കാത്തിരിപ്പിന് വിരാമമിട്ട് ഇന്ന് തൃശൂര്‍ പൂരം; വൈകിട്ട് 5.30ന് കുടമാറ്റം; ഉച്ചയ്ക്ക് രണ്ടിന് നടക്കുന്ന ഇലഞ്ഞിത്തറമേളത്തിന് കിഴക്കൂട്ട് അനിയന്‍ മാരാര്‍ പ്രമാണിയാകും; വെടിക്കെട്ട് നാളെ പുലര്‍ച്ചെ മൂന്ന് മണിക്ക്: പൂരാവേശത്തില്‍ ലോകമെമ്പാടുമുള്ള മലയാളികള്‍
ഇന്ന് തൃശൂര്‍ പൂരം
തൃശൂര്‍: കാത്തിരിപ്പിന് വിരാമമിട്ട് തൃശൂര്‍ പൂരം ഇന്ന്. പൊന്‍തിളക്കമാര്‍ന്ന നെറ്റിപ്പട്ടവും കോലവും ആടയാഭരണങ്ങളുമണിഞ്ഞ് നെയ്തലക്കാവ് ഭഗവതിയുടെ തിടമ്പേറ്റിയ കൊമ്പന്‍ കൊച്ചിന്‍ ദേവസ്വം ശിവകുമാര്‍ വടക്കുന്നാഥ ക്ഷേത്രത്തിന്റെ തെക്കേ ഗോപുരനട തുറന്നു. പുഷ്പവൃഷ്ടിയോടെ ജനങ്ങള്‍ ആരവമുയര്‍ത്തിയപ്പോള്‍ ശിവകുമാര്‍ തുമ്പിക്കൈ ഉയര്‍ത്തി. തിങ്കള്‍ പകല്‍ 12.45നായിരുന്നു പൂരവിളംബരം. കണിമംഗലം ശാസ്താവിന്റെ വരവോടെ ഘടകപൂരങ്ങള്‍ക്ക് തുടക്കമാവും.ഇത്തവണ കൊമ്പന്‍ തെച്ചിക്കോട്ടുകാവ് രാമചന്ദ്രന്‍ ചെമ്പൂക്കാവ് ഭഗവതിയുടെ തിടമ്പേറ്റും.
പാറമേക്കാവ്, തിരുവമ്പാടി ഭഗവതിമാരും 8 ഘടക ക്ഷേത്രങ്ങളില്‍ നിന്നുമുള്ള ഭഗവതി ശാസ്താമാരും ഇന്ന് വടക്കുംനാഥനെ വണങ്ങാനെത്തും. രാവിലെ 7.30ന് കണിമംഗലം ശാസ്താവ് ആണ് ആദ്യം എഴുന്നള്ളി എത്തുക. തുടര്‍ന്ന് ചെമ്പൂക്കാവ് ഭഗവതി, പനമുക്കുംപിള്ളി ശാസ്താവ്, കാരമുക്ക് ഭഗവതി, ലാലൂര്‍ ഭഗവതി, ചൂരക്കോട്ടുകാവ് ഭഗവതി, അയ്യന്തോള്‍ ഭഗവതി, നെയ്തലക്കാവ് ഭഗവതി എന്ന ക്രമത്തില്‍ എഴുന്നള്ളിപ്പുകള്‍ വടക്കുന്നാഥ ക്ഷേത്രത്തില്‍ പ്രവേശിക്കും.
പകല്‍ 11.30നാണ് തിരുവമ്പാടി വിഭാഗത്തിന്റെ മഠത്തില്‍ വരവ്. തിരുവമ്പാടി ചന്ദ്രശേഖരന്‍ തിടമ്പേറ്റും. പഞ്ചവാദ്യത്തിന് കോങ്ങാട് മധു പ്രമാണിയാവും. നായ്ക്കനാലില്‍ എത്തിയാല്‍ പഞ്ചവാദ്യം പാണ്ടിമേളത്തിന് വഴിമാറും. ചേരാനല്ലൂര്‍ ശങ്കരന്‍കുട്ടിമാരാര്‍ പ്രമാണിയായി ശ്രീമൂലസ്ഥാനത്തെത്തി കൊട്ടിക്കയറ്റം. പകല്‍ പന്ത്രണ്ടോടെ പാറമേക്കാവ് എഴുന്നള്ളിപ്പ് തുടങ്ങും. ഗുരുവായൂര്‍ നന്ദന്‍ തിടമ്പേറ്റും. രണ്ടോടെ കിഴക്കൂട്ട് അനിയന്‍മാരാര്‍ പ്രമാണിയായി ഇലഞ്ഞിത്തറ മേളം തുടങ്ങും. വൈകിട്ട് 5.30ന് തെക്കോട്ടിറക്കവും വര്‍ണക്കുടമാറ്റവും. രാത്രി പാറമേക്കാവ് പഞ്ചവാദ്യത്തിന് ചോറ്റാനിക്കര നന്ദപ്പന്‍മാരാര്‍ പ്രമാണിയാവും. ബുധനാഴ്ച പുലര്‍ച്ചെയാണ് വെടിക്കെട്ട്. രാവിലെ പകല്‍പൂരത്തിനുശേഷം ഉപചാരം ചൊല്ലി പിരിയും.
