിച്ചുകൊടുക്കുകയും ഈ കാര്യം പറഞ്ഞ് നിജു ഇനി വിളിക്കരുതെന്നും പറഞ്ഞു. തൊട്ടടുത്ത ദിവസം നിജു വിളിച്ച് വീണ്ടും ആത്മഹത്യാ ഭീഷണി മുഴക്കി. സൈറ എന്നെ വിളിച്ച് അലറിക്കരയുകയായിരുന്നു. അവളുടെ സമനില തെറ്റിയതുപോലെയായി. അപ്പോഴാണ് ഇപ്പോള്‍ പുറത്തുവന്നിരിക്കുന്ന വോയിസ് നോട്ട് നിജുവിന് അയച്ചത്. അഞ്ചര മിനിറ്റുള്ള വോയിസ് നോട്ടിന്റെ ചില ഭാഗങ്ങളാണ് ഇപ്പോള്‍ പ്രചരിക്കുന്നത്.
നമുക്കുവേണ്ടി പണിയെടുത്ത ആള്‍ക്കാരുണ്ടെന്ന് മറക്കരുത്. ലാഭമാണെങ്കിലും നഷ്ടമാണെങ്കിലും അവരെ നമ്മള്‍ ഗൗനിക്കണം. ഇത് നിജു കൊടുക്കേണ്ട പൈസയാണ്. ആര്‍ക്കൊക്കെ എന്തൊക്കെ കൊടുക്കാനുണ്ടെന്ന സത്യസന്ധമായ കണക്ക് നിജുവിനോട് ചോദിച്ചു. ഞങ്ങള്‍ നിജുവിന് പണം കൊടുക്കില്ലെന്ന് മനസിലാക്കിയപ്പോളാണ് നിജു കേസ് കൊടുത്തത്. ഞാന്‍ പറയുന്ന കാര്യങ്ങളൊന്നും നിജു പോലീസിനോട് പറഞ്ഞിട്ടില്ല. വെന്‍ഡേഴ്‌സിന്റെ പ്രശ്‌നങ്ങള്‍ തീര്‍ക്കാന്‍ അവരുമായി ചര്‍ച്ച തുടങ്ങി എന്നറിഞ്ഞപ്പോള്‍ നിജു ഇവരെ സമീപിച്ചു. വിട്ടുവീഴ്ചയ്ക്ക് തയ്യാറാണെന്ന് പറഞ്ഞ് രണ്ടുപേരെ എന്റെ വീട്ടിലേക്ക് വിട്ടു. അതിലൊരാള്‍ വെന്‍ഡറുമായിരുന്നു. എല്ലാം ഒരു തെറ്റിദ്ധാരണയായിരുന്നെന്ന് മാധ്യമങ്ങളോട് പറയണമെന്ന് നിജു പറയുന്ന വോയിസ് നോട്ടും കേള്‍പ്പിച്ചുതന്നു.
ഇത് തെറ്റിദ്ധാരണയല്ലല്ലോ. രണ്ട് കുടുംബങ്ങള്‍ ഉരുകി, നാട്ടുകാരുടെ തെറിയുംകേട്ട് സമാധാനംപോലും നഷ്‌പ്പെട്ടിരിക്കുകയായിരുന്നു. ജോലിപോലും ചെയ്യാന്‍ പറ്റുന്നില്ലായിരുന്നു. ഇങ്ങനെയൊരു സാഹചര്യത്തിലേക്ക് എത്തിച്ചിട്ട് എല്ലാം തെറ്റിദ്ധാരണയാണെന്ന് പറഞ്ഞാല്‍ എങ്ങനെയാണ്? എനിക്ക് വിശ്വാസം കുറഞ്ഞു മൊത്തത്തില്‍. വെന്‍ഡേഴ്‌സുമായി സംസാരിച്ച് ഒരു സംഖ്യയില്‍ ധാരണയിലെത്തി. നിജുവിന്റെ സത്യസന്ധമായ മാപ്പ് പറയലാണ് വേണ്ടതെന്നും ഞങ്ങള്‍ ആവശ്യപ്പെട്ടു. വെന്‍ഡേഴ്‌സും അത് സമ്മതിച്ചു. തൊട്ടടുത്ത ദിവസം അവര്‍ നിജുവിനെ കണ്ടു. മാപ്പുപറയില്ലെന്ന് നിജു പറഞ്ഞു. ഇതോടെ വെന്‍ഡേഴ്‌സ് നിജുവുമായി ഉടക്കി. തുടര്‍ന്ന് അവരുടെ ഫോണ്‍കോളുകള്‍ നിജു എടുക്കാതെയായി.
വെന്‍ഡേഴ്‌സിന് കൊടുക്കാമെന്ന് പറഞ്ഞ സംഖ്യ നിജുവിന് കൊടുത്താല്‍ അദ്ദേഹം എന്താണെന്നുവച്ചാല്‍ മാധ്യമങ്ങളോട് പറയാമെന്ന് നിജു അറിയിച്ചു. ഇക്കാര്യം ഞാന്‍ വെന്‍ഡേഴ്‌സിനോട് പറഞ്ഞപ്പോള്‍ അവര്‍ പറഞ്ഞത് ഇക്ക ഇക്കയുടെ വഴിക്ക് വിട്ടോ, അവന്റെ കയ്യില്‍നിന്ന് വാങ്ങാനുള്ള പൈസ ഞങ്ങള്‍ വാങ്ങിക്കോളാമെന്നാണ്. ആ വിഷയം അവിടെ തീര്‍ന്നു. നിലവിലെ സാഹചര്യം എന്താണെന്നുവെച്ചുകഴിഞ്ഞാല്‍ ഞങ്ങള്‍ 29-ാം തീയതി പോലീസിന് മൊഴി കൊടുത്തു. കേസുമായി മുന്നോട്ടുപോകും. ഇനി ഇക്കാര്യത്തില്‍ വിശദീകരിക്കാനില്ല, മതിയായി. എനിക്ക് പണിയെടുക്കണം. എനിക്കും കുടുംബത്തിനും ജീവിക്കണം. ദയവുചെയ്ത് ഉപദ്രവിക്കരുത്.