അണ്ടര്‍ 23 വനിതാ ട്വന്റി 20 ചാമ്പ്യന്‍ഷിപ്പില്‍ കേരളത്തിന് രണ്ടാം തോൽവി; പഞ്ചാബിന് അനായാസ ജയം; മന്നത് കശ്യപിന് നാല് വിക്കറ്റ്
വിജയവാട: അണ്ടര്‍ 23 വനിതാ ട്വന്റി 20 ചാമ്പ്യന്‍ഷിപ്പില്‍ കേരളത്തിന് വീണ്ടും തോല്‍വി. പഞ്ചാബിനോട് നാല് വിക്കറ്റിനാണ് കേരളം പരാജയപ്പെട്ടത്. വിജയവാടയില്‍ നടന്ന മത്സരത്തില്‍ ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളം നിശ്ചിത 20 ഓവറില്‍ ഏഴ് വിക്കറ്റ് നഷ്ടത്തില്‍ 100 റണ്‍സെടുത്തപ്പോള്‍, മറുപടി ബാറ്റിങ്ങിനിറങ്ങിയ പഞ്ചാബ് 19.2 ഓവറില്‍ ആറ് വിക്കറ്റ് നഷ്ടത്തില്‍ വിജയലക്ഷ്യം മറികടന്നു. ചാമ്പ്യന്‍ഷിപ്പില്‍ ഇത് കേരളത്തിന്റെ രണ്ടാം തോല്‍വിയാണ്, ഇത് അവരുടെ മുന്നോട്ടുള്ള പ്രയാണത്തിന് കടുത്ത തിരിച്ചടിയേറ്റിരിക്കുകയാണ്.
കേരളത്തിനായി ഓപ്പണര്‍മാര്‍ക്ക് മികച്ച തുടക്കം നല്‍കാന്‍ കഴിഞ്ഞില്ല. വൈഷ്ണ എം പി 9 റണ്‍സിനും ശ്രദ്ധ സുമേഷ് 11 റണ്‍സിനും പുറത്തായി. പിന്നീട് ഒത്തുചേര്‍ന്ന അനന്യ കെ പ്രദീപും ക്യാപ്റ്റന്‍ നജ്‌ല സിഎംസിയും ചേര്‍ന്നുള്ള കൂട്ടുകെട്ടാണ് കേരളത്തെ മാന്യമായ സ്കോറിലേക്ക് നയിച്ചത്. ഇരുവരും ചേര്‍ന്ന് മൂന്നാം വിക്കറ്റില്‍ 53 റണ്‍സ് കൂട്ടിച്ചേര്‍ത്തു. 28 റണ്‍സെടുത്ത നജ്‌ല പുറത്തായപ്പോള്‍, 24 റണ്‍സെടുത്ത അനന്യ റിട്ടയേഡ് ഹര്‍ട്ടായി മടങ്ങി. മറ്റ് ബാറ്റര്‍മാര്‍ക്ക് കാര്യമായ സംഭാവന നല്‍കാന്‍ സാധിക്കാതെ വന്നതോടെ കേരളത്തിന്റെ സ്കോര്‍ 100 റണ്‍സില്‍ ഒതുങ്ങി. പഞ്ചാബിനായി മന്നത് കാശ്യപ് മികച്ച ബൗളിംഗ് പ്രകടനത്തിലൂടെ നാല് വിക്കറ്റുകള്‍ വീഴ്ത്തി കേരളത്തെ തകര്‍ത്തു.
101 റണ്‍സ് വിജയലക്ഷ്യം പിന്തുടര്‍ന്നിറങ്ങിയ പഞ്ചാബിന് ഓപ്പണര്‍മാരായ അവ്‌നീത് കൗറും (39), ഹര്‍സിമ്രന്‍ജിത്തും (27) മികച്ച തുടക്കം നല്‍കി. എന്നാല്‍, മധ്യ ഓവറുകളില്‍ കേരളം ശക്തമായി തിരിച്ചുവന്നു. ക്യാപ്റ്റന്‍ നജ്‌ല സിഎംസി മൂന്ന് വിക്കറ്റുകള്‍ വീഴ്ത്തി പഞ്ചാബ് ബാറ്റിംഗ് നിരയെ സമ്മര്‍ദത്തിലാക്കി. തുടരെ വിക്കറ്റുകള്‍ നഷ്ടമായതോടെ മത്സരം അവസാന ഓവറുകളിലേക്ക് നീണ്ടു. എന്നാൽ ഇരുപതാം ഓവറിലെ രണ്ടാം പന്തില്‍ പഞ്ചാബ് വിജയം നേടുകയായിരുന്നു.