'ദേശീയ സ്വാതന്ത്ര്യത്തിന് വേണ്ടിയുള്ള സവര്‍ക്കറുടെ പോരാട്ടത്തെ കണ്ടില്ലെന്ന് നടിക്കാനാകില്ല; അടിസ്ഥാന ആശയം നിരീശ്വരവാദമായിരുന്നു; കോണ്‍ഗ്രസ് നേതാക്കളെക്കാള്‍ ത്യാഗം സഹിച്ച വ്യക്തി'; വി ഡി സവര്‍ക്കറെ പുകഴ്ത്തിയ വാട്‌സാപ്പ് ശബ്ദസന്ദേശത്തിന് നടപടി; സിപിഐ നേതാവിനെ സസ്പെന്‍ഡ് ചെയ്തു

ആലപ്പുഴ: വി ഡി സവര്‍ക്കറെ പ്രശംസിച്ച ആലപ്പുഴ വെണ്‍മണി ലോക്കല്‍ സെക്രട്ടറിക്കെതിരെ സിപിഐയില്‍ നടപടി. ഷുഹൈബ് മുഹമ്മദിനെ പാര്‍ട്ടിയുടെ പ്രാഥമിക അംഗത്വത്തില്‍ നിന്ന് സസ്‌പെന്റ് ചെയ്തു. ഇന്നലെയായിരുന്നു വാട്‌സാപ്പ് ഗ്രൂപ്പിലൂടെ നടന്ന സംഭാഷണത്തില്‍ ഷുഹൈബ് വി ഡി സവര്‍ക്കറെ പുകഴ്ത്തികൊണ്ട് ശബ്ദ സംഭാഷണം നടത്തിയത്. ഒരു കോണ്‍ഗ്രസ് നേതാവുമായുള്ള തര്‍ക്കത്തെ തുടര്‍ന്ന് വാട്‌സാപ്പ് ഗ്രൂപ്പിലാണ് ശുഹൈബ് മുഹമ്മദ് ഇങ്ങനെയൊരു സന്ദേശമയച്ചത്.

'വലിയ ചരിത്ര വിദ്യാര്‍ത്ഥി ആണെന്ന് പറഞ്ഞിട്ട് ഇന്ത്യന്‍ ദേശീയ സ്വാതന്ത്ര്യത്തിന് വേണ്ടിയുള്ള സവര്‍ക്കറുടെ പോരാട്ടത്തെ കണ്ടില്ലെന്ന് നടിക്കാനാകില്ല. സവര്‍ക്കര്‍ ബി ജെ പി എന്ന ഹിന്ദുത്വ തീവ്ര നിലപാടുള്ള ഒരു പ്രസ്ഥാനത്തിന് രൂപം കൊടുത്തു എന്നതിന് മുന്‍പ് ഒരു സവര്‍ക്കര്‍ ഇന്ത്യ മഹാരാജ്യത്ത് ജീവിച്ചിട്ടുണ്ടായിരുന്നു. അദ്ദേഹത്തിന്റെ അടിസ്ഥാന ആശയം നിരീശ്വരവാദമായിരുന്നു. ഇന്ത്യന്‍ സ്വാതന്ത്ര്യ സമരത്തിനായി കോണ്‍ഗ്രസ് നേതാക്കളെക്കാള്‍ കൂടുതല്‍ ത്യാഗം സഹിച്ച വ്യക്തിയാണെന്നും' - ശബ്ദ സന്ദേശത്തില്‍ പറയുന്നു.

സവര്‍ക്കര്‍ സ്വാതന്ത്ര്യ സമര സേനാനി ആണെന്നും പോരാട്ടത്തില്‍ അദ്ദേഹം നിര്‍ണായക പങ്ക് വഹിച്ചിരുന്നു, ആന്‍ഡമാനിലെ ജയിലില്‍ കിടന്ന് സ്വാതന്ത്ര്യ സമര പോരാളികളെ പരുവപ്പെടുത്തിയെടുക്കുന്നതില്‍ വി ഡി സവര്‍ക്കര്‍ നിര്‍ണായക പങ്ക് വഹിച്ചിട്ടുണ്ടെന്നുമായിരുന്നു ലോക്കല്‍ സെക്രട്ടറി വാട്‌സാപ്പ് ഗ്രൂപ്പിലൂടെ കോണ്‍ഗ്രസ് നേതാവിനോട് പറഞ്ഞത്.