11.30ന് തിരുവമ്പാടി ഭഗവതിയുടെ എഴുന്നള്ളിപ്പ് തെക്കേ മഠത്തിനു മുന്നിലെത്തുമ്പോള്‍ നടക്കുന്ന മഠത്തില്‍ വരവ് പഞ്ചവാദ്യം കാണാന്‍ ആയിരങ്ങള്‍ അവിടെ ഇടം പിടിച്ചിരിക്കും. കോങ്ങാട് മധു ആണ് പ്രമാണം. പാറമേക്കാവില്‍ നിന്ന് ഉച്ചയ്ക്ക് 12ന് ആരംഭിക്കുന്ന എഴുന്നള്ളിപ്പിന് ചെമ്പട മേളം അകടമ്പടിയായി ഉണ്ടാകും. ഉച്ചയ്ക്ക് രണ്ടിന് വടക്കുന്നാഥ ക്ഷേത്രത്തിനകത്ത് ഇലഞ്ഞിത്തറ മേളമായി അതു മാറും. കിഴക്കൂട്ട് അനിയന്‍ മാരാര്‍ പ്രമാണം. അവിടെയുമുണ്ടാകും ജനസഞ്ചയം. വൈകിട്ട് 5.30ന് തെക്കേനടയില്‍ കുടമാറ്റം. നാളെ പുലര്‍ച്ചെ 3ന് വെടിക്കെട്ട്. നാളെ പുലര്‍ച്ചെ മൂന്ന് മണിക്കാണ് ഇരുവിഭാഗങ്ങളുടെയും വെടിക്കെട്ട്.
അടിയന്തര സഹായത്തിന് കണ്‍ട്രോള്‍ റൂമുകള്‍
തൃശൂര്‍ന്മ പൂരനഗരിയിലെത്തുന്നവരുടെ സുരക്ഷയ്ക്കായി തേക്കിന്‍കാട് മൈതാനത്ത് ഇന്നു രാവിലെ 6 മുതല്‍ പൊലീസിന്റെ പ്രത്യേക കണ്‍ട്രോള്‍ റൂം പ്രവര്‍ത്തനം ആരംഭിക്കും. വസ്തുക്കള്‍ നഷ്ടപ്പെടുക, കൂട്ടംതെറ്റി പോവുക എന്നിവ ഉണ്ടായാല്‍ ഉടന്‍ ഇടപെടാന്‍ 4 മിനി കണ്‍ട്രോള്‍ റൂമുകളും സജ്ജമാണ്. നടുവിലാല്‍ ജംക്ഷന്‍, ബിനി ജംക്ഷനു സമീപമുള്ള പെട്രോള്‍ പമ്പിനു സമീപം, ജോയ് ആലുക്കാസ് ജ്വല്ലറിക്കു സമീപം, ജയ ബേക്കറി ജംക്ഷന്‍ എന്നിവിടങ്ങളിലാണ് മിനി കണ്‍ട്രോള്‍ റൂമുകള്‍. സ്ത്രീകള്‍ക്കും കുട്ടികള്‍ക്കും കുടമാറ്റം കാണുന്നതിനായി പൂരം കണ്‍ട്രോള്‍ റൂമിനു സമീപം പ്രത്യേക സ്ഥലം ഒരുക്കിയിട്ടുണ്ട്. പ്രത്യേക കണ്‍ട്രോള്‍ റൂം നമ്പര്‍: 0487 2422003, 80861 00100.
