2024 ലെ ഏകദിന ടീമിനെ തിരഞ്ഞെടുത്ത് ഐസിസി; ടീമില്‍ മൂന്ന് പാകിസ്ഥാനും മൂന്ന് അഫ്ഗാന്‍ താരങ്ങളും; ക്യാപ്റ്റനായി ശ്രീലങ്കന്‍ ക്യാപ്റ്റന്‍ ചരിത് അസലങ്ക; ഒറ്റ ഇന്ത്യക്കാരില്ല
അന്താരാഷ്ട്ര ക്രിക്കറ്റ് കൗണ്‍സില്‍ (ഐസിസി) വെള്ളിയാഴ്ച പ്രഖ്യാപിച്ച 2024ലെ ഏകദിന പുരുഷ ടീം ഇന്ത്യന്‍ ആരാധകരെ വേദനിപ്പിക്കുന്നതാണ്. ഇന്ത്യയില്‍ നിന്ന് ഒരു താരം പോലും ടീമില്‍ ഇടം നേടിയിട്ടില്ലെങ്കിലും ഏഴ് അയല്‍ക്കാര്‍ ഉള്‍പ്പെടെ 10 ഏഷ്യക്കാര്‍ പട്ടികയില്‍ ഇടം നേടി.
ശ്രീലങ്കന്‍ ക്യാപ്റ്റന്‍ ചരിത് അസലങ്കയെ ഐസിസി ടീമിന്റെ നായകനായി തിരഞ്ഞെടുത്തു. അദ്ദേഹത്തിന്റെ മൂന്ന് സഹതാരങ്ങളായ പാത്തും നിസ്സാങ്ക, കുസാല്‍ മെന്‍ഡിസ്, വനിന്ദു ഹസരംഗ എന്നിവരും ടീമിന്റെ ഭാഗമാണ്. സെയിം അയൂബ്, ഷഹീന്‍ ഷാ അഫ്രീദി, ഹാരിസ് റൗഫ് എന്നീ മൂന്ന് പാകിസ്ഥാനികളും അഫ്ഗാനിസ്ഥാനില്‍ നിന്നുള്ള റഹ്‌മാനുള്ള ഗുര്‍ബാസ്, അസ്മത്തുള്ള ഒമര്‍സായി, എഎം ഗസന്‍ഫര്‍ എന്നിവരും ഇലവനില്‍ ഉണ്ട്. വെസ്റ്റ് ഇന്‍ഡീസിന്റെ ഷെര്‍ഫെയ്ന്‍ റഥര്‍ഫോര്‍ഡാണ് ടീമിലെ ഏക ഏഷ്യന്‍ ഇതര താരം.
2024ല്‍ ശ്രീലങ്കയില്‍ നടന്ന പരമ്പരയുടെ ഭാഗമായ മൂന്ന് ഏകദിനങ്ങള്‍ മാത്രമാണ് ഇന്ത്യന്‍ പുരുഷന്മാര്‍ കളിച്ചത്. ആദ്യ മത്സരം സമനിലയിലായതോടെ ഇന്ത്യ 2-0ത്തിന് പരമ്പര കൈവിട്ടു. ക്യാപ്റ്റന്‍ രോഹിത് ശര്‍മ, വിരാട് കോഹ്ലി, ശുഭ്മാന്‍ ഗില്‍, ശ്രേയസ് അയ്യര്‍ എന്നിവരടങ്ങുന്ന ശക്തമായ ടീമുമായാണ് ഇന്ത്യ ലങ്കയില്‍ പര്യടനം നടത്തിയത്. മുഹമ്മദ് സിറാജും അര്‍ഷ്ദീപ് സിങ്ങും പേസ് ആക്രമണത്തിന് നേതൃത്വം നല്‍കി. രണ്ട് അര്‍ധസെഞ്ചുറികള്‍ നേടിയ രോഹിതാണ് ടൂറിങ് ബാറ്റ്സ്മാന്‍മാരുടെ മികച്ച പ്രകടനം പുറത്തെടുത്തത്.
ശ്രീലങ്കയുടെ അസലങ്ക 16 ഏകദിനങ്ങളില്‍ നിന്ന് 50.2 ശരാശരിയില്‍ 605 റണ്‍സ് നേടി 2024ല്‍ മികച്ച പ്രകടനം കാഴ്ച്ചവെച്ചു. കഴിഞ്ഞ വര്‍ഷം കളിച്ച 18 ഏകദിനങ്ങളില്‍ 12ലും ലങ്ക ജയിച്ചപ്പോള്‍ അദ്ദേഹം ഒരു സെഞ്ചുറിയും നാല് അര്‍ധസെഞ്ചുറികളും നേടി. ഒമ്പത് ഏകദിനങ്ങളില്‍ നിന്ന് പാകിസ്ഥാന്‍ ഏഴ് വിജയങ്ങള്‍ നേടിയപ്പോള്‍ അഫ്ഗാനിസ്ഥാന്‍ 14 മത്സരങ്ങളില്‍ എട്ടെണ്ണം ജയിച്ചു.
2024 ഐസിസി പുരുഷ ഏകദിന ടീം: ചരിത് അസലങ്ക (സി) (ശ്രീലങ്ക), സയിം അയൂബ് (പാകിസ്ഥാന്‍), റഹ്‌മാനുള്ള ഗുര്‍ബാസ് (അഫ്ഗാനിസ്ഥാന്‍), പാത്തും നിസ്സാങ്ക (ശ്രീലങ്ക), കുസല്‍ മെന്‍ഡിസ് (ഡബ്ല്യുകെ) (ശ്രീലങ്ക), ഷെര്‍ഫാന്‍ റഥര്‍ഫോര്‍ഡ് (വെസ്റ്റ് ഇന്‍ഡീസ്), അസ്മത്തുള്ള ഒമര്‍സായി (അഫ്ഗാനിസ്ഥാന്‍), വനിന്ദു ഹസരംഗ (ശ്രീലങ്ക), ഷഹീന്‍ ഷാ അഫ്രീദി (പാകിസ്ഥാന്‍), ഹാരിസ് റൗഫ് (പാകിസ്ഥാന്‍), എഎം ഗസന്‍ഫര്‍ (അഫ്ഗാനിസ്ഥാന്‍).