സ്പാര്ക്ക് ഡാറ്റാ ചോര്ച്ചയില് സര്ക്കാറിന് ആശ്വാസം; ഡിഎ സന്ദേശത്തില് നിയമവിരുദ്ധതയില്ലെന്ന് ഹൈക്കോടതി; ജീവനക്കാരുടെ അവകാശങ്ങള്ക്ക് ഒപ്പമുണ്ടെന്ന് സര്ക്കാര് പറയുന്നതില് എന്താണ് തെറ്റെന്ന് കോടതിയുടെ ചോദ്യം; സ്വകാര്യതയുടെ ലംഘനമല്ലെന്നും ഹൈക്കോടതിയുടെ നിരീക്ഷണം
സ്പാര്ക്ക് ഡാറ്റാ ചോര്ച്ചയില് സര്ക്കാറിന് ആശ്വാസം
കൊച്ചി: സര്ക്കാര് ജീവനക്കാരുടെ ഫോണിലേക്ക് മുഖ്യമന്ത്രിയുടെ ഓഫീസില് നിന്നും ഡി എ സന്ദേശം അയച്ചതില് നിയമവിരുദ്ധതയില്ലെന്ന് കേരളാ ഹൈക്കോടതി. ക്ഷേമ രാഷ്ട്രീയത്തില് നല്ല ഭരണനിര്വ്വഹണത്തിന്റെ ഭാഗമാണ് ഇതെല്ലാമെന്നും കോടതി നിരീക്ഷിച്ചു. ഭരണനിര്വ്വഹണത്തിന്റെ ഭാഗമായി സന്ദേശങ്ങള് അയക്കാം. ഡി എ സ്വകാര്യതയുടെ ലംഘനമല്ലെന്നും ഹൈക്കോടതി നിരീക്ഷിച്ചു. ഇതുസംബന്ധിച്ചുള്ള ഹര്ജി ഹൈക്കോടതി തള്ളി. സിഎംഡിആര്എഫിലേക്ക് സംഭാവന നല്കിയവര്ക്ക് നന്ദിസന്ദേശം അയയ്ക്കാനും ഹൈക്കോടതി അനുമതി നല്കി.
ജീവനക്കാരുടെ അവകാശങ്ങള്ക്ക് ഒപ്പമുണ്ടെന്ന് സര്ക്കാര് പറയുന്നതില് എന്താണ് തെറ്റ് എന്ന് ഹൈക്കോടതി നേരത്തെ ചോദിച്ചിരുന്നു. ഡിഎ സന്ദേശത്തില് എന്താണ് നിയമ വിരുദ്ധത. ക്ഷേമരാഷ്ട്രത്തില് ഭരണനിര്വ്വഹണം എളുപ്പമാക്കുന്നതിനാണ് സാങ്കേതിക വിദ്യ. മുഖ്യമന്ത്രിയുടെ വ്യക്തിഗത അക്കൗണ്ടില് നിന്നല്ല, ഐടി മിഷന്റെ അക്കൗണ്ടില് നിന്നാണ് ഡിഎ സന്ദേശം അയച്ചത്. മൂന്നാംകക്ഷിയല്ല സന്ദേശം അയയ്ക്കുന്നത്. ഇത് നല്ല ഭരണ നിര്വ്വഹണത്തിന്റെ ഭാഗമല്ലേയെന്നുമായിരുന്നു ഹര്ജിക്കാരനോട് ഹൈക്കോടതി ചോദിച്ചത്.
സന്ദേശം അയയ്ക്കുന്നതിനുള്ള സമ്പൂര്ണ്ണ ചുമതല ഐടി മിഷനാണ് എന്ന് ഐടി മിഷനിലെ ഉദ്യോഗസ്ഥന് ഹൈക്കോടതിയെ അറിയിച്ചത്. ഐടി മിഷന് നിരവധി സെന്ഡര് ഐഡി ഉണ്ട്. അതിലൊന്നാണ് ചീഫ് മിനിസ്റ്ററുടെ ഓഫീസ്, കേരള എന്ന ഐഡി. മെറ്റ വെരിഫൈ ചെയ്ത ഐഡി ആണ് സന്ദേശങ്ങള്ക്കായി ഉപയോഗിക്കുന്നത്. കുറ്റകൃത്യങ്ങള് ഒഴിവാക്കാനാണ് മെറ്റയുടെ വെരിഫൈഡ് അക്കൗണ്ട് ഉപയോഗിക്കുന്നതെന്നും ഐടി മിഷനിലെ ഉദ്യോഗസ്ഥന് ഹൈക്കോടതിയില് നേരിട്ട് ഹാജരായി വിശദീകരിച്ചിരുന്നു.
സര്ക്കാര് ജീവനക്കാര് ഔദ്യോഗിക ആവശ്യങ്ങള്ക്കായി നല്കിയ വ്യക്തിഗത വിവരങ്ങളില് നിന്ന് ഫോണ് നമ്പറുകള് ശേഖരിച്ച് രാഷ്ട്രീയ പ്രചാരണത്തിനായി ഉപയോഗിച്ചതായാണ് ആരോപണം. ഡിഎ 10ശതമാനം അനുവദിച്ച് ഉത്തരവിറങ്ങിയതിന് പിന്നാലെ സര്ക്കാര് ജീവനക്കാരുടെ വാട്ട്സാപ്പ് നമ്പറിലേക്ക് മുഖ്യമന്ത്രിയുടെ സന്ദേശം വന്നിരുന്നു. ജീവനക്കാരുടെ സ്വകാര്യ ഫോണ് നമ്പറുകളിലേക്ക് ഗ്രൂപ്പായി സന്ദേശമയച്ചതിലൂടെ ശമ്പളസോഫ്റ്റുവെയറായ സ്പാര്ക്കില് നിന്നുള്ള ഡാറ്റ ചോര്ത്തിയെന്നും ജീവനക്കാരുടെ സ്വകാര്യത ലംഘിച്ചെന്നും പ്രതിപക്ഷ സംഘടനകള് ആരോപിച്ചിരുന്നു. ജീവനക്കാരുടെ പേര് പറഞ്ഞ് അഭിസംബോധന ചെയ്താണ് മുഖ്യമന്ത്രിയുടെ സന്ദേശം.