രാഹുലിനെ ന്യായീകരിക്കുന്ന നേതാക്കളുടെ വീട്ടില്‍ ഭാര്യയും മക്കളും ഇല്ലേ? എന്ന് ഇ പി ജയരാജന്‍; അപ്പോള്‍ മുകേഷിന്റെ കാര്യമോ എന്ന് മാധ്യമപ്രവര്‍ത്തകരുടെ ചോദ്യം; മുകേഷിന്റേത് നാളുകള്‍ക്ക് മുന്നേ നടന്ന സംഭവം, സിനിമയും രാഷ്ട്രീയവും വേറെയെന്ന് ന്യായീകരിച്ചു സിപിഎം നേതാവ്
രാഹുലിനെ ന്യായീകരിക്കുന്ന നേതാക്കളുടെ വീട്ടില്‍ ഭാര്യയും മക്കളും ഇല്ലേ?
തിരുവനന്തപുരം: രാഹുല്‍ മാങ്കൂട്ടത്തില്‍ വിഷയത്തില്‍ ആകെ പ്രതികരിച്ചു കുടുങ്ങി മുതിര്‍ന്ന സിപിഎം നേതാവ് ഇ പി ജയരാജന്‍. ഹീന കൃത്യത്തെ ന്യായീകരിക്കുന്നതിലൂടെ കോണ്‍ഗ്രസ് തകര്‍ന്നു കൊണ്ടിരിക്കുന്നുവെന്നായിരുന്നു ഇ പി മാധ്യമങ്ങളോട് പറഞ്ഞത്. തെറ്റിനെ അനുകൂലിക്കുന്ന ഒരു വിഭാഗം കോണ്‍ഗ്രസില്‍ ഉണ്ട്. രാഹുലിനെ ന്യായീകരിക്കുന്ന നേതാക്കളുടെ വീട്ടില്‍ ഭാര്യയും മക്കളും ഇല്ലേ?.
വി ഡി സതീശന്‍ പറയുന്ന നിലപാട് അല്ല സുധാകരനും മറ്റുള്ളവരും സ്വീകരിക്കുന്നത്. സതീശന്‍ ഒറ്റപ്പെട്ടു എന്ന് താന്‍ പറയുന്നില്ല. ഇത്തരം കുറ്റകൃത്യം ചെയ്ത ഒരാളെ എങ്ങനെ ന്യായീകരിക്കാന്‍ ആകും?. ശക്തമായ നടപടി എടുക്കാന്‍ കഴിയാത്തത് കോണ്‍ഗ്രസിന്റെ ഗതികേട്. സാധാരണ ഒരു മനുഷ്യനും ഉണ്ടാകാന്‍ പാടില്ലാത്ത സ്വഭാവ ദൂഷ്യമാണ് രാഹുലിന്റേത്.
ഈ വിഷയത്തില്‍ പ്രതികരിച്ച ഇപിയോടെ മാധ്യമങ്ങള്‍ ചോദ്യം ഉയര്‍ത്തി. അപ്പോള്‍ മുകേഷിന്റെ കാര്യമോ എന്നാ മാധ്യമപ്രവര്‍ത്തകരുടെ ചോദ്യം. ഇതില്‍ കൃത്യമായ ന്യായീകരണം നിരത്തുകയാണ് ഇ പി ജയരാജന്‍ ചെയ്തത്. മുകേഷിന്റേത് നാളുകള്‍ക്ക് മുന്നേ നടന്ന സംഭവം. സിനിമയും രാഷ്ട്രീയവും വേറെ. സിനിമയ്ക്ക് സിനിമയുടേതായ ചില പ്രത്യേകതകള്‍ ഉണ്ട്. സിനിമയും സിനിമ ലോകത്തുള്ള കാര്യവും ചര്‍ച്ച ചെയ്യുമ്പോള്‍ അത് പറയാം എന്ന് ഇ പി പറഞ്ഞു. മുകേഷിനെതിരെ പരാതി വന്നപ്പോള്‍ അന്വേഷണം നടന്നിട്ടുണ്ട് അത് ആ വഴിക്ക് പോയിട്ടുണ്ട്. രാഹുലിന്റെ തെറ്റുകള്‍ ന്യായീകരിക്കാന്‍ മുകേഷിന്റെ പേര് പറയുന്നു.
സിപിഐഎം ബിജെപി ബന്ധമെന്ന ആരോപണത്തിലും ഇ പി മറുപടി നല്‍കി. ബലാത്സഘം ചെയ്തതും മരുന്നു നല്‍കിയതും സിപിഐഎം ബിജെപി ബന്ധമാണോ?. തെരഞ്ഞെടുപ്പ് പ്രചാരണത്തില്‍ രാഹുലിനെ കൊണ്ടുവന്നതിലൂടെ നാട് തന്നെ ലജ്ജിച്ചു പോകുന്നുവെന്നും ഇ പി പറഞ്ഞു.