ഫിഫ്‌റ്റിയടിച്ച് കോഹ്ലി, നിലയുറപ്പിച്ച് രോഹിത് ശർമ്മ; ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ മികച്ച നിലയിൽ; ദക്ഷിണാഫ്രിക്കയ്‌ക്കെതിരായ ആദ്യ ഏകദിനത്തിൽ പന്ത് പുറത്ത്; നാലാമനായി റുതുരാജ് ഗെയ്കവാദ്
റാഞ്ചി: ദക്ഷിണാഫ്രിക്കയ്‌ക്കെതിരായ ആദ്യ ഏകദിനത്തിൽ ടോസ് നഷ്ടപ്പെട്ട് ബാറ്റിംഗിനിറങ്ങി ഇന്ത്യയ്ക്ക് മികച്ച തുടക്കം. റാഞ്ചിയിൽ നടക്കുന്ന മത്സരത്തിൽ ടോസ് നേടിയ ദക്ഷിണാഫ്രിക്കൻ ക്യാപ്റ്റൻ എയ്ഡൻ മാർക്രം ഇന്ത്യയെ ബാറ്റിംഗിനയക്കുകയായിരുന്നു. റിഷഭ് പന്തിനെയും യുവതാരം തിലക് വർമയെയും പുറത്തിരുത്തിയാണ് ഇന്ത്യ കളത്തിലിറങ്ങിയത്. ഇന്നിംഗ്സിന്റെ തുടക്കത്തിൽ തന്നെ ഓപ്പണർ യശസ്വി ജയ്സ്വാളിന്റെ (18) വിക്കറ്റ് നഷ്ടപ്പെട്ട് ഇന്ത്യ സമ്മർദ്ദത്തിലായി.
നന്ദ്രേ ബർഗറിന്റെ പന്തിൽ വിക്കറ്റ് കീപ്പർ ക്വിന്റൺ ഡി കോക്കിന് ക്യാച്ച് നൽകിയാണ് ജയ്സ്വാൾ പുറത്തായത്. ഒടുവിൽ വിവരം കിട്ടുമ്പോൾ 17.3 ഓവറിൽ ഒരു വിക്കറ്റ് നഷ്ടത്തിൽ 138 റൺസ് എന്ന നിലയിലാണ് ഇന്ത്യ. വിരാട് കോലി (59), നായകൻ രോഹിത് ശർമ (47) എന്നിവരാണ് ക്രീസിൽ. പരിക്കേറ്റ ശുഭ്മാൻ ഗില്ലിന്റെ അഭാവത്തിൽ കെ.എൽ. രാഹുൽ ക്യാപ്റ്റന്റെയും വിക്കറ്റ് കീപ്പറിന്റെയും ചുമതലകൾ വഹിക്കുന്നു. റുതുരാജ് ഗെയ്കവാദ് നാലാമനായി ബാറ്റിംഗിനിറങ്ങും. രോഹിത് ശർമ, വിരാട് കോലി, രവീന്ദ്ര ജഡേജ എന്നിവരടക്കമുള്ള പരിചയസമ്പന്നരായ താരങ്ങൾ ഇന്ത്യൻ നിരയിലുണ്ട്.
കഴിഞ്ഞ കുറച്ചുകാലമായി പരിക്കുമൂലം 50 ഓവർ ഫോർമാറ്റിൽ നിന്ന് വിട്ടുനിന്ന റിഷഭ് പന്ത്, 2024 ഓഗസ്റ്റിൽ ഇന്ത്യയുടെ ശ്രീലങ്കൻ പര്യടനത്തിനുശേഷം ഏകദിനത്തിൽ കളിച്ചിട്ടില്ല. പരിക്കിൽ നിന്ന് മടങ്ങിയെത്തിയ പന്തിന്റെ തിരിച്ചുവരവ് ഏറെ ചർച്ചയായിരുന്നുവെങ്കിലും, ഈ നിർണായക മത്സരത്തിൽ താരത്തിന് പ്ലേയിംഗ് ഇലവനിൽ ഇടം ലഭിച്ചില്ല.
ഇന്ത്യൻ ടീം: രോഹിത് ശർമ, യശസ്വി ജയ്സ്വാൾ, വിരാട് കോലി, റുതുരാജ് ഗെയ്കവാദ്, വാഷിംഗ്ടൺ സുന്ദർ, കെ.എൽ. രാഹുൽ (ക്യാപ്റ്റൻ / വിക്കറ്റ് കീപ്പർ), രവീന്ദ്ര ജഡേജ, ഹർഷിത് റാണ, കുൽദീപ് യാദവ്, അർഷ്ദീപ് സിംഗ്, പ്രസിദ് കൃഷ്ണ.
ദക്ഷിണാഫ്രിക്കൻ ടീം: റയാൻ റിക്കൽടൺ, ക്വിന്റൺ ഡി കോക്ക് (വിക്കറ്റ് കീപ്പർ), എഡൻ മാർക്രം (ക്യാപ്റ്റൻ), മാത്യു ബ്രീറ്റ്സ്കെ, ടോണി ഡി സോർസി, ഡെവാൾഡ് ബ്രെവിസ്, മാർക്കോ ജാൻസെൻ, കോർബിൻ ബോഷ്, പ്രണേലൻ സുബ്രയൻ, നാന്ദ്രെ ബർഗർ, ഒട്ട്‌നീൽ ബാർട്ട്മാൻ.