ഒന്നാം ഇന്നിങ്സില് നേരിടാനായത് രണ്ടു പന്തുകൾ; രണ്ടാം ഇന്നിങ്സിലും രക്ഷയില്ല; രഞ്ജി ട്രോഫിയിൽ ഗില്ലിന് നിരാശ; പഞ്ചാബിന് വൻ തോൽവി
സൗരാഷ്ട്ര: ടി20 ലോകകപ്പിനുള്ള ഇന്ത്യൻ ടീമിൽ നിന്ന് ഒഴിവാക്കപ്പെട്ടതിന് പിന്നാലെ രഞ്ജി ട്രോഫിയിൽ പഞ്ചാബ് ടീമിന്റെ ക്യാപ്റ്റനായി കളിക്കാനിറങ്ങിയ ശുഭ്മാൻ ഗില്ലിന് നിരാശ. സൗരാഷ്ട്രയ്ക്കെതിരെ നടന്ന മത്സരത്തിൽ പഞ്ചാബ് 194 റൺസിന്റെ കനത്ത തോൽവി ഏറ്റുവാങ്ങിയപ്പോൾ, ഗില്ലിന് 0, 14 എന്നിങ്ങനെ സ്കോർ ചെയ്തത്. രാജ്കോട്ടിൽ നടന്ന മത്സരത്തിൽ സൗരാഷ്ട്രയുടെ ഒന്നാം ഇന്നിങ്സ് 172 റൺസിലും, രണ്ടാം ഇന്നിങ്സ് 286 റൺസിലും അവസാനിച്ചു.
മറുപടിയായി, പഞ്ചാബിന് ഒന്നാം ഇന്നിങ്സിൽ 139 റൺസും രണ്ടാം ഇന്നിങ്സിൽ 125 റൺസും മാത്രമേ നേടാനായുള്ളൂ. ഇതോടെ സൗരാഷ്ട്ര 194 റൺസിന്റെ വലിയ വിജയമാണ് സ്വന്തമാക്കിയത്. മത്സരത്തിൽ പഞ്ചാബിനെ നയിച്ച ശുഭ്മാൻ ഗിൽ, ആദ്യ ഇന്നിങ്സിൽ കേവലം രണ്ട് പന്തുകൾ നേരിട്ട് പൂജ്യത്തിന് പുറത്തായി. അഞ്ചാം സ്ഥാനത്താണ് താരം ബാറ്റിങ്ങിനിറങ്ങിയത്. രണ്ടാം ഇന്നിങ്സിൽ നാലാം നമ്പറിൽ ക്രീസിലെത്തിയ ഗില്ലിന് 14 റൺസ് മാത്രമാണ് നേടാനായത്.
രണ്ട് ഇന്നിങ്സുകളിലും സൗരാഷ്ട്ര താരം പാർഥ് ഭട്ടിന്റെ പന്തിൽ വിക്കറ്റിനു മുന്നിൽ കുടുങ്ങിയാണ് ഗിൽ പുറത്തായത്. ഇന്ത്യൻ ടീമിന് അടുത്ത ദിവസങ്ങളിൽ ടെസ്റ്റ്, ഏകദിന മത്സരങ്ങളില്ലാത്തതിനാലും, ഫെബ്രുവരി 7 മുതൽ ഇന്ത്യ ലോകകപ്പ് കളിക്കാനിറങ്ങുന്നതിന് മുന്നോടിയായുമാണ് ടി20 ടീമിൽ ഇടം ലഭിക്കാത്ത ഗിൽ രഞ്ജി ട്രോഫി കളിക്കാനെത്തിയത്. എന്നാൽ, ഈ ഇടവേളയ്ക്ക് ശേഷമുള്ള അദ്ദേഹത്തിന്റെ ആഭ്യന്തര ക്രിക്കറ്റിലെ മടങ്ങിവരവ് വ്യക്തിഗതമായും ടീമിന്റെ പ്രകടനത്തിലും പ്രതീക്ഷ നൽകുന്നതായിരുന്നില്ല.