സ്പെയിനിലെ മജോര്‍ക്കയില്‍ ആഞ്ഞടിച്ചു കൊടുങ്കാറ്റ്; ദ്വീപിന്റെ വിവിധ ഭാഗങ്ങളില്‍ 40 അടി ഉയരത്തില്‍ വരെ തിരമാലകള്‍; ആലിപ്പഴ വര്‍ഷത്തോടെ തണുത്തുവിറയ്ക്കുന്നു
സ്പെയിനിലെ മജോര്‍ക്കയില്‍ ആഞ്ഞടിച്ചു കൊടുങ്കാറ്റ്
മാഡ്രിഡ്: സ്പെയിനിലെ മജോര്‍ക്കയില്‍ ആഞ്ഞടിച്ച കൊടുങ്കാറ്റില്‍ ദ്വീപിന്റെ വിവിധ ഭാഗങ്ങളില്‍ 40 അടി ഉയരത്തില്‍ വരെ തിരമാലകള്‍ പ്രത്യക്ഷപ്പെട്ടു. ആലിപ്പഴ വര്‍ഷം കൂടിയുണ്ടായതോടെ ഈ വിനോദ സഞ്ചാര കേന്ദ്രം വെള്ളപ്പുടവ പുതച്ച രീതിയിലാണ് കാണപ്പെടുന്നത്. വ്യാഴാഴ്ച മജോര്‍ക്കയില്‍ ഓറഞ്ച് സ്റ്റോം അലര്‍ട്ട് നല്‍കിയിരുന്നതായി സ്പെയിനിലെ കാലാവസ്ഥാ ഏജന്‍സിയായ എയ്‌മെറ്റ് അറിയിച്ചിരുന്നു. ദ്വീപിന്റെ കിഴക്കന്‍ തീരങ്ങളില്‍ ഉയരത്തിലുള്ള തിരമാലകള്‍ പ്രത്യക്ഷപ്പെടുമെന്നും മുന്നറിയിപ്പില്‍ ഉണ്ടായിരുന്നു.
മണിക്കൂറില്‍ 90 മൈല്‍ വരെ വേഗതയുള്ള കാറ്റ് ആഞ്ഞടിച്ചതോടെ തണുപ്പും കനത്തു. ആലിപ്പഴ വര്‍ഷം കൂടി ആയതോടെ, സാധാരണയായി വെയില്‍ പുതച്ചു കിടക്കാറുള്ള വീഥികളെല്ലാം തന്നെ ഐസിന്റെ ആവരണമണിഞ്ഞു. ദ്വീപിന്റെ വടക്ക് കിഴക്ക് ഭാഗത്തുള്ള കാലാ രജാഡ എന്ന ടൂറിസ്റ്റ് റിസോര്‍ട്ടിലായിരുന്നു ഇതിന്റെ പ്രഭാവം ഏറ്റവുമധികം അനുഭവപ്പെട്ടത്.
തെക്കന്‍ യൂറോപ്പില്‍ ആഞ്ഞടിച്ച ശൈത്യക്കൊടുങ്കാറ്റിന്റെ ഫലമായിട്ടായിരുന്നു അപ്രതീക്ഷിതമായ ആലിപ്പഴ വര്‍ഷം. തൊട്ടടുത്തുള്ള മെനോര്‍ക്ക ദ്വീപിലും താരതമ്യേന തണുത്ത കാലാവസ്ഥയായിരുന്നു.