കുടുംബത്തെ മറയാക്കി മയക്കുമരുന്ന് കടത്ത്: ഏഴു പേരെ അറസ്റ്റു ചെയ്ത് ഷാര്‍ജ പോലീസ്

ഷാര്‍ജ: കുടുംബത്തെ മറയാക്കി മയക്കു മരുന്ന് കടത്തിയ കേസില്‍ ഏഴ് പേരെ ഷാര്‍ജ പൊലീസ് അറസ്റ്റ് ചെയ്തു. ഇതോടെ കാനഡയില്‍ നിന്നും സ്‌പെയിനില്‍ നിന്നും യുഎഇയിലേക്ക് മയക്കുമരുന്ന് കടത്തുന്ന ആഗോള മയക്കു മരുന്ന് ശൃംഖല പൊലീസ് തകര്‍ത്തു. ഇവരില്‍നിന്ന് 131 കിലോഗ്രാം മയക്കു മരുന്നുകളും സൈക്കോ ട്രോപിക് ലഹരി വസ്തുക്കളും 5.35 ദശലക്ഷം ദിര്‍ഹം വിലമതിക്കുന്ന ളും 5.35 ദശലക്ഷം ദിര്‍ഹം വിലമതിക്കുന്ന 9,945 മയക്കുമരുന്ന് ഗുളികകളും അധികൃതര്‍ പിടിച്ചെടുത്തു.

കുറ്റകൃത്യങ്ങള്‍ നടത്തുന്നതിനെ കുടുംബത്തെ മറയാക്കിയ അറബ് വംശജനായ കുടുംബനാഥന്‍ ഉള്‍പ്പെടെ ഏഴ് പ്രതികളെയാണ് അറസ്റ്റ് ചെയ്തത്. സംശയം വരാതിരിക്കാനായി ഭാര്യയും കുട്ടികളുമായി പതിവായി യുഎഇയിലേക്ക് യാത്ര ചെയ്യുകയായിരുന്നു ഇയാള്‍. മയക്കുമരുന്ന് വിരുദ്ധ ഏജന്‍സികള്‍ മുഖ്യപ്രതിയുടെ നീക്കങ്ങള്‍ സൂക്ഷ്മമായി നിരീക്ഷിക്കുകയും ഒടുവില്‍ തന്ത്രപരമായി ഈ സംഘത്തെ പിടികൂടുകയുമായിരുന്നു. ചോദ്യം ചെയ്യലില്‍ കുടുംബവുമായി സഹകരിച്ച് മയക്കുമരുന്ന് കടത്തുന്നതില്‍ പ്രധാന പങ്കു വഹിച്ചതായി മുഖ്യപ്രതി സമ്മതിച്ചു.

നിയമവിരുദ്ധ ലഹരി വസ്തുക്കള്‍ സ്വീകരിക്കുന്നതിലും, കടത്തുന്നതിലും,, വിതരണം ചെയ്യുന്നതിലും ഉള്‍പ്പെട്ട മറ്റ് ഏഷ്യന്‍ പൗരന്മാരെ കൂടി കൂടുതല്‍ അന്വേഷണത്തില്‍ പിടികൂടി. കാനഡയിലെ ടൊറന്റോ തുറമുഖം മുതല്‍ സ്‌പെയിനിലെ മലാഗ വഴി യുഎഇ തുറമുഖം വരെ വ്യാപിച്ചുകിടക്കുന്ന സങ്കീര്‍ണമായ കള്ളക്കടത്ത് പാതയും അധികൃതര്‍ കണ്ടെത്തി.

ആഗോള നിയമ നിര്‍വഹണ സംവിധാനങ്ങളുമായുള്ള ഏകോപനത്തിലൂടെയാണ് അന്താരാഷ്ട്ര മയക്കുമരുന്ന് സംഘങ്ങള്‍ക്കെതിരായ നടപടികള്‍ യുഎഇ അധികൃതര്‍ ശക്തമാക്കിയത്. ഏഴു പ്രതികളെയും കസ്റ്റഡിയിലെടുത്ത് ഇതിനകം ജുഡീഷ്യറിക്ക് കൈമാറിയിട്ടുണ്ട്. വിദേശത്തുള്ള കൂടുതല്‍ ആളുകളെ കണ്ടെത്തുന്നതിനായി അന്താരാഷ്ട്ര പങ്കാളികളുമായി സഹകരിച്ച് അന്വേഷണം തുടരുകയാണ്.