ഡബിള്‍ ഡക്കര്‍ ബസ്സില്‍ നിന്നും വീണ് യുവാവിന് ദാരുണാന്ത്യം; സംഭവത്തില്‍ അന്വേഷണം നടക്കുന്നതായി പോലീസ്
ലണ്ടന്‍: ഡബിള്‍ ഡെക്കര്‍ ബസ്സിന്റെ ഏണിപ്പടിയില്‍ നിന്നും യുവാവ് വീണ് മരിച്ചു. ബ്രിട്ടണിലെ ഓക്സ്‌ഫോര്‍ഡ് സിറ്റി സെന്ററിലായിരുന്നു സംഭവം. ഒക്ടോബര്‍ 26 ന് വെസ്റ്റ് ഗെയ്റ്റ് ഷോപ്പിംഗ് സെന്ററിന് മുന്‍പില്‍ വെച്ചുണ്ടായ അപകടത്തില്‍ ഇയാള്‍ക്ക് ഗുരുതരമായ പരിക്കുകള്‍ ഏറ്റിരുന്നു. തെംസ് വാലി എയര്‍ ആംബുലന്‍സ് സര്‍വീസും, തെംസ് വാലി പോലീസും ഇയാളെ ആശുപത്രിയില്‍ എത്തിച്ചെങ്കിലും കഴിഞ്ഞ ദിവസം മരിക്കുകയായിരുന്നു.
അപകടത്തെ കുറിച്ച് കൂടുതല്‍ അന്വേഷിക്കുകയാണെന്ന് പോലീസ് പറഞ്ഞു. സംശയസ്പദമല്ലാത്ത മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്. ബസിന് അകത്ത് നടന്ന സംഭവത്തിലെ സിസിടിവി ദൃശ്യങ്ങള്‍ ബസ് കമ്പിനി പോലീസിന് കൈമാറിയിട്ടുണ്ട്. സംഭവത്തില്‍ മറ്റാരും ഉള്‍പ്പെട്ടിട്ടില്ല എന്ന് വ്യക്തമായാതായി സിസിടിവി ദൃശ്യങ്ങള്‍ പരിശോധിച്ച ശേഷം പോലീസ് വ്യക്തമാക്കി.
ബസില്‍ നിന്ന് വീണ ഉടനെ ബസില്‍ ഉണ്ടായിരുന്ന ആളുകള്‍ ഫസ്റ്റ് എയിഡ് നല്‍കിയിരുന്നു. തുടര്‍ന്ന് ആംബുലന്‍സ് ആശുപത്രിയിലേക്ക് മാറ്റുകയായിരുന്നു. അന്വേഷണത്തിന് ബസ് കമ്പിനിയുടെ എല്ലാ പിന്തുണ പോലീസിന് ഉണ്ടാകുമെന്ന് ഉടമ വ്യക്തമാക്കിയിട്ടുണ്ട്. ഈ സംഭവത്തില്‍ മറ്റാരും ഉള്‍പ്പെട്ടിട്ടില്ലാ എന്ന് ബസ് കമ്പിനിയും നേരത്തെ വ്യക്തമാക്കിയിരുന്നു.