കേരളത്തിലെ തെരഞ്ഞെടുപ്പ് മുന്നില്‍ കണ്ട് പിണറായി വിജയന് മാത്രം പ്രായപരിധിയില്‍ ഇളവ്; സിപിഎം പോളിറ്റ് ബ്യൂറോയില്‍ 18 അംഗങ്ങള്‍; എട്ട് പേര്‍ പുതുമുഖങ്ങള്‍; കിസാന്‍ സഭ ജനറല്‍ സെക്രട്ടറിയായ മലയാളിയുമായ വിജു കൃഷ്ണനും സിപിഎം തലപ്പത്തേക്ക്; എം എം ബേബി അമരക്കാരനായ പിബിയില്‍ അഞ്ച് മലയാളികള്‍
കേരളത്തിലെ തെരഞ്ഞെടുപ്പ് മുന്നില്‍ കണ്ട് പിണറായി വിജയന് മാത്രം പ്രായപരിധിയില്‍ ഇളവ്
മധുര: സിപിഎമ്മില്‍ തലമുറമാറ്റത്തിന് വഴിവെച്ച് മധുരയിലെ പാര്‍ട്ടി കോണ്‍ഗ്രസ്. മുഖ്യമന്ത്രി പിണറായി വിജയന് ഒഴികെ 75 വയസ്സ് പിന്നിട്ട നേതാക്കള്‍ ഒന്നടങ്കം സിപിഎം പോളിറ്റ് ബ്യൂറോയില്‍നിന്ന് ഒഴിവായി. കേരളത്തിലെ സവിശേഷ സാഹചര്യത്തില്‍ തെരഞ്ഞെടുപ്പ് മുന്നില്‍ കണ്ടാണ് 80 വയസ്സ് തികയുന്ന പിണറായി വിജയന് മാത്രം ഇളവ് നല്‍കിയത്. മുന്‍ ജനറല്‍ സെക്രട്ടറിയും നിലവിലെ പി.ബി കോര്‍ഡിനേറ്ററുമായ പ്രകാശ് കാരാട്ട്, ബൃന്ദാ കാരാട്ട്, സുഭാഷിണി അലി, മണിക് സര്‍ക്കാര്‍, സൂര്യകാന്ത് മിശ്ര, ജി. രാമകൃഷ്ണന്‍ എന്നിവരെയാണ് പ്രായപരിധി മാനദണ്ഡപ്രകാരം പിബിയില്‍ നിന്ന് ഒഴിവാക്കി.
അതേസമയം ഡല്‍ഹി കേന്ദ്രീകരിച്ച് പ്രവര്‍ത്തിക്കുന്ന കിസാന്‍ സഭ ജനറല്‍ സെക്രട്ടറിയും മലയാളിയുമായ വിജു കൃഷ്ണനും ആര്‍. അരുണ്‍ കുമാറും അടക്കം എട്ട് പുതുമുഖങ്ങള്‍ പുതുതായി പി.ബിയില്‍ എത്തി. അരുണ്‍കുമാര്‍ ആന്ധ്രയില്‍നിന്നുള്ള നേതാവാണ്. വനിതാ പ്രതിനിധികളായ സുഭാഷിണി അലിയും ബൃന്ദാ കാരാട്ടും പുറത്തുപോകുന്ന പശ്ചാത്തലത്തില്‍ യു. വാസുകിയും മറിയം ധാവ്‌ളെയും പോളിറ്റ് ബ്യൂറോയിലെത്തി. പ്രകാശ് കാരാട്ടിനോട് അടുപ്പു പുലര്‍ത്തുന്നവരാണ് യു വാസുകിയിലും അരുണ്‍ കുമാറും വിജു കൃഷ്ണനും.
തമിഴ്‌നാട്ടില്‍നിന്നുള്ള കേന്ദ്ര കമ്മിറ്റി അംഗവും ട്രേഡ് യൂണിയന്‍ നേതാവുമാണ് യു. വാസുകി. മഹാരാഷ്ട്രയില്‍നിന്നുള്ള കേന്ദ്ര കമ്മിറ്റി അംഗമായ മറിയം, മഹിളാ അസോസിയേഷന്‍ ദേശീയ ജനറല്‍ സെക്രട്ടറിയുമാണ്. കെ ബാലകൃഷ്ണന്‍ (തമിഴ്നാട്), അമ്രാറാം (രാജസ്ഥാന്‍), ജിതേന്ദ്ര ചൗധരി ( ത്രിപുര), ശ്രീദിപ് ഭട്ടാചാര്യ (ബംഗാള്‍) മറ്റ് പുതിയ പിബി അംഗങ്ങള്‍.
എം എ ബേബി ജനറല്‍ സെക്രട്ടറിയാകുന്ന സിപിഎം അഖിലേന്ത്യാ കമ്മറ്റിയില്‍ അഞ്ച് മലയാളികളാണ് ഉള്ളത്. കഴിഞ്ഞ കണ്ണൂര്‍ പാര്‍ട്ടി കോണ്‍ഗ്രസിലാണ് പ്രായപരിധി കര്‍ശനമായി നടപ്പാക്കിയത്. എന്നാല്‍, മുഖ്യമന്ത്രി എന്ന നിലയില്‍ പിണറായിക്ക് ഇളവ് നല്‍കി. ഇത്തവണ പിബിയംഗങ്ങള്‍ക്ക് ഇളവ് പാടില്ലെന്ന് ബംഗാള്‍ ഘടകം ചര്‍ച്ചയില്‍ ആവശ്യപ്പെട്ടിരുന്നു. എന്നാല്‍, ഏഴ് പേരില്‍ പിണറായി മാത്രമാണ് ഇളവ് നല്‍കിയത്. പി.ബിയില്‍ ഒഴിവാക്കപ്പെട്ട ആറ് നേതാക്കളെയും കേന്ദ്രകമ്മിറ്റിയില്‍ പ്രത്യേക ക്ഷണിതാക്കളായി ഉള്‍പ്പെടുത്തി
സിപിഎം പിബി അംഗങ്ങള്‍
1 എം.എ. ബേബി
2 മുഹമ്മദ് സലിം
3 പിണറായി വിജയന്
4 ബി.വി. രാഘവലു
5 തപന്‍ സെന്‍
6 നീലോത്പല്‍ ബസു
7 രാമചന്ദ്ര ഡോം
8 എ. വിജയരാഘവന്‍
9 അശോക് ധാവ്ളെ
10 എം.വി. ഗോവിന്ദന്‍
11 യു. വാസുകി
12 വിജു കൃഷ്ണന്‍
13 ആര്‍. അരുണ്‍കുമാര്‍
14 മറിയം ധാവ്ളെ
15 ജിതേന്‍ ചൗധരി
16 ശ്രീദീപ് ഭട്ടാചാര്യ
17 അമ്രാ റാം
18 കെ. ബാലകൃഷ്ണന്‍