സില്വര് ലൈനിന് കേന്ദ്രത്തിന്റെ ചുവപ്പ് കൊടി; 14% ഭൂമി കൊണ്ട് എന്ത് കാട്ടാനാണ്? സംസ്ഥാനത്തിന്റെ നിസ്സഹകരണം രാജ്യസഭയില് എണ്ണിപ്പറഞ്ഞ് കേന്ദ്രം; ശബരിപാതയിലും കേരളത്തിന് വിമര്ശനം; സംസ്ഥാനത്തിന് താത്പര്യമുണ്ടെങ്കില് ഇ ശ്രീധരന്റെ അതിവേഗ റെയില്വെ ആവാം; നിലപാട് വ്യക്തമാക്കി റെയില്വെ മന്ത്രി അശ്വനി വൈഷ്ണവ്
നിലപാട് വ്യക്തമാക്കി റെയില്വെ മന്ത്രി അശ്വനി വൈഷ്ണവ്
ന്യൂഡല്ഹി: വിവാദമായ സില്വര് ലൈന് അര്ദ്ധ അതിവേഗ റെയില് പദ്ധതി നിലവിലെ രൂപത്തില് പ്രായോഗികമല്ലെന്ന് കേന്ദ്ര സര്ക്കാര്. പദ്ധതി വലിയ പാരിസ്ഥിതിക ആഘാതം സൃഷ്ടിക്കുമെന്നും സാങ്കേതികമായി നടപ്പാക്കാന് പ്രയാസമാണെന്നും കേന്ദ്ര റെയില്വേ മന്ത്രി അശ്വനി വൈഷ്ണവ് രാജ്യസഭയില് വ്യക്തമാക്കി. ഹാരീസ് ബീരാന് എംപിയുടെ ചോദ്യത്തിന് മറുപടി നല്കുകയായിരുന്നു അദ്ദേഹം.
കേന്ദ്ര നിലപാടിലെ പ്രധാന മാറ്റങ്ങള്
സില്വര് ലൈന് പദ്ധതിയുടെ ഡിപിആര് (DPR) കേന്ദ്രം പൂര്ണ്ണമായി തള്ളിക്കളയുന്നില്ലെങ്കിലും, നിലവിലെ രൂപകല്പ്പനയില് അത് മുന്നോട്ട് കൊണ്ടുപോകാന് കഴിയില്ലെന്നാണ് കേന്ദ്രം വ്യക്തമാക്കുന്നത്. പകരം സംസ്ഥാനത്തിന് താല്പര്യമുണ്ടെങ്കില് അതിവേഗ റെയില് (High-Speed Rail) പദ്ധതി പരിഗണിക്കാമെന്ന ബദല് നിര്ദ്ദേശമാണ് മന്ത്രി മുന്നോട്ട് വെച്ചത്.
സംസ്ഥാന സര്ക്കാരിന്റെ നിസ്സഹകരണം
റെയില്വേ വികസന കാര്യങ്ങളില് കേരള സര്ക്കാരിന്റെ സഹകരണം തീരെ കുറവാണെന്ന് മന്ത്രി കുറ്റപ്പെടുത്തി. പദ്ധതിക്കായി ആവശ്യമായ ഭൂമിയുടെ 14 ശതമാനം മാത്രമാണ് ഇതുവരെ ഏറ്റെടുത്തത്. സംസ്ഥാനം ഭൂമി ഏറ്റെടുത്ത് നല്കാതെ എങ്ങനെ പദ്ധതി നടപ്പാക്കുമെന്ന് അദ്ദേഹം ചോദിച്ചു. സില്വര് ലൈനിന്റെ നിലവിലെ അലൈന്മെന്റ് വലിയ പരിസ്ഥിതി പ്രശ്നങ്ങള് ഉണ്ടാക്കുമെന്നും ഇത് പ്രായോഗികമല്ലെന്നും മന്ത്രി ആവര്ത്തിച്ചു.
ശബരിപാതയിലും മെല്ലപ്പോക്ക്
ശബരിപാതയ്ക്കായി ഭൂമി ഏറ്റെടുത്തത് റെയില്വേയുടെ സമ്മര്ദ്ദം മൂലമാണെന്നും ഇക്കാര്യത്തില് സംസ്ഥാനം കാണിക്കുന്ന മെല്ലെപ്പോക്ക് അംഗീകരിക്കാനാവില്ലെന്നും മന്ത്രി പറഞ്ഞു.
(SIA)സില്വര് ലൈനിനായി 2022-ല് ആരംഭിച്ച സാമൂഹികാഘാത പഠനം (SIA) ഇപ്പോള് വലിയ നിയമപരമായ അനിശ്ചിതത്വത്തിലാണ്. 2013-ലെ ഭൂമിയേറ്റെടുക്കല് നിയമപ്രകാരം വിജ്ഞാപനം പുറപ്പെടുവിച്ച് പഠനം ആരംഭിച്ച് മാസങ്ങള് കഴിഞ്ഞിട്ടും അത് പൂര്ത്തിയാക്കാന് സാധിച്ചിട്ടില്ല. വകുപ്പ് പ്രകാരം റിപ്പോര്ട്ട് സമര്പ്പിച്ച് 12 മാസത്തിനകം ഭൂമിയേറ്റെടുക്കല് വിജ്ഞാപനം വന്നില്ലെങ്കില് റിപ്പോര്ട്ട് റദ്ദാകും.
സില്വര് ലൈനില് പഠനം പൂര്ത്തിയായിട്ടില്ലാത്തതിനാല് റിപ്പോര്ട്ട് റദ്ദാകുമോ അതോ വിജ്ഞാപനം അസാധുവാകുമോ എന്നതില് അവ്യക്തത തുടരുന്നു. രാജ്യസഭയില് മന്ത്രി സംസ്ഥാന സര്ക്കാരിനെ വിമര്ശിച്ചതോടെ ഇടതുപക്ഷ അംഗങ്ങള് ബഹളം വെച്ചു. വികസന കാര്യങ്ങളില് കേന്ദ്രം രാഷ്ട്രീയം കലര്ത്തുകയാണെന്നും കേരളത്തെ അവഗണിക്കുകയാണെന്നും അവര് ആരോപിച്ചു.
എന്നാല്, റെയില്വേ വികസനത്തിന് സംസ്ഥാനം നല്കേണ്ട പ്രാഥമിക പിന്തുണ (ഭൂമി ഏറ്റെടുക്കല് ഉള്പ്പെടെ) ഉറപ്പാക്കണമെന്ന് കേന്ദ്രം കടുപ്പിച്ചു പറഞ്ഞു.'സംസ്ഥാനം പൂര്ണ്ണ പിന്തുണ നല്കുകയാണെങ്കില് അതിവേഗ റെയില് ഉള്പ്പെടെയുള്ള പദ്ധതികള് നടപ്പാക്കാന് കേന്ദ്രം തയ്യാറാണ്. എന്നാല് ഭൂമി ഏറ്റെടുക്കാതെ റെയില്വേയ്ക്ക് മാത്രം മുന്നോട്ട് പോകാനാകില്ല.' - അശ്വനി വൈഷ്ണവ് വ്യക്തമാക്കി.
തിരൂര് റെയില്വേ സ്റ്റേഷനും വികസനവുംയാത്രാക്ലേശം പരിഹരിക്കുന്നതിന്റെ ഭാഗമായി തിരൂര് റെയില്വേ സ്റ്റേഷനെക്കുറിച്ചുള്ള ചോദ്യത്തിന്, നിലവില് 90 ട്രെയിനുകള്ക്ക് അവിടെ സ്റ്റോപ്പ് ഉണ്ടെന്നും അമൃത് ഭാരത് പദ്ധതിയില് ഉള്പ്പെടുത്തി സ്റ്റേഷന് വികസിപ്പിക്കുന്നുണ്ടെന്നും മന്ത്രി അറിയിച്ചു. കൂടുതല് സ്റ്റോപ്പുകള് അനുവദിക്കുന്ന കാര്യം പരിശോധിക്കാമെന്നും അദ്ദേഹം കൂട്ടിച്ചേര്ത്തു.