ഐസിസി ടി20 റാങ്കിംഗില് റെക്കോര്ഡ് കുതിപ്പുമായി സഞ്ജു; ബാറ്റിംഗിൽ അഭിഷേക് ശർമ്മയും, ബൗളിംഗിൽ വരുൺ ചക്രവർത്തിയും തലപ്പത്ത്; ആദ്യ പത്തിൽ ഇടം പിടിച്ച് നാല് ഇന്ത്യൻ ബാറ്റർമാർ
ദുബായ്: ടി20 ലോകകപ്പിലെ സൂപ്പർ 8 പോരാട്ടങ്ങൾക്ക് പിന്നാലെ ഐസിസി പുറത്തുവിട്ട ഏറ്റവും പുതിയ റാങ്കിംഗിൽ സഞ്ജുവിന് മുന്നേറ്റം. വെസ്റ്റ് ഇൻഡീസിനെതിരായ തകർപ്പൻ പ്രകടനത്തിന്റെ കരുത്തിൽ മലയാളി താരം സഞ്ജു സാംസൺ 25 സ്ഥാനങ്ങൾ മെച്ചപ്പെടുത്തി 40-ാം സ്ഥാനത്തെത്തി. 50 പന്തിൽ പുറത്താകാതെ 97 റൺസ് നേടിയ പ്രകടനമാണ് സഞ്ജുവിന്റെ ഈ കുതിപ്പിന് വഴിയൊരുക്കിയത്. ബാറ്റിംഗ് റാങ്കിംഗിൽ അഭിഷേക് ശർമ്മയും ബൗളിംഗ് റാങ്കിംഗിൽ വരുൺ ചക്രവർത്തിയും തങ്ങളുടെ ഒന്നാം സ്ഥാനം നിലനിർത്തി.
ബാറ്റിംഗ് റാങ്കിംഗിൽ 874 റേറ്റിംഗ് പോയിന്റുമായി അഭിഷേക് ശർമ്മ ഒന്നാം സ്ഥാനം നിലനിർത്തിയപ്പോൾ, പാകിസ്ഥാന്റെ സാഹിബ്സാദ ഫർഹാൻ ഒരു സ്ഥാനം മെച്ചപ്പെടുത്തി 848 പോയിന്റോടെ രണ്ടാം സ്ഥാനത്തെത്തി, അഭിഷേകിന് വെല്ലുവിളിയായി. ഇന്ത്യൻ താരം ഇഷാൻ കിഷൻ ഒരു സ്ഥാനം കയറി നാലാം സ്ഥാനത്തെത്തിയപ്പോൾ, ക്യാപ്റ്റൻ സൂര്യകുമാർ യാദവിനെ മറികടന്ന് തിലക് വർമ്മ ആറാം സ്ഥാനത്തേക്ക് മുന്നേറി. ഇതോടെ സൂര്യകുമാർ ഒരു സ്ഥാനം താഴേക്ക് ഇറങ്ങി ഏഴാം സ്ഥാനത്തായി. ആദ്യ പത്തിൽ നാല് ഇന്ത്യൻ ബാറ്റ്സ്മാൻമാരാണുള്ളത്.
മറ്റ് പ്രധാന മാറ്റങ്ങളിൽ, ഹാർദ്ദിക് പാണ്ഡ്യ എട്ട് സ്ഥാനങ്ങൾ മെച്ചപ്പെടുത്തി 50-ാം സ്ഥാനത്തും സിംബാബ്വെയുടെ ബ്രയാൻ ബെന്നറ്റ് ആറ് സ്ഥാനങ്ങൾ മെച്ചപ്പെടുത്തി 11-ാം സ്ഥാനത്തും എത്തി. സിംബാബ്വെ നായകൻ സിക്കന്ദർ റാസ 16 സ്ഥാനങ്ങൾ മെച്ചപ്പെടുത്തി 43-ാം സ്ഥാനത്തും പാകിസ്ഥാന്റെ ഫഖർ സമാൻ 17 സ്ഥാനങ്ങൾ മെച്ചപ്പെടുത്തി 71-ാം സ്ഥാനത്തും എത്തി. ഇന്ത്യയുടെ ശിവം ദുബെ മൂന്ന് സ്ഥാനങ്ങൾ താഴ്ന്ന് 31-ാം സ്ഥാനത്തായി.
ബൗളിംഗ് റാങ്കിംഗിൽ 771 റേറ്റിംഗ് പോയിന്റുമായി വരുൺ ചക്രവർത്തി ഒന്നാം സ്ഥാനത്ത് തുടരുന്നു. പാകിസ്ഥാന്റെ അർബ്രർ അഹമ്മദ് രണ്ട് സ്ഥാനങ്ങൾ ഉയർന്ന് മൂന്നാമതെത്തി. ഇന്ത്യൻ പേസ് ബൗളർ ജസ്പ്രീത് ബുമ്ര ഒരു സ്ഥാനം മെച്ചപ്പെടുത്തി ഏഴാം സ്ഥാനത്തേക്ക് കയറിയപ്പോൾ, അർഷ്ദീപ് സിംഗ് ആറ് സ്ഥാനങ്ങൾ മെച്ചപ്പെടുത്തി 13-ാം സ്ഥാനത്തെത്തി.