ആന്‍ഡമാനിലെ ജയിലില്‍ കിടന്ന് സ്വാതന്ത്ര്യ സമര പോരാളികളെ പരുവപ്പെടുത്തിയെടുത്തത് സവര്‍ക്കര്‍ ആയിരുന്നുവെന്നും കൂടാതെ ദേശീയത ഊട്ടിയുറപ്പിക്കുന്നതിന് പ്രധാന പങ്കുവഹിച്ച നേതാവാണ് സവര്‍ക്കറെന്നും ശുഹൈബ് പറഞ്ഞു. സവര്‍ക്കറെയും കോണ്‍ഗ്രസ് നേതാക്കളെയും താരതമ്യം ചെയ്തുകൊണ്ടായിരുന്നു ശുഹൈബിന്റെ മറുപടി.എന്നാല്‍ പിന്നീട് ഇക്കാര്യത്തില്‍ വിശദീകരണവുമായി ശുഹൈബ് രംഗത്തെത്തി. തന്റെ ഫോണ്‍ ആരോ ഹാക്ക് ചെയ്തതാണെന്നാണ് ശുഹൈബ് പറയുന്നത്. എന്നാല്‍ ഇക്കാര്യം ഗ്രൂപ്പിലുള്ള മറ്റ് അംഗങ്ങള്‍ സ്ഥിരീകരിച്ചിട്ടില്ല. ഗ്രൂപ്പില്‍ നടന്നത് വലിയ ഒരു ചര്‍ച്ച ആയിരുന്നെന്നും ഒരു കോണ്‍ഗ്രസ് നേതാവിനോട് വിജയിക്കുന്നതിന് വേണ്ടിയാണ് ഇത്തരത്തിലുള്ള സവര്‍ക്കര്‍ സ്നേഹവും പുകഴ്ത്തലും നടത്തിയതെന്നാണ് അംഗങ്ങള്‍ പറയുന്നത്.

വിവാദ സന്ദേശം പുറത്തുവന്നതിന് പിന്നാലെയാണ് വെണ്മണി ലോക്കല്‍ സെക്രട്ടറി സ്ഥാനത്ത് നിന്നും സിപിഐയുടെ പ്രാഥമിക അംഗത്വത്തില്‍ നിന്നും ഷുഹൈബിനെ പുറത്താക്കിക്കൊണ്ട് സംസ്ഥാന കമ്മിറ്റി തീരുമാനം എടുത്തത്. ജില്ലാ കമ്മിറ്റിയുടെ നിര്‍ദേശപ്രകാരം കൂടിയാണ് ഈ നടപടി. എന്നാല്‍ തന്റെ വാട്‌സാപ്പ് നമ്പര്‍ ഹാക്ക് ചെയ്ത് തെറ്റായ ശബ്ദസന്ദേശം മറ്റാരോ അയച്ചതാണെന്നായിരുന്നു ഷുഹൈബിന്റെ മറുപടി. എന്നാല്‍ പാര്‍ട്ടി ഇത് നേതാവിന്റെ തന്നെയാണെന്ന് സ്ഥിരീകരിക്കുകയായിരുന്നു. രാഷ്ട്രീയ പ്രവര്‍ത്തകരും നേതാക്കളും അടക്കം 418 അംഗങ്ങളുള്ള ഗ്രൂപ്പിലാണ് സവര്‍ക്കറെ പുകഴ്ത്തിക്കൊണ്ടുള്ള സിപിഐ നേതാവ് ഷുഹൈബിന്റെ ശബ്ദസന്ദേശം.