പൊലീസ്
* കണ്‍ട്രോള്‍ റൂം: 100, 0487 2424193
* തേക്കിന്‍കാട് മൈതാനത്തെ കണ്‍ട്രോള്‍ റൂം: 0487 2422003, 80861 00100
ആംബുലന്‍സ് സേവനം
* ആക്ട്‌സ്: 90371 61099, 98477 31900
* സേവാഭാരതി: 99460 08800, 94978 00372
* 108 ആംബുലന്‍സ്: ഫോണ്‍ 108
ഇന്നും നാളെയും കെഎസ്ആര്‍ടിസിയുടെ അധിക സര്‍വീസ്
തൃശൂര്‍ പൂരത്തോടനുബന്ധിച്ച് ചൊവ്വയും ബുധനും കെഎസ്ആര്‍ടിസിയുടെ 65 ബസുകള്‍ അധിക സര്‍വീസ് നടത്തും. 51 ദീര്‍ഘദൂര ബസുകളും 14 ഓര്‍ഡിനറി ബസുകളുമാണ് പ്രത്യേക സര്‍വീസ് നടത്തുന്നത്. ഫാസ്റ്റിന് മുകളിലുള്ള സര്‍വീസുകള്‍ തൃശൂര്‍ കെഎസ്ആര്‍ടിസി ബസ് സ്റ്റാന്‍ഡ് കേന്ദ്രീകരിച്ചും ഓര്‍ഡിനറി സര്‍വീസുകള്‍ ശക്തന്‍ സ്റ്റാന്‍ഡ് കേന്ദ്രീകരിച്ചുമാണ് സര്‍വീസ് നടത്തുക. ഗതാഗത സൗകര്യം ഉള്‍പ്പെടെ ആവശ്യമായ എല്ലാ ക്രമീകരണങ്ങളും ജില്ലാ ഭരണകേന്ദ്രത്തിന്റെ നേതൃത്വത്തില്‍ ഒരുക്കിയിട്ടുണ്ടെന്ന് കലക്ടര്‍ അര്‍ജുന്‍ പാണ്ഡ്യന്‍ പറഞ്ഞു.
പൂര ദിവസങ്ങളില്‍ കെഎസ്ആര്‍ടിസിയും സ്വകാര്യ ബസുകളും പ്രത്യേക സര്‍വീസ് നടത്തും. ചൊവ്വ, ബുധന്‍ ദിവസങ്ങളില്‍ ദേശീയപാതയിലെ ടോള്‍ ഗേറ്റില്‍ ഉള്‍പ്പെടെ തിരക്ക് നിയന്ത്രിക്കാന്‍ പ്രത്യേക ക്രമീകരണങ്ങള്‍ ഒരുക്കിയിട്ടുണ്ട്. ?ഗതാ?ഗത നിയന്ത്രണത്തിന് അധികമായി പൊലീസിനെയും വിന്യസിക്കും.
തൃശൂരില്‍ നിന്ന് - പാലക്കാട്, കോഴിക്കോട്, ചാലക്കുടി എന്നീ റൂട്ടുകളിലേക്ക് പകല്‍ 10 മിനിറ്റ് ഇടവേളയിലും രാത്രി 20 മിനിറ്റ് ഇടവേളയിലും കെഎസ്ആര്‍ടിസി സര്‍വീസ് നടത്തും. തൃശൂര്‍ - പെരിന്തല്‍മണ്ണ, തൃശൂര്‍ ഗുരുവായൂര്‍ റൂട്ടില്‍ പകല്‍ സമയം 30 മിനിറ്റ് ഇടവേളയിലും രാത്രി തിരക്കനുസരിച്ചും. തൃശൂര്‍മാള റൂട്ടില്‍ പകല്‍ 20 മിനിറ്റിലും രാത്രി തിരക്കനുസരിച്ചും. തൃശൂര്‍-എറണാകുളം റൂട്ടില്‍ പകല്‍ 10 മിനിറ്റിലും രാത്രി 15 മിനിറ്റിലും തൃശൂര്‍ കോട്ടയം റൂട്ടില്‍ പകല്‍ 15 മിനിറ്റിലും രാത്രി 20 മിനിറ്റിലും സര്‍വീസ് നടത്തും.
ആറിന് വൈകിട്ട് ഏഴിന് കുടമാറ്റം കഴിയുമ്പോഴും മെയ് ഏഴിന് പുലര്‍ച്ചെ അഞ്ചിന് ശേഷവും സാധാരണ സര്‍വീസുകള്‍ക്കുപുറമെ മാള, ഇരിങ്ങാലക്കുട, കൊടുങ്ങല്ലൂര്‍, ചാലക്കുടി, കോട്ടയം, എറണാകുളം,കോഴിക്കോട്, ഗുരുവായൂര്‍, പൊന്നാനി, നിലമ്പൂര്‍, പാലക്കാട്, വടക്കഞ്ചേരി, ചിറ്റൂര്‍ എന്നീ സ്ഥലങ്ങളിലേക്ക് പൂള്‍ ചെയ്ത ബസുകളുടെ അഡീഷണല്‍ ട്രിപ്പുകളും ഉണ്ടാകും.