ശബരിമല സ്വര്‍ണ്ണക്കൊള്ള: ദേവസ്വം ബോര്‍ഡ് പിരിച്ചു വിടണം; ക്രമക്കേടുകള്‍ കേന്ദ്ര ഏജന്‍സി അന്വേഷിക്കണം; ഗവര്‍ണറെ കണ്ട് ആവശ്യങ്ങള്‍ ഉന്നയിച്ച് ബിജെപി
ഗവര്‍ണറെ കണ്ട് ആവശ്യങ്ങള്‍ ഉന്നയിച്ച് ബിജെപി
തിരുവനന്തപുരം: ശബരിമലയിലെ സ്വര്‍ണ്ണക്കൊള്ള ഉള്‍പ്പെടെയുള്ള ഗുരുതരമായ ക്രമക്കേടുകളില്‍ കേന്ദ്ര ഏജന്‍സി അന്വേഷണം നടത്തണമെന്നും, നിലവിലെ ദേവസ്വം ബോര്‍ഡ് പിരിച്ചു വിടണമെന്നും ബിജെപി ആവശ്യപ്പെട്ടു. പാര്‍ട്ടിയുടെ സംസ്ഥാന അധ്യക്ഷന്‍ രാജീവ് ചന്ദ്രശേഖറിന്റെ നേതൃത്വത്തിലുള്ള സംഘം ഗവര്‍ണര്‍ ആരിഫ് മുഹമ്മദ് ഖാനുമായി കൂടിക്കാഴ്ച നടത്തിയാണ് ഈ ആവശ്യങ്ങള്‍ ഉന്നയിച്ചത്.
ശബരിമലയിലെ സ്വര്‍ണ്ണക്കൊള്ള സംബന്ധിച്ച വിഷയത്തില്‍ ദേവസ്വം ബോര്‍ഡ് വിജിലന്‍സിന്റെ മുപ്പത് വര്‍ഷത്തെ ഓഡിറ്റ് റിപ്പോര്‍ട്ടുകള്‍ പുറത്തുവിടണമെന്നും, കേന്ദ്രസര്‍ക്കാരിന്റെ നിയന്ത്രണത്തിലുള്ള ഏജന്‍സിയെക്കൊണ്ട് വിശദമായ അന്വേഷണം നടത്തണമെന്നും ബിജെപി ആവശ്യപ്പെട്ടു. ഇതിനോടൊപ്പം, ദേവസ്വം ബോര്‍ഡിന്റെ പ്രവര്‍ത്തനങ്ങളില്‍ സിഎജി ഓഡിറ്റ് നടത്തേണ്ടതിന്റെ ആവശ്യകതയും ഗവര്‍ണറുടെ ശ്രദ്ധയില്‍ പെടുത്തി.
കോട്ടയത്ത് സമാധാനപരമായി സമരം നടത്തിയ ബിജെപി പ്രവര്‍ത്തകര്‍ക്ക് നേരെ സിപിഎം, ഡിവൈഎഫ്‌ഐ പ്രവര്‍ത്തകര്‍ നടത്തിയ അക്രമങ്ങളെക്കുറിച്ചും ബിജെപി സംഘം ഗവര്‍ണറോട് പരാതിപ്പെട്ടു. ഈ വിഷയത്തില്‍ ഉചിതമായ അന്വേഷണം നടത്തണമെന്നും അവര്‍ ആവശ്യപ്പെട്ടു. മുന്‍ കേന്ദ്രമന്ത്രി വി.മുരളീധരന്‍, മുന്‍ സംസ്ഥാന അധ്യക്ഷന്‍ കുമ്മനം രാജശേഖരന്‍, പി.കെ.കൃഷ്ണദാസ്
സംസ്ഥാന ജനറല്‍ സെക്രട്ടറിമാരായ അനൂപ് ആന്റണി, എസ്.സുരേഷ്, ഉപാധ്യക്ഷ ആര്‍.ശ്രീലേഖ എന്നിവരും കൂടിക്കാഴ്ചയില്‍ പങ്കെടുത്തു.