മുകേഷിന് എതിരെ ഉയര്‍ന്നുവന്ന പരാതി പോലെയല്ല രാഹുല്‍ മാങ്കൂട്ടത്തിന് എതിരായ ആരോപണങ്ങള്‍; മാങ്കൂട്ടത്തില്‍ വിഷയത്തില്‍ കൂടുതല്‍ തെളിവുകള്‍ പുറത്തുവരുന്നു; അദ്ദേഹത്തെ വെളുപ്പിച്ചെടുക്കാന്‍ കഴിയില്ലെന്നും ഡിവൈഎഫ്‌ഐ
മുകേഷിന് എതിരെ ഉയര്‍ന്നുവന്ന പരാതി പോലെയല്ല രാഹുല്‍ മാങ്കൂട്ടത്തിന് എതിരായ ആരോപണങ്ങള്‍
പാലക്കാട്: യൂത്ത് കോണ്‍ഗ്രസ് നേതാവ് രാഹുല്‍ മാങ്കൂട്ടത്തിനെതിരായ ആരോപണങ്ങളില്‍ കൂടുതല്‍ തെളിവുകള്‍ പുറത്തുവരുന്നുണ്ടെന്നും അദ്ദേഹത്തെ വെളുപ്പിച്ചെടുക്കാന്‍ കഴിയില്ലെന്നും ഡിവൈഎഫ്‌ഐ സംസ്ഥാന സെക്രട്ടറി വി.കെ. സനോജ്. സിനിമാതാരം മുകേഷിനെതിരെ ഉയര്‍ന്നുവന്ന പരാതിപോലെയല്ല രാഹുല്‍ മാങ്കൂട്ടത്തിനെതിരായ ആരോപണങ്ങളെന്നും അദ്ദേഹം ചൂണ്ടിക്കാട്ടി. മുകേഷിനെതിരെ പരാതി നല്‍കിയ വ്യക്തി നിലവില്‍ ജയിലിലാണെന്നും സനോജ് കൂട്ടിച്ചേര്‍ത്തു.
രാഹുല്‍ മാങ്കൂട്ടത്തിനെതിരെ ഉയര്‍ന്നുവന്നിട്ടുള്ളത് സമാനതകളില്ലാത്ത ആരോപണമാണെന്നും ഇതിനെ സാമാന്യവല്‍ക്കരിക്കാനുള്ള ശ്രമമാണ് യുഡിഎഫ് നടത്തുന്നതെന്നും അദ്ദേഹം ആരോപിച്ചു. രാഹുലിനെതിരെ ശക്തമായ ജനപ്രതിരോധം ഉയരുമെന്നും അദ്ദേഹം ജനങ്ങള്‍ക്കിടയില്‍ വെറുക്കപ്പെട്ടവനായി മാറിയിരിക്കുകയാണെന്നും വി.കെ. സനോജ് പറഞ്ഞു. ഡിവൈഎഫ്‌ഐയുടെ പ്രതിഷേധം ശക്തമായി തുടരുമെന്നും അദ്ദേഹം വ്യക്തമാക്കി.
രാഹുല്‍ മാങ്കൂട്ടത്തിനെതിരെ സമൂഹമാധ്യമങ്ങളിലൂടെ വെളുപ്പിച്ചെടുക്കാനുള്ള നീക്കങ്ങള്‍ നടക്കുന്നുണ്ടെന്ന് ഡിവൈഎഫ്‌ഐ പരിഹസിച്ചു. സിപിഐ നേതാവിന്റെ പോസ്റ്റിലാണ് ഡിവൈഎഫ്‌ഐയുടെ പരിഹാസം. വ്യക്തിപരമായ അഭിപ്രായങ്ങളെ ഡിവൈഎഫ്‌ഐ അവഗണിക്കില്ലെന്നും, രാഹുലിനെ അനുകൂലിക്കുന്നവരുടെ പ്രസ്താവനകള്‍ അവരുടെ മാത്രം അഭിപ്രായങ്ങളാണെന്നും സനോജ് കൂട്ടിച്ചേര്‍ത്തു. ഈ വിഷയത്തില്‍ കൂടുതല്‍ വെളിപ്പെടുത്തലുകള്‍ വരും ദിവസങ്ങളില്‍ ഉണ്ടാകുമെന്നും ഡിവൈഎഫ്‌ഐ സൂചന നല്‍കി.