'ടീമിൽ അവഗണിക്കപ്പെട്ടു, അനിൽ കുംബ്ലെയോട് സംസാരിച്ചപ്പോൾ പൊട്ടിക്കരഞ്ഞു പോയി'; പഞ്ചാബ് കിംഗ്‌സിൽ കളിക്കുമ്പോൾ വിഷാദത്തിലാകുമോയെന്ന് ഭയന്നിരുന്നതായി വെസ്റ്റ് ഇൻഡീസ് താരം ക്രിസ് ഗെയിൽ
ചണ്ഡീഗഢ്: പഞ്ചാബ് കിംഗ്‌സിനൊപ്പം കളിച്ച അവസാന സീസണുകളിൽ താൻ അവഗണിക്കപ്പെട്ടതായും അപമാനിതനായാണ് വിരമിച്ചതെന്നും വെസ്റ്റ് ഇൻഡീസ് ഇതിഹാസ താരം ക്രിസ് ഗെയിൽ. ഒരു പ്രമുഖ സ്പോർട്സ് പോഡ്കാസ്റ്റിലാണ് താരം ഈ വെളിപ്പെടുത്തലുകൾ നടത്തിയത്. കെഎൽ രാഹുൽ നായകനും അനിൽ കുംബ്ലെ കോച്ചുമായിരിക്കുന്ന സമയത്തായിരുന്നു സംഭവം.
2018 മുതൽ 2021 വരെ പഞ്ചാബ് കിംഗ്‌സിനൊപ്പം കളിച്ച കാലഘട്ടത്തിൽ, ഒരു സീനിയർ താരമെന്ന നിലയിലുള്ള പരിഗണന തനിക്ക് ലഭിച്ചില്ലെന്ന് ഗെയിൽ പറയുന്നു. പലപ്പോഴും കാരണങ്ങളില്ലാതെ ടീമിൻ്റെ പ്ലെയിംഗ് ഇലവനിൽ നിന്ന് ഒഴിവാക്കപ്പെട്ടത് തന്നെ വേദനിപ്പിച്ചതായും അദ്ദേഹം കൂട്ടിച്ചേർത്തു. താൻ ഒരു കുട്ടിയെപ്പോലെയാണ് പരിഗണിക്കപ്പെട്ടതെന്നും ഇത് ആദ്യാനുഭവമായിരുന്നെന്നും ഗെയിൽ പറഞ്ഞു. ഈ സമയത്ത് വിഷാദത്തിലേക്ക് വഴുതി വീഴുമോ എന്ന് പോലും ഭയന്നിരുന്നതായി അദ്ദേഹം വെളിപ്പെടുത്തി.
അന്നത്തെ പഞ്ചാബ് കിംഗ്‌സ് പരിശീലകനായിരുന്ന മുൻ ഇന്ത്യൻ താരം അനിൽ കുംബ്ലെയോട് സംസാരിച്ചപ്പോൾ താൻ പൊട്ടിക്കരഞ്ഞതായും ഗെയിൽ വ്യക്തമാക്കി. ടീം മുന്നോട്ട് പോയ രീതിയിൽ താൻ നിരാശനായിരുന്നു. അന്ന് ടീം ക്യാപ്റ്റനായിരുന്ന കെ.എൽ. രാഹുൽ തനിക്ക് ഫോണിൽ വിളിച്ച് അടുത്ത മത്സരത്തിൽ കളിക്കാനുണ്ടാകുമെന്ന് ഉറപ്പ് നൽകിയിരുന്നെങ്കിലും, ടീം മാനേജ്‌മെൻ്റിനോടുള്ള നന്ദി അറിയിച്ച് താൻ വിരമിക്കാൻ തീരുമാനിക്കുകയായിരുന്നു എന്നും ഗെയിൽ പറഞ്ഞു.
ഐപിഎല്ലിൽ കൊൽക്കത്ത നൈറ്റ് റൈഡേഴ്സിലൂടെ അരങ്ങേറിയ ഗെയിൽ പിന്നീട് റോയൽ ചലഞ്ചേഴ്സ് ബാംഗ്ലൂർ, പഞ്ചാബ് കിംഗ്‌സ് ടീമുകൾക്കായും കളിച്ചിട്ടുണ്ട്. 175 റൺസെന്ന ഐപിഎല്ലിലെ ഏറ്റവും ഉയർന്ന വ്യക്തിഗത സ്കോർ ഇപ്പോഴും ഗെയിലിൻ്റെ പേരിലാണ